Urdu - Chapter 39 - Az-Zumar

is kitaab ka utaarna Allah ta’ala ghaalib ba hikmath ki taraf se hai

yaqinan hum ne is kitaab ko aap(sallallahu alaihi wasallam) ki taraf haq ke saath naazil faramaya hai, pas aap Allah hee ki ibaadath kare, osi ke liye deen ko qaalis karte hoye

qabardaar! Allah ta’ala hee ke liye qaalis ibaadath karna hai aur jin logo ne us ke siva auliya bana rakhe hai (aur kehte hai) ke hum un ki ibaadath sirf isi liye karte hai ke ye (buzrug) Allah ke nazdiki ke martabe tak hamaari rasaayi kara de, ye log jis baare mein eqtelaaf kar rahe hai, us ka (saccha) faisla Allah khud karega, jhute aur na shukre (logo) ko Allah raah nahi dikhaata

agar Allah ta’ala ka iraada aulaad hee ka hota, to apni maqlooq mein se jise chahta chun leta (lekin) wo to paak hai, wo wahi Allah ta’ala hai yegana aur khuwwath waala

nihaayath acchi tadhbeer se, us ne asmaano aur zameen ko banaya, wo raath ko din par aur din ko raath par lapet deta hai aur us ne suraj chaand ko kaam par laga rakha hai, har ek muqarrara muddath tak chal raha hai, yaqeen maano ke wahi zabardasth aur gunaaho ka bnaqshne waala hai

us ne tum sab ko ek hee jaan se paida kiya hai, phir osi se us ka joda paida kiya aur tumhaare liye, chau paayo mein se (aat nar wa maada) utaare, wo tumhe tumhaari maao ke peto mein ek banaawat ke baadh dosri banaawat par banaata hai, teen teen andhero mein, yahi Allah ta’ala tumhaara rab hai, osi ke liye badshaahath hai, us ke siva koyi maboodh nahi, phir tum kaha bahek rahe ho

agar tum na shukri karo to, (yaad rakho ke) Allah ta’ala tum (sab se) be niyaaz hai aur wo apne bandho ki na-shukri se khush nahi aur agar tum shukr karo, to wo ose tumhaare liye pasandh karega aur koyi kisi ka boojh nahi uthaata, phir tum sab ka lautna, tumhaare rab hee ki taraf hai, tumhe wo batla dega, jo tum karte thein, yaqinan wo dilo tak ki baatho ka waaqif hai

aur insaan ko jab kabhi koyi takleef pahonchti hai, to wo qoob rujo ho kar apne rab ko pukaarta hai, phir jab Allah ta’ala ose apne paas se nemath ata farma deta hai, to wo us se pehle jo dua karta tha, ose bilkul bhool jaata hai aur Allah ta’ala ke shareek muqarrar karne lagta hai, jis se (auro ko bhi) us ki raah se behkaaye, aap keh dijiye! ke apne kufr ka faayeda kuch din aur uthaalo (aaqir) tu dozakhiyo mein hone waala hai

bhala jo shaqs raatho ke auqaath sajde aur qayaam ki haalath mein (ibaadath mein) guzaarta ho, aaqirath se darta ho aur apne rab ki rahmath ki ummid rakhta ho (aur jo us ke bar aks ho, baraabar ho sakte hai) bataao to ilm waale aur kya be ilm baraabar ke hai? yaqinan nasihath wahi haasil karte hai, jo aqal mandh ho (apne rab ki taraf se)

keh do ke aye mere imaan waale bandho! apne rab se darte raho, jo is dunya mein neki karte hai, un ke liye nek badhla hai aur Allah ta’ala ki zameen bahuth kushaada hai, sabr karne waalo hee ko, un ka pura pura be-shumaar ajr diya jaata hai

aap keh dijiye! ke mujhe hukm diya gaya hai ke Allah ta’ala ki is tarah ibaadath karo ke osi ke liye ibaadath ko qaalis karlo

aur mujhe hukm diya gaya hai ke main sab se pehla farma bardaar ban jaao

keh dijiye! ke main to qaalis kar ke sirf apne rab hee ki ibaadath karta hoon

tum us ke siva jis ki chaaho ibaadath karte raho, keh dijiye ke haqiqi ziya kaar wo hai jo apne aap ko aur apne ahal ko qayaamath ke din nuqsaan mein daal denge, yaad rakho ke khullam khulla nuqsaan yahi hai

unhe niche upar se aag ke (shule misl) saayebaan (ke) dhaank rahe honge, yahi (azaab) hai, jin se Allah ta’ala apne bandho ko dara raha hai, aye mere bandho! pas mujh se darte raho

aur jin logo ne taghooth ki ibaadath se parhez kiya aur (hama tan) Allah ta’ala ki taraf mutawajje rahe, wo khush qabri ke mustaheq hai, mere bandho ko khush qabri suna di jiye

jo baath ko kaan laga kar sunte hai, phir jo behetreen baath ho, us ki itteba karte hai, yahi hai jinhe Allah ta’ala ne hidaayath ki hai aur yahi aqal mandh bhi hai

bhala jis shaqs par azaab ki baath saabith ho choki hai, to kya aap ose jo dozakh mein hai chohda sakte hai

haan wo log jo apne rab se darte rahe, un ke liye baala khaane hai, jin ke upar bhi, bane banaaye bala khaane hai (aur) un ke niche nehre beh rahi hai, rab ka waada hai, aur wo waada qilaafi nahi karta

kya aap ne nahi dekha ke Allah ta’ala asmaan se paani utaarta hai aur ose zameen ki sutho mein pahonchaata hai, phir osi ke zariye se muqtalif qism ki khetiyaa ugaata hai, phir wo khushk ho jaati hai aur aap unhe zardh rang dekhte hai, phir unhe reza reza kar deta hai, us mein aqal mandho ke liye bahuth zyaada nasihath hai

kya wo shaqs jis ka seena Allah ta’ala ne Islaam ke liye khol diya hai, pas wo apne parvardigaar ki taraf se ek noor par hai aur halaaki hai un par jin ke dil yaade ilaahi se (asar nahi lete balke) saqth ho gaye hai, ye log sarih gumraahi mein (mubtela) hai

Allah ta’ala ne behetreen kalaam naazil farmaya hai, jo aisi kitaab hai, ke aapas mein milti jhulti aur baar baar duhraayi hoyi aayato ki hai, jis se un logo ke romte khade ho jaate hai, jo apne rab ka khauf rakhte hai, aaqir mein un ke jism aur dil Allah ta’ala ke zikr ki taraf narm ho jaate hai, ye hai Allah ta’ala ki hidaayath, jis ke zariye jise chaahe raahe raasth par laga deta hai aur jise Allah ta’ala hee raah bhula de, us ka haadi koyi nahi

bhala jo shaqs qayaamath ke din ke, badh-tareen azaab ki suphar (dhaal) apne mu ko banaayega, (aise) zaalimo se kaha jayega ke apne kiye ka (wabaal) chako

un se pehle waalo ne bhi jhhutlaaya, phir un par wahaa se azaab aa pada, jahaa se un ko qayaal bhi na tha

aur Allah ta’ala ne unhe zindagani dunya mein ruswaayi ka maza chakaya aur abi aaqirath ka to bada bhaari azaab hai, kaash ke ye log samajh le

aur yaqinan hum ne is Qur’aan mein logo ke liye har qism ki misaale bayaan kardi hai, kya ajab ke wo nasihath haasil karle

Qur’aan hai arabi mein jis mein koyi kaji nahi ho sakta hai, ke wo parhezgaari eqtiyaar karle

Allah ta’ala misaal bayaan farma raha hai, ek wo shaqs jis mein bahuth se baaham zidh rakhne waale saajhi hai aur dosra wo shaqs, jo sirf ek hee ka ghulaam hai, kya ye duno sifath mein yeksa hai, Allah ta’ala hee ke liye sab tareefe hai, baath ye hai ke un mein se aksar log samajhte nahi

yaqinan khud aap ko bhi mauth ayegi aur ye sab bhi marne waale hai

phir tum sab ke sab qayaamath ke din apne rab ke saamne jhagdoge

us se bad kar zaalim kaun hai, jo Allah ta’ala par jhoot bole? aur saccha deen jab us ke paas aaye to ose jhuta bataaye? kya aise kuffaar ke liye jahannam thikaana nahi hai

aur jo sacche deen ko laaye aur jis ne us ki tasdeeq ki, yahi log paarsa1 hai

un ke liye un ke rab ke paas (har) wo cheez hai, jo ye chaahe, nek logo ka yahi badhla hai

ta ke Allah ta’ala un se un ke bure amalo ko door karde aur jo nek kaam unhone kiye hai, un ka accha badhla ataa farmaaye

kya Allah ta’ala apne bandhe ke liye kaafi nahi? ye log aap ko Allah ke siva auro se dara rahe hai aur jise Allah gumraah karde, us ki rehnumaayi karne waala koyi nahi

aur jise wo hidaayath de, ose koyi gumraah karne waala nahi, kya Allah ta’ala ghaalib aur badhla lene waala nahi hai

agar aap un se puche ke asmaan aur zameen ko kis ne paida kiya hai? to yaqinan wo yahi jawaab denge, ke Allah ne, aap un se kahiye ke accha ye to bataao, jinhe tum Allah ke siva pukaarte ho, agar Allah ta’ala mujhe nuqsaan pahonchaana chaahe to, kya ye us ke nuqsaan ko hata sakte hai? ya Allah ta’ala mujh par meherbaani ka iraada kare, to kya ye us ki meherbaani ko rok sakte hai? aap kehde ke Allah mujhe kaafi hai, tawakkal karne waale osi par tawakkal karte hai

keh dijiye ke aye meri khaum! tum apni jageh par amal kiye jaao, main bhi amal kar raha hoon, abhi abhi tum jaan loge

ke kis par ruswa karne waala azaab aata hai aur kis par daayimi maar aur hameshgi ki saza hoti hai

aap par hum ne haq ke saath ye kitaab logo ke liye naazil farmaayi hai, pas jo shaqs raahe raasth par aa jaaye, us ke apne liye nafa hai aur jo gumrah ho jaaye, us ki gumraahi ka (wabaal) osi par hai, aap un ke zimme daar nahi

Allah hee ruho ko un ki mauth ke waqth aur jin ki mauth nahi aayi unhe un ke neendh ke waqt qabz kar leta hai, phir jin par mauth ka hukm lag chuka hai, unhe to rok leta hai aur dosri (ruho) ko ek muqarrar waqt tak ke liye chohd deta hai, ghaur karne waalo ke liye us mein yaqinan bahuth si nishaaniya hai

kya un logo ne Allah ta’ala ke siva auro ko sifaarishi muqarrar kar rakha hai? aap keh dijiye! ke go wo kuch bhi eqtiyaar na rakhte ho, aur na aqal rakhte ho

keh dijiye! ke tamaam sifaarish ka muqtaar Allah hee hai, tamaam asmaano aur zameen ka raaj osi ke liye hai, tum sab osi ki taraf phere jaoge

jab Allah akele ka zikr kiya jaaye to un logo ke dil nafrath karne lagte hai, jo aaqirath ka yaqeen nahi rakhte, aur jab us ke siva (aur ka) zikr kiya jaaye to un ke dil, khol kar khush ho jaate hai

aap keh dijiye! ke aye Allah! asmaano aur zameen ke paida karne waale, chupe khule ke jaanne waale, tu hee apne bandho mein un umoor ka faisla farmaayega, jin mein wo ulajh rahe thein

agar zulm karne waalo ke paas wo sab kuch ho, jo roye zameen par hai aur us ke saath utna hee aur ho, to bhi badh tareen saza ke badhle mein qayaamath ke din ye sab kuch de de aur un ke saamne Allah ki taraf se wo zaahir hoga, jis ka gumaan bhi unhe na tha

jo kuch unhone kiya tha, us ki buraiya, un par khul padengi aur jis ka wo mazaaq karte thein, wo unhe aa gherega

insaan ko jab koyi takleef pahonchti hai to hamein pukaarne lagta hai, phir jab hum ose apni taraf se koyi nemath ata farmade to kehne lagta hai ke, ise to main mahez apne ilm ki wajeh se diya gaya hoon, balke ye azmaayesh hai, lekin un mein aksar log be ilm hai

un se agle bhi yahi baath keh chuke hai, pas un ki karwaayi un ke kuch kaam na aayi

phir un ki tamaam buraiya un par aa padi aur un mein se bhi, jo gunehgaar hai, un ki, ki hoyi buraiya bhi ab un par aa padengi, ye (hame) hara dene waale nahi

kya unhe ye maloom nahi ke Allah ta’ala jis ke liye chaahe, rozi kushaada kar deta hai aur tang (bhi), imaan laane waalo ke liye is mein (badi badi) nishaaniya hai

(meri jaanib se) kehdo ke aye mere bandho! jinhone apni jaano par zyaadati ki hai, tum Allah ki rahmath se na ummidh na ho jaao, bil yaqeen Allah ta’ala saare gunaaho ko baqsh deta hai, waqeyi wo badi baqshish badi rahmath waala hai

tum (sab) apne parvardigaar ki taraf jhuk pado aur us ki hukm bardaari kiye jaao, us se qabl ke tumhaare paas azaab aa jaaye aur phir tumhaari madad na ki jaaye

aur pairvi karo, us behetreen cheez ki, jo tumhaari taraf tumhaare parvardigaar ki taraf se naazil ki gayi hai, us se pehle ke tum par achaanak azaab aa jaaye aur tumhe ittela bhi na ho

(aisa na ho ke) koyi shaqs kahe, haay afsoos us baath par ke main ne Allah ta’ala ke haq mein ko-taahi ki, balke main to mazaaq udaane waalo mein hee raha

ya kahe ke agar Allah mujhe hidaayath karta to main bhi paarsa logo mein hota

ya azaab ko dekh kar kahe, kaash ke kisi tarah mera laut jaana hota, to main bhi neko kaaro mein ho jaata

haan (haan) beshak tere paas meri aayate pahonch chuki thi, jinhe tu ne jhutlaaya aur ghuroor aur takabbur kiya aur tu tha hee kaafiro mein

aur jin logo ne Allah par jhoot baandha hai, to aap dekhenge ke qayaamath ke din un ke chere siyaah ho gaye honge. kya takabbur karne waalo ka thikaana jahannam mein nahi

aur jin logo ne parhezgaari ki, unhe Allah ta’ala un ki kamyaabi ke saath bacha lega, unhe koyi dukh, chu bhi na sakega aur na wo kisi tarah ghamgeen honge

Allah har cheez ka payda karne waala hai aur wahi har cheez par nigehbaan hai

asmaano aur zameen ki konjiyo ka maalik wahi hai, jin jin logo ne Allah ki aayato ka inkaar kiya, wahi qasaara paane waale hai

aap keh dijiye aye jaahilo! kya tum mujh se Allah ke siva auro ki ibaadath ko kehte ho

yaqinan teri taraf bhi aur tujh se pehle (ke tamaam nabiyo) ki taraf bhi wahi ki gayi hai, ke agar tu shirk kiya to bila shuba tera amal zaaya ho jayega aur bil yaqeen to ziya kaaro2 mein se ho jayega

balke tu Allah hee ki ibaadath kar aur shukr karne waalo mein se ho ja

aur un logo ne jaisi qadr Allah ta’ala ki karni chahiye thi, nahi ki, saari zameen qayaamath ke din us ki motthi mein hogi aur tamaam asmaan us ke daahne haath mein lipte hoye honge, wo paak aur bartar hai, har us cheez se jise log us ka shareek banaaye

aur soor phook diya jayega, pas asmaano aur zameen waale sab be hosh ho kar gir padenge, magar jise Allah chaahe, phir dubaara soor phoka jayega, pas wo ek dam khade ho kar dekhne lag jayenge

aur zameen apne parvardigaar ke noor se jagmaga uthegi, naame amaal haazir kiye jayenge, nabiyo aur gawaaho ko laaya jayega aur logo ke darmiyaan haq haq faisle kar diye jayenge aur wo zulm na kiye jayenge

aur jis shaqs ne jo kuch kiya hai, bharpoor de diya jayega, jo kuch log kar rahe hai, wo ba qoobi jaanne waala hai

kaafiro ke ghaul ke ghaul jahannam ki taraf hankaaye jayenge, jab wo us ke paas pahonch jayenge, us ke darwaaze un ke liye khol diye jayenge aur wahaan ke nigehbaan un se sawaal karenge ke, kya tumhaare paas tum mein se rasool nahi aaye thein? jo tum par tumhaare rab ki aayate padte thein aur tumhe is din ki mulaqaath se daraate thein? ye jawaab denge ke haan durusth hai lekin azaab ka hukm kaafiro par saabith ho gaya

kaha jayega ke ab jahannam ke darwaazo mein dakhil ho jaao, jahaan hamesha rahenge, pas sarkasho ka thikaana bahuth hee bura hai

aur jo log apne rab se darte thein, un ke gruh ke gruh jannath ki taraf rawaana kiye jayenge, yahaa tak ke jab us ke paas aa jayenge aur darwaaze qol diye jayenge aur wahaa ke nigehbaan un se kahenge, tum par salaam ho, tum khush haal raho, tum us mein hamesha ke liye chale jaao

ye kahenge ke Allah ka shukr hai, jis ne hum se apna waada pura kiya aur hamein is zameen ka waaris bana diya, ke jannath mein jahaa chaahe muqaam kare, pas amal karne waalo ka kya hee accha badhla hai

aur tu farishto ko Allah ke arsh ke irdh girdh halqa baandhe hoye, apne rab ki hamd wa tasbih karte hoye dekhega aur un mein insaaf ka faisla kiya jayega aur keh diya jayega ke saari qoobi Allah hee ke liye hai, jo tamaam jahaano ka paalanhaar hai