Urdu - Chapter 25 - Al-Furqan

bahuth ba barkath hai wo Allah ta’ala jis ne apne bandhe par furqaan utaara, ta ke wo tamaam logo ke liye agaah karne wala ban jaaye

osi Allah ki saltanath hai asamaano aur zameen ki, aur wo koyi aulaad nahi rakhta, na us ki saltanath mein koyi us ka saajhi hai, aur har cheez ko us ne paida kar ke ek munasib andaza tehra diya hai

un logo ne Allah ke siva jinhe apne maboodh tehra rakhe hai wo kisi cheez ko paida nahi kar sakte, balke wo khud paida kiye jaate hai, ye to apni jaan ke nuqsaan nafa ka bhi eqtiyaar nahi rakhte aur na mauth wa hayaath ke, aur na dubara ji uthne ke wo maalik hai

aur kaafiro ne kaha ye to bas khud osi ka ghada ghadaaya jhoot hai, jis par aur logo ne bhi us ki madad ki hai, dar asl ye kaafir bade hee zulm aur sar ta sar jhoot ke murtakib hoye hai

aur ye bhi kaha ke ye to aglo ke afsaane hai jo us ne likha rakhe hai, bas wahi subah wa shaam us ke saamne pade jaate hai

keh dijiye ke ose to us Allah ne utaara hai, jo asmaan wa zameen ki tamaam pushida baatho ko jaanta hai, beshak wo bada hee baqshne wala hai, meherbaan hai

aur unhone kaha ke ye kaisa rasool hai? ke khana khaata hai aur bazaaro mein chalta phirta hai, us ke paas koyi farishta kyo nahi bheja jaata? ke wo bhi us ke saath ho kar daraane wala ban jaata

ya us ke paas koyi qazaana hee daal diya jaata ya us ka koyi baagh hee hota jis mein se ye khaata aur un zaalimo ne kaha ke tum aise aadmi ke piche ho liye ho, jis par jaadu kar diya gaya hai

qayaal to ki jiye! ke ye log aap ki nisbath kaisi kaisi baatein banaate hai, pas jis se khud hee behek rahe hai aur kisi tarah raah par nahi aa sakte

Allah ta’ala to aisa ba-barkath hai, ke agar chaahe to aap ko bahuth se aise baghaath inaayath farma de jo un ke kahe hoye baagh se bahuth hee behtar ho, jin ke niche nehre lehre le rahi ho aur aap ko bahuth se (pokhta) mahal bhi de de

baath ye hai ke ye log qayaamath ko jhoot samajhte hai aur qayaamath ke jhutlaane waalo ke liye hum ne bhadakti hoyi aag tayyaar kar rakhi hai

jab wo unhe door se dekhegi, to ye us ka ghusse se bhiparna aur dahaadna sunenge

aur jab ye jahannam ki kisi tang jageh mein mashke kas kar phek diye jayenge, to wahaan apne liye mauth hee mauth pukarenge

(un se kaha jayega) aaj ek hee mauth ko na pukaro, balke bahuth si amwaath ko pukaaro

aap keh dijiye ke kya ye behtar hai ya wo hameshgi waali jannath jis ka waada parhezgaaro se kiya gaya hai, jo un ka badhla hai aur un ke lautne ki asli jageh hai

wo jo chaahenge un ke liye wahaan maujoodh hoga, hamesha rehne waale, ye to aap ke rab ke zimme waada hai, jo qaabile talab hai

aur jis din Allah ta’ala unhe aur sivaaye Allah ke jinhe ye pujte rahe, unhe jama kar ke puchega, ke kya mere un bandho ko tum ne gumraah kiya, ya ye khud hee raah se gum ho gaye

wo jawaab denge ke tu paak zaath hai, khud hamein hee ye zeba na tha, ke tere siva auro ko apna kaar-saaz banaate, baath ye hai ke tu ne unhe aur un ke baap dadaao ko aasudgiya ata farmaayi, yahaan tak ke wo nasihath bhula baithe, ye log thein hee halaak hone waale

to unhone to, tumhe tumhaari tamaam baatho mein jhutlaaya, ab na to tum mein azaabo ke pherne ki taaqath hai na madad karne ki, tum mein se jis jis ne zulm kiya hai, hum ose bada azaab chakayenge

hum ne aap se pehle jitne rasool bheje sab ke sab khaana bhi khaate thein aur bazaaro mein bhi chalte phirte thein aur hum ne tum mein se har ek ko dosre ki azmaayesh ka zariya bana diya, kya tum sabr karoge? tera rab sab kuch dekhne wala hai

aur jinhe hamaari mulaqaath ki tawaqqo nahi, unhone kaha ke hum par farishte kyo nahi utaare jaate? ya hum apni aankho se apne rab ko dekh lete? un logo ne apne aap ko hee bahuth bada samajh rakha hai aur saqth sarkashi karli hai

jis din ye farishto ko dekh lenge, us din un gunehgaro ko koyi khushi na hogi aur kahenge ye mehroom hee mehroom kiye gaye

aur unhone jo jo amaal kiye thein, hum ne un ki taraf bad kar unhe para gandha zarro ki tarah kar diya

al-batta us din jannatiyo ka thikaana behtar hoga aur qaab-gaah bhi umda ho gi

aur jis din asmaan baadal sameth phat jayega aur farishte lagataar utaare jayenge

us din sahih taur par mulk sirf rahmaan ka hee hoga aur ye din kaafiro par bada bhaari hoga

aur us din zaalim shaqs apne haatho ko chaba chaba kar kahega, haay kaash ke main ne rasool (sallallahualaihiwasallam) ki raah eqtiyaar ki hoti

haay afsoos kaash ke main ne fala ko dosth na banaya hota

us ne to mujhe us ke baadh gumraah kar diya ke nasihath mere paas aa pahonchi thi aur shaitaan to insaan ko (waqt par) dagha dene wala hai

aur rasool kahega ke aye mere parvardigaar beshak meri ummath ne is Qur’aan ko chohd rakha tha

aur isi tarah hum ne har Nabi ke dushman baaz gunehgaaro ko bana diya hai aur tera rab hee hidaayath karne wala aur madad karne wala kaafi hai

aur kaafiro ne kaha ke us par Qur’aan saara ka saara ek saath hee kyo na utaara gaya, isi tarah hum ne (thoda thoda kar ke) utara, ta ke us se hum aap ka dil qawi rakhe, hum ne ise teher teher kar hee pad sunaya hai

ye aap ke paas jo koyi misaal layenge, hum us ka saccha jawaab aur umdah taujih1 aap ko bata denge

jo log apne mu ke bal jahannam ki taraf jama kiye jayenge, wahi badh-tar makaan waale aur gum-raahtar raaste waale hai

aur bil shuba hum ne Mosa(alaihissalaam) ko kitaab di aur un ke hamraah un ke bhai Haroon(alaihissalaam) ko un ka vazeer bana diya

aur keh diya ke tum duno un logo ki taraf jaao, jo hamari aayato ko jhutla rahe hai, phir hum ne unhe bilkul hee pamaal kar diya

aur khaum Nuh ne bhi jab rasulo ko jhuta kaha, to hum ne unhe gharq kar diya aur logo ke liye unhe nishaane ibrath bana diya aur hum ne zaalimo ke liye dardnaak azaab muhiyya kar rakha hai

aur aadiyo aur samudiyo aur kuwe walo ko aur un ke darmiyaan ki bahuth si ummato ko (halaak kar diya)

aur hum ne un ke saamne misaale bayaan ki, phir har ek ko bilkul hee tabaah wa barbaadh kar diya

ye log us basti ke paas se bhi aate jaate hai, jin par buri tarah ki baarish barsaayi gayi, kya ye phir bhi ose dekhte nahi? haqiqath ye hai ke unhe mar kar ji uthne ki ummid hee nahi

aur tumhe jab kabhi dekhte hai, to tum se masqara pan karne lagte hai, ke kya yahi wo shaqs hai jinhe Allah ta’ala ne rasool bana kar bheja hai

(wo to kahiye) ke hum us par jame rahe, warna unhone to hamein hamaare mabudho se behka dene mein koyi kasar nahi chodi thi, aur ye jab azaabo ko dekhenge, to unhe saaf maloom ho jayega ke puri tarah raah se bhatka hoa kaun tha

kya aap ne ose bhi dekha jo apni qaahish nafs ko apna maboodh banaaye hoye hai, kya aap us ke zimmedaar ho sakte hai

kya aap isi qayaal mein hai ke un mein se aksar sunte ya samajhte hai, wo to nare chaupaayo jaise hai, balke un se bhi zyaada bhatke hoye

kya aap ne nahi dekha ke aap ke rab ne saaye ko kis tarah phaila diya hai? agar chahta to, ose tehra hoa hee kar deta, phir hum ne aftaab ko us par daleel banaya

phir hum ne ose aahista aahista apni taraf khinch liya

aur wahi hai jis ne raath ko tumhaare liye pardah banaya aur neend ko raahath banayi aur din ko uth khade hone ka waqt

aur wahi hai jo ba-raane rehmath2 se pehle khush qabri dene waali hawaao ko bhejta hai aur hum asmaan se paak paani barsaate hai

ta ke us ke zariye se murda shahar ko zinda karde aur ose hum apni maqluqaath mein se bahuth se chau paayo aur insaano ko pilaate hai

aur beshak hum ne ose un ke darmiyaan tarah tarah se bayaan kiya, ta ke wo nasihath haasil kare, magar phir bhi aksar logo ne sivaaye na shukri ke maana nahi

agar hum chahte, to har har basti mein ek daraane wala bhej dete

pas aap kaafiro ka kehna na maane aur Qur’aan ke zariye un se puri taaqath se bada jihaad kare

aur wahi hai jis ne do samandar aapas mein mila rakhe hai, ye hai meetha aur mazedaar aur ye hai khaari kadwa aur un duno ke darmiyaan ek hijaab aur mazbooth oot kardi

wo hai jis ne paani se insaan ko paida kiya, phir ose nasab wala aur susraali rishto wala kar diya, bila shuba aap ka parvardigaar (har cheez par) qaadir hai

ye Allah ko chohd kar un ki ibaadath karte hai, jo na to unhe koyi nafa de sa ke, na koyi nuqsaan pahoncha sa ke, aur kaafir to hai hee apne rab ke qilaaf (shaitaan ki) madad karne wala

hum ne to aap ko khush qabri aur dar sunaane wala (Nabi) bana kar bheja hai

keh di jiye ke main Qur’aan ke pahonchaane par tum se koyi badhla nahi chahta, magar jo shaqs apne rab ki taraf raah pakadna chaahe

us hamesha zinda rehne waale Allah ta’ala par tawakkal kare, jise kabhi mauth nahi aur us ki tareef ke saath pakizgi bayaan karte rahe, wo apne bandho ke gunaaho se kaafi qabardaar hai

wahi hai jis ne asmaano aur zameen aur un ke darmiyaan ki sab chizo ko che din mein paida kar diya hai, phir arsh par mustawi hoa, wo rahmaan hai, aap us ke baare mein kisi qabardaar se poch le

un se jab bhi kaha jaata hai ke rahmaan ko sajda karo, to jawaab dete hai ke rahmaan hai kya? kya hum ose sajda kare jis ka tu hamein hukm de raha hai aur us (tableegh) ne un ki nafrath mein mazeedh izaafa kar diya

ba barkath hai wo jis ne asmaan mein burj3 banaya aur us mein aftaab banaya aur munawwar mehtaab bhi

aur osi ne raath aur din ko ek dosre ke piche aane jaane wala banaya, us shaqs ki nasihath ke liye, jo nasihath hasil karne ya shukr guzaari karne ka iraada rakhta ho

rahmaan ke (sacche) bandhe wo hai jo zameen par faruthni4 ke saath chalte hai aur jab be-ilm log un se baatein karne lagte hai to wo keh dete hai ke salaam hai

aur jo apne rab ke saamne sajde aur qayaam karte hoye raate guzaar dete hai

aur jo ye dua karte hai ke aye hamaare parvardigaar! hum se dozakh ka azaab pare hee pare rakh, kyo ke us ka azaab chimat jaane wala hai

beshak wo teherne aur rehne ke lehaaz se badh tareen jageh hai

aur jo qarch karte waqt bhi na to israaf karte hai, na baqili, balke un duno ke darmiyaan mautadil tariqe par qarch karte hai

aur Allah ke saath kisi dosre maboodh ko nahi pukaarte aur kisi aise shaqs ko jise qatl karna Allah ta’ala ne mana kar diya ho, wo bajuz haq ke qatl nahi karte, na wo zeena ke murtakib hote hai aur jo koyi ye kaam kare, wo apne upar saqth wabaal layega

ose qayaamath ke din duhra azaab kiya jayega aur wo zillath wa qaari ke saath hamesha osi mein rahega

sivaaye un logo ke jo tauba kare aur imaan laaye aur nek kaam kare, aise logo ke gunaaho ko Allah ta’ala nekiyo se badal deta hai, Allah baqshne wala meherbaani karne wala hai

aur jo shaqs tauba kare aur nek amal kare, wo to(haqiqatan) Allah ta’ala ki taraf saccha rujo karta hai

aur jo log jhoti gawaahi nahi dete, aur jab kisi laghw cheez par un ka guzar hota hai to sharaafath se guzar jaate hai

aur jab unhe un ke rab ke kalaam ki aayate sunaayi jaati hai, to wo andhe behre ho kar un par nahi girte

aur ye dua karte hai ke aye hamaare parvardigaar! tu hamein hamaari biwiyo aur aulaad se aankho ki thandak ata farma aur hamein parhezgaaro ka peshwa bana

yahi wo log hai jinhe un se sabr ke badhle, jannath ke bulandh wa baala khaane diye jayenge, jahaan unhe dua salaam pahonchaya jayega

us mein ye hamesha rahenge, wo bahuth hee acchi jageh aur umdah muqaam hai

keh dijiye ke agar tumhaari dua elteja (pukaarna) na hoti to mera rab tumhari muth-laq parvaah na karta, tum to jhutla chuke, ab an-qareeb us ki saza tumhe chimat jaane waali hogi