Urdu - Chapter 26 - Ash-Shuara

taa seem-meem

ye aayate roushan kitaab ki hai

un ke imaan na laane par shaayad aap to apni jaan kho denge

agar hum chaahte, to un par asmaan se koyi aisi nishaani utaar te, ke jis ke saamne un ki gardane qam ho jaati

aur un ke paas rahmaan ki taraf se jo bhi nayi nasihath aayi, ye us se ru gardaani karne waale ban gaye

un logo ne jhutlaya hai, ab un ke paas jaldi se us ki qabre aa jayengi, jis ke saath wo masqara pan kar rahe hai

kya unhone zameen par nazre nahi daali? ke hum ne us mein har tarah ke nafees jode kis qadar ugaaye hai

beshak us mein yaqinan nishaani hai aur un mein ke aksar log momin nahi hai

aur tera rab yaqinan wahi ghaalib aur meherbaan hai

aur jab aap ke rab ne Mosa(alaihissalaam) ko awaaz di, ke tu zaalim khaum ke paas ja

khaum feraun ke paas, kya wo parhezgaari na karenge

Mosa(alaihissalaam) ne kaha, mere parvardigaar! mujhe to khauf hai ke kahi wo mujhe jhutla (na) de

aur mera sina tang ho raha hai aur meri zabaan chal nahi rahi, pas tu Haroon(alaihissalaam) ki taraf bhi (wahi) bhej

aur un ka mujh par mere ek qusoor ka (daawa) bhi hai, mujhe dar hai ke kahi wo mujhe maar na daale

janaab baari ne farmaya! hargiz aisa na hoga, tum duno hamaari nishaaniya le kar jaao, hum khud sunne waale tumhaare saath hai

tum duno feraun ke paas ja kar kaho ke bila shuba hum rabbul aalameen ke bheje hoye hai

ke tu hamaare saath bani israel ko rawaana karde

feraun ne kaha, ke kya hum ne tujhe tere bachpan ke zamaane mein apne haan nahi paala tha? aur tu ne apni umr ke bahuth se saal hum mein nahi guzaare

phir tu apna wo kaam kar gaya, jo kar gaya, aur tu na shukro mein hai

(Hazrath) Mosa(alaihissalaam) ne jawaab diya ke main ne us kaam ko us waqt kiya tha jab ke main raah bhule hoye logo mein se tha

phir tum se khauf kha kar main tum mein se bhaag gaya, phir mujhe mere rab ne hukm wa ilm ata farmaya aur mujhe apne paighambaro mein se kar diya

mujh par tera kya yahi wo ehsaan hai? jise tu jata raha hai, ke tu ne bani israel ko ghulaam bana rakha hai

feraun ne kaha rabbul aalameen kya (cheez) hai

(hazrath) Mosa(alaihissalaam) ne farmaya wo asmaano aur zameen aur un ke darmiyaan ki tamaam chizo ka rab hai, agar tum yaqeen rakhne waale ho

feraun ne apne irdh girdh waalo se kaha ke kya tum sun nahi rahe

(hazrath) Mosa(alaihissalaam) ne farmaya, wo tumhara aur tumhare agle baap dadaao ka parvardigaar hai

feraun ne kaha (logo!) tumhara ye rasool jo tumhaari taraf bheja gaya hai, ye to yaqinan deewana hai

(hazrath) Mosa(alaihissalaam) ne farmaya wahi mashriq wa maghrib ka aur un ke darmiyaan ki tamaam chizo ka rab hai, agar tum aql rakhte ho

feraun kehne laga, sun le! agar tu ne mere siva kisi aur ko maboodh banaya, to main tujhe qaidiyo mein daal donga

Mosa(alaihissalaam) ne kaha agar che main tere paas koyi khuli cheez le aao

fearun ne kaha agar tu saccho mein se hai, to ose pesh kar

aap ne (osi waqt) apni laathi daal di, jo achaanak khullam khulla (zabardast) az-daha ban gayi

aur apna haath khinch nikala, to wo bhi osi waqt har dekhne waale ko safedh chamkila nazar aane laga

feraun apne aas paas ke sardaaro se kehne laga, bhai ye to koyi bada daana jaadugar hai

ye to chahta hai ke apne jaadu ke zoor se, tumhe tumhaari sar zameen se hee nikaal de, bataao ab tum kya hukm dete ho

un sab ne kaha, aap ise aur is ke bhai ko muhullath di jiye aur tamaam shehro mein har-kaare bhej di jiye

jo aap ke paas zee ilm jaadugaro ko le aaye

phir ek muqarrar din ke waade par tamaam jaadugar jama kiye gaye

aur aam logo se bhi keh diya gaya ke tum bhi majme mein haazir ho jaoge

ta ke agar jaadugar ghaalib aa jaaye to hum unhee ki pairvi kare

jaadugar aa kar feraun se kehne lage ke agar hum jeet gaye to hamein kuch in’aan bhi milega

feraun ne kaha haan! (badi khushi se) balke aisi surath mein tum mere qaas darbaari ban jaoge

phir (hazrath) Mosa(alaihissalaam) ne jaadugaro se farmaya, jo kuch tumhe daalna hai daal do

unhone apni rassiya aur laathiyaa daal di, aur kehne lage izzate feraun ki qasam hum yaqinan ghaalib hee rahenge

ab (hazrath) Mosa(alaihissalaam) ne bhi apni laathi maidaan mein daal di, jis ne osi waqt un ke jhoot moot ke kartab ko nigalna shuro kar diya

ye dekhte hee jaadugar be-eqtiyaar sajde mein gir gaye

aur unhone saaf keh diya ke, hum to Allah rabbul aalameen par imaan laaye

yaani Mosa(alaihissalaam) aur Haroon(alaihissalaam) ke rab par

feraun ne kaha ke meri ijaazath se pehle tum us par imaan le aaye? yaqinan yahi tumhara wo bada (sardaar) hai, jis ne tum sab ko jaadu sikhaya hai, so tumhe abhi abhi maloom ho jayega, qasam hai, main abhi tumhaare haath paao, ulte taur par kaat donga aur tum sab ko soli par latka donga

unhone kaha koyi haraj nahi, hum to apne rab ki taraf lautne wale hai hee

is bina par ke hum sab se pehle imaan waale bane hai, hamein ummid padti hai ke hamara rab hamari sab qataaye maaf farma dega

aur hum ne Mosa(alaihissalaam) ko wahi ki, ke raatho raath mere bandho ko nikaal le chal, tum sab picha kiye jaoge

feraun ne shahro mein harkaaro ko bhej diya

ke yaqinan ye gruh bahuth hee kam tedaath mein hai

aur us par ye hamein saqth ghazab-naak kar rahe hai

aur yaqinan hum badi jamaath hai, un se chaukanna rehne waale

bil aaqir hum ne unhe baaghaath se aur chashmo se

aur qazaano se aur acche acche muqamaath se nikaal baaher kiya

isi tarah hoa aur hum ne un (tamaam) chizo ka waaris bani israel ko bana diya

pas ferauni suraj nikalte hee, un ke ta’aqqub mein nikle

pas jab duno ne ek dosre ko dekh liye to Mosa(alaihissalaam) ke saathiyo ne kaha, hum to yaqinan pakad liye gaye

Mosa(alaihissalaam) ne kaha hargiz nahi, yaqeen maano mera rab mere saath hai, jo zaroor mujhe raah dikhayega

hum ne Mosa(alaihissalaam) ki taraf wahi bheji ke darya par apni laathi maar, pas osi waqt darya phat gaya aur har ek hissa paani ka misl bade pahaad ke ho gaya

aur hum ne osi jagah dosro ko nazdeek la khada kar diya

aur Mosa(alaihissalaam) ko aur us ke tamaam saathiyo ko najaath de di

phir aur sab dosro ko dubo diya

yaqinan us mein badi ibrath hai, aur un mein ke aksar log imaan waale nahi

aur beshak aap ka rab bada hee ghaalib wa meherbaan hai

unhe Ibraheem(alaihissalaam) ka waaqea bhi suna do

jab ke unhone apne baap aur apni khaum se farmaya ke tum kis ki ibaadath karte ho

aap ne farmaya ke jab tum unhe pukaarte ho, to kya wo sunte bhi hai

ya tumhe nafa nuqsaan bhi pahoncha sakte hai

unhone kaha ye (hum kuch nahi jaante) hum ne to apne baap dadaao ko isi tarah karte hoye paaya

aap ne farmaya, kuch qabar bhi hai, jinhe tum pooj rahe ho

tum aur tumhaare agle baap dada, wo sab mere dushman hai

bajuz sacche Allah ta’ala ke jo tamaam jahaan ka paalan haar hai

jis ne mujhe paida kiya hai aur wahi meri rehbari farmata hai

wahi hai jo mujhe khilata pilaata hai

aur jab main bimaar pad jaao to mujhe shifa ata farmata hai

aur wahi mujhe maar dalega, phir zinda kar dega

aur jis se ummid bandhi hoyi hai ke wo roze jaza mein mere gunaaho ko baqsh dega

aye mere rab! mujhe quwwate faisla ata farma aur mujhe nek logo mein mila de

aur mera zikr khair dosre logo mein bhi baaqi rakh

mujhe nemato waali jannath ke waariso mein se bana de

aur mere baap ko baqsh de, yaqinan wo gumraaho mein se tha

aur jis din ke log dobara jilaaye jaaye, mujhe ruswa na kar

jis din ke maal aur aulaad kuch kaam na ayegi

lekin fayede wala wahi hoga jo Allah ta’ala ke saamne be ayb dil le kar jaaye

aur parhezgaaro ke liye jannath bil-kul nazdeek la di jayegi aur gumraah logo ke liye jahannam zaahir kardi jayegi

aur un se pucha jayega jin ki tum puja karte rahe, wo kahaan hai

jo Allah ta’ala ke siva thein, kya wo tumhaari madad karte hai

ya koyi badhla le sakte hai

pas wo sab aur kul gumraah log jahannam mein aundhe mu daal diye jayenge

aur iblees ke tamaam ke tamaam lashkar bhi wahaan

aapas mein ladte jhagadte hoye kahenge

ke qasam Allah ki! yaqinan hum khuli ghalti par thein

jab ke tumhe rabbul aalameen ke baraabar samajh baithe thein

aur hamein to siva un badh-kaaro ke kisi aur ne gumraah nahi kiya tha

ab to hamaara koyi sifaarishi bhi nahi

aur na koyi (saccha) gham qaar dosth

agar kaash ke hamein ek martaba phir jaana milta, to hum pakke sacche momin ban jaate

ye maanjra yaqinan ek zabardast nishaani hai, un mein se aksar log imaan laane waale nahi

yaqinan aap ka parvardigaar hee ghaalib meherbaan hai

khaum nuh ne bhi nabiyo ko jhutlaya

jab ke un ke bhai Nuh(alaihissalaam) ne kaha ke kya tumhe Allah ka khauf nahi

suno main tumhari taraf Allah ka amaanat-daar rasool hoon

pas tumhe Allah se darna chahiye aur meri baath maanni chahiye

main tum se us par koyi ajr nahi chahta, mera badhla to sirf rabbul aalameen ke haan hai

pas tum Allah ka khauf rakho aur meri farma-bardaari karo

khaum ne jawaab diya ke kya hum tujh par imaan laaye, teri taabedaari to razeel logo ne ki hai

aap ne farmaya mujhe kya qabar ke, wo pehle kya karte rahe

un ka hisaab to mere rab ke zimme hai, agar tumhe sha’oor ho to

main imaan waalo ko dhakke dene wala1 nahi

main to saaf taur par dara dene wala hoon

unhone kaha ke aye Nuh(alaihissalaam) agar tu baaz na aya, to yaqinan tujhe sangsaar kar diya jayega

aap ne kaha aye mere parvardigaar! meri khaum ne mujhe jhutla diya

pas tu mujh mein aur un mein koyi qatayi faisla karde aur mujhe aur mere ba imaan saathiyo ko najaath de

chuna che hum ne ose aur us ke saathiyo ko bhari hoyi kashti mein (sawaar kara kar) najaath de di

baadh aza, baaqi ke tamaam logo ko hum ne dubo diya

yaqinan us mein bahuth badi ibrath hai, un mein se aksar log imaan laane waale thein bhi nahi

aur beshak aap ka parvardigaar, albatta wahi hai, zabardasth rahem karne wala

aadiyo ne bhi rasulo ko jhutlaya

jab ke un se un ke bhai hoodh ne kaha ke kya tum darte nahi

main tumhara amaanat daar-paighambar hoon

pas Allah se daro aur mera kaha maano

main us par tum se koyi ujrath talab nahi karta, mera sawaab to tamaam jahaan ke parvardigaar ke paas hee hai

kya tum ek ek teele par ba taur khel tamaasha yaad gaar (imaarath) bana rahe ho

aur badi san-ath waale (mazbooth mahel tameer) kar rahe ho, goya ke tum hamesha yahi rahoge

aur jab kisi par haath daalte ho, to saqti aur zulm se pakadte ho

Allah se daro aur meri pairvi karo

us se daro jis ne un chizo se tumhaari imdaath ki, jinhe tum jaante ho

us ne tumhaari madad ki maal se aur aulaad se

baghaath se aur chashmo se

mujhe to tumhaari nisbath bade din ke azaab ka andesha hai

unhone kaha ke aap waaz kahe, ya waaz kehne waalo mein na ho, hum par yeksa hai

ye to bas puraane logo ki aadath hai

aur hum har giz azaab nahi diye jayenge

chu ke aadiyo ne hazrath Hood ko jhutlaya, is liye hum ne unhe tabaah kar diya, yaqinan us mein nishaani hai aur un mein se aksar be imaan thein

beshak aap ka rab wahi hai ghaalib meherbaan

samudiyo ne bhi paighambaro ko jhutlaya

un ke bhai Saaleh ne un se farmaya ke kya tum Allah se nahi darte

main tumhaari taraf Allah ka amaanat-daar paighambar hoon

to tum Allah se daro aur mera kaha karo

main us par tum se koyi ujrath nahi maangta, meri ujrath to bas parvardigaare aalam par hee hai

kya un chizo mein jo yahaa hai, tum aman ke saath chohd diye jaoge

yaani un baagho aur un chashmo

aur un kheto aur un khajuro ke baagho mein jin ke shagufe narm wa naazuk hai

aur tum pahaado ko taraash taraash kar pur takalluf makanaath bana rahe ho

pas Allah se daro aur meri ita’ath karo

be-baak hadh se guzar jaane walo ki ita’ath se baaz aa jaao

jo mulk mein fasaadh pehla rahe hai aur islaah nahi karte

wo bole ke bas tu un mein se hai, jin par jaadu kar diya gaya hai

to, tu hum jaisa hee insaan hai, agar tu saccho se hai, to koyi maujeza le aa

aap ne farmaya ye hai oontni paani pine ki, ek baari is ki aur ek muqarrara din ki baari paani pine ki tumhaari

(qabardaar!) ise buraayi se haath na lagaana, warna ek bhaari din ka azaab tumhaari girift kar lega

phir bhi unhone us ki kuche kaat daali, bas wo pashemaan ho gaye

aur azaab ne unhe aa dabocha, beshak us mein ibrath hai aur un mein se aksar log momin na thein

aur beshak aap ka rab, bada zabardasth aur meherbaan hai

khaum looth ne bhi nabiyo ko jhutlaya

un se un ke bhai Looth(alaihissalaam) ne kaha, kya tum Allah ka khauf nahi rakhte

main tumhari taraf amanatdaar rasool hoon

pas tum Allah ta’ala se daro aur meri ita’ath karo

main tum se us par koyi badhla nahi maangta, mera ajr to sirf Allah ta’ala par hai, jo tamaam jahaan ka rab hai

kya tum jahaan waalo mein se mardo ke saath shewat-raani karte ho

aur tumhaari jin aurto ko Allah ta’ala ne tumhara joda banaya hai, un ko chohd dete ho balke tum ho hee hadh se guzar jaane waale

unhone jawaab diya ke aye Looth!(alaihissalaam) agar tu baaz na aaya, to yaqinan nikaal diya jayega

aap ne farmaya, main tumhaare kaam se saqth na khush hoon

mere parvardigaar! mujhe aur mere gharaane ko us (wabaal) se bacha le, jo ye karte hai

pas hum ne ose aur us ke mutaalleqeen ko, sab ko bacha liya

bajuz ek budhiya ke, ke wo piche reh jaane waalo mein ho gayi

phir hum ne baaqi aur sab ko halaak kar diya

aur hum ne un par ek qaas qism ka meh barsaaya, pas bahuth hee bura meh tha, jo daraaye gaye hoye logo par barsa

ye maanjra bhi saraa-sar ibrath hai, un mein se bhi aksar musalmaan na thein

beshak tera parvardigaar wahi hai, ghalbe wala, meherbaani wala

ayka waalo ne bhi rasulo ko jhutlaya

jab ke un se Shuaib (alaihissalaam) ne kaha ke kya tumhe dar khauf nahi

main tumhari taraf amaanatdaar rasool hoon

Allah ka khauf khaao aur meri farma-bardaari karo

main us par tum se koyi ujrath nahi chaahta, mera ajr tamaam jahaano ke paalne waale ke paas hai

naap pura bhara karo, kam dene walo mein shamuliyath na karo

aur sidhi sahih taraazu se tola karo

logo ko un ki cheeze kami se na do, be baaki ke saath zameen mein fasaadh machaate na phiro

us Allah ka khauf rakho, jis ne khud tumhe aur agli maqlooq ko paida kiya hai

unhone kaha, tu, to un mein se hai jin par jaadu kar diya jaata hai

aur tu to hum hee jaisa ek insaan hai aur hum to tujhe jhoot bolne waalo mein se hee samajhte hai

agar tu sacche logo mein se hai to hum par asmaan ke tukde gira de

kaha ke mera rab qoob jaanne wala hai, jo kuch tum kar rahe ho

chu ke unhone ose jhutlaya to, unhe sayebaan waale din ke azaab ne pakad liya, wo bade bhaari din ka azaab tha

yaqinan us mein badi nishaani hai aur un mein aksar musalmaan na thein

aur yaqinan tera parvardigaar albatta wahi hai, ghalbe wala, meherbaani wala

aur beshak wa shuba, ye (Qur’aan) rabbul aalameen ka nazil farmaya hoa hai

ise amaanatdaar farishta le kar aya hai

aap ke dil par utra hai, ke aap agaah kar dene waalo mein se ho jaaye

saaf arabi zabaan mein hai

agle nabiyo ki kitaabo mein bhi is Qur’aan ka taskera hai

kya unhe ye nishaani kaafi nahi, ke haqqaniyate Qur’aan ko to, bani israel ke ulema bhi jaante hai

aur agar hum ise kisi ajami shaqs par naazil farmaate

pas wo un ke saamne us ki tilaawath karta, to ye ose baawar karne waale na hote

isi tarah hum ne gunehgaaro ke dilo mein is inkaar ko dakhil kar diya hai

wo jab tak dardnaak azaabo ko mulaaheza na karle, imaan na layenge

pas wo azaab un ko nagaha aa jayega, unhe us ka sha’oor bhi na hoga

us waqt kahenge ke, kya hamein kuch mahullath di jayegi

pas kya ye hamaare azaab ki jaldi macha rahe hai

accha ye bhi bataao ke, agar hum ne unhe kayi saal bhi fayeda uthaane diya

phir unhe wo azaab aa laga jin se ye dhamkaaye jaate thein

to jo kuch bhi ye baratte rahe, us mein se kuch bhi fayeda na pahoncha sakega

hum ne kisi basti ko halaak nahi kiya hai, magar isi haal mein, ke us ke liye daraane waale thein

nasihath ke taur par aur hum zulm karne waale nahi hai

is Qur’aan ko shaitaan nahi laaye

na wo us ke qaabil hai, na unhe us ki taaqath hai

balke wo to, sunne se bhi mehroom kar diye gaye hai

pas tu Allah ke saath kisi aur maboodh ko na pukaar, ke tu bhi saza paane walo mein se ho jaaye

apne qaribi rishte waalo ko dara de

us ke saath ferotni2se pesh aa, jo bhi imaan laane wala ho kar teri taabedari kare

agar ye log teri na farmaani kare to, tu elaan karde ke main un kaamo se bezaar hoon jo tum kar rahe ho

apna pura bharosa ghaalib meherbaan Allah par rakh

jo tujhe dekhta rehta hai, jab ke tu khada hota hai

aur sajda karne waalo ke darmiyaan tera ghumna phirna bhi

wo bada hee sunne wala aur qoob hee jaane wala hai

kya main tumhe bataao ke shaitaan kis par utarte hai

wo har ek jhute gunehgaar par utarte hai

(uchat-ti) hoyi suni sunaayi pahoncha dete hai aur un mein se aksar jhote hai

shaayaro ki pairvi wo karte hai, jo behke hoye ho

kya aap ne nahi dekha ke shaayar ek ek biya baan3 mein sar takraate phirte hai

aur wo kehte hai, jo karte nahi

sivaaye un ke jo imaan laaye aur nek amal kiye aur ba kasrath Allah ta’ala ka zikr kiya aur apni mazlumi ke baadh inteqaam liya, jinhone zulm kiya hai wo bhi abhi jaan lenge ke kis karwat ulat-te hai