Urdu - Chapter 51 - Adh-Dhariyat

qasam hai bhikerne waaliyo ki uda kar

phir uthaane waaliya bojh ko

phir chalne waaliya narmi se

phir kaam ko taqseem karne waaliya

yaqeen maano ke tum se jo waade kiye jaate hai (sab) sacche hai

aur beshak insaaf hone waala hai

qasam hai raaho waale asmaan ki

yaqinan tum muqtalif baath mein pade hoye ho

us se wahi baaz rakha jaata hai jo pher diya gaya ho

be’sanadh batein karne waale ghaarath kar diye gaye

jo ghaflath mein hai aur bhole hoye hai

pochte hai ke yaume jaza kab hoga

haan ye wo din hai ke ye aag par tapaaye jayenge

apni fitna pardaazi ka maza chako, yahi hai jis ki tum jaldi macha rahe thein

beshak taqwa waale log bahishto aur chashmo mein honge

un ke rab ne jo kuch unhe ata farmaya hai, ose le rahe honge, wo to us se pehle hee neko kaar thein

wo raath ko bahuth kam soya karte thein

aur waqte sahar esteghfaar kiya karte thein

aur un ke maal mein maangne waalo ka aur sawaal se bachne waalo ka haq tha

aur yaqeen waalo ke liye to zameen mein bahuth si nishaaniya hai

aur khud tumhaari zaath mein bhi, to kya tum dekhte nahi ho

aur tumhaari rozi aur jo tum se waada kiya jaata hai, sab asmaan mein hai

asmaan wa zameen ke parvardigaar ki qasam! ke ye bilkul bar haq hai, aisa hee jaise ke tum batein karte ho

kya tujhe Ibraheem(alaihissalaam) ke mauzzaz mehmaano ki qabar bhi pahonchi hai

wo jab un ke haan aaye to salaam kiya, Ibraheem(alaihissalaam) ne jawaabe salaam diya (aur kaha ye to) ajnabi log hai

phir (chup chaap jaldi jaldi) apne ghar waalo ki taraf gaye aur ek farba bachde (ka goshth) laaye

aur ose un ke paas rakha aur kaha aap khaate kyo nahi

phir to dil hee dil mein un se khauf zada ho gaye, unhone kaha aap khauf na ki jiye aur unhone us (hazrath Ibraheem(alaihissalaam) ko ek ilm waale ladke ki bashaarath di

pas un ki biwi aage badi aur hayrath mein aa kar apne mu par haath maar kar kaha ke main to budhiya hoon aur saath hee baanjh

unhone kaha haan tere parvardigaar ne isi tarah farmaaya hai, beshak wo hakeem aur aleem hai

hazrath Ibraheem(alaihissalaam) ne kaha ke Allah ke bheje hoye (farishto) tumhaara kya maqsadh hai

unhone jawaab diya ke hum gunehgaar khaum ki taraf bheje gaye hai

ta ke hum un par mitthi ke kankar barsaaye

pas jitne imaan waale wahaa thein, hum ne unhe nikaal liya

aur hum ne wahaa musalmaano ka sirf ek hee ghar paaya

aur wahaa hum ne un ke liye jo dardnaak azaab ka dar rakhte hai ek (kaamil) alaamath chohdi

Mosa(alaihissalaam) ke qisse mein (bhi hamaari taraf se tambi hai) ke hum ne ose feraun ki taraf kholi daleel de kar bheja

pas us ne apne bal bothe par mu moda aur kehne laga ye jaadugar hai ya deewana hai

bil aaqir hum ne ose aur us ke lashkaro ko apne azaab mein pakad kar darya mein daal diya, wo tha hee malaamath ke qaabil

isi tarah aadiyo me bhi (hamaari taraf se tambi hai) jab ke hum ne un par khair wa barkath se khaali aandhi bheji

wo jis jis cheez par girti thi, ose bosidha haddi ki tarah (chora chora) kar deti thi

aur samoodh (ke qisse) mein bhi (ibrath) hai jab un se kaha gaya ke tum kuch dino tak fayeda utha lo

lekin unhone apne rab ke hukm se sartaabi ki, jis par un ke dekhte dekhte (tez wa tundh) kadaake ne halaak kar diya

pas na to wo khade ho sa ke aur na badhla le sa ke

aur Nuh(alaihissalaam) ki khaum ka bhi is se pehle (yahi haal ho chuka tha), wo bhi bade na farmaan log thein

asmaan ko hum ne (apne) haatho se banaya hai aur yaqinan hum kushaadgi karne waale hai

aur zameen ko hum ne farsh bana diya hai, pas hum bahuth hee acche bichaane waale hai

aur har cheez ko hum ne joda joda payda kiya hai, ta ke tum nasihath haasil karo

pas tum Allah ki taraf daud bhaag (yaani rujo) karo, yaqinan main tumhe us ki taraf se saaf saaf tambi karne waala hoon

aur Allah ke saath kisi aur ko maboodh na tehraao, beshak main tumhe us ki taraf se khula daraane waala hoon

isi tarah jo log un se pehle guzre hai, un ke paas jo bhi rasool aya, unhone keh diya ke ya to ye jaadugar hai ya deewana hai

kya ye is baath ki ek dosre ko wasiyath karte gaye hai

(nahi) balke ye sab ke sab sarkash hai, to aap un se mu pher le,aap par koyi malaamath nahi

aur nasihath karte rahe, yaqinan ye nasihath imaan waalo ko nafa degi

main ne jinnaath aur insaano ko mahez isi liye payda kiya hai ke wo sirf meri ibaadath kare

na main un se rozi chahta hoon, na meri ye chaahath hai ke ye mujhe khilaaye

Allah ta’ala to khud hee sab ka rozi rasa, tawanaayi waala aur zoor aawar hai

pas jin logo ne zulm kiya hai, unhe bhi un ke saathiyo ke hisse ke misl, hissa milega, lehaza wo mujh se jaldi talab na kare

pas qaraabi hai munkiro ko un ke us din ki jis ka waada diye jaate hai