Urdu - Chapter 70 - Al-Maarij

ek sawaal karne waale ne us azaab ka sawaal kiya, jo waazeh hone waala hai

kaafiro par jise koyi hataane waala nahi

jis ki taraf farishte aur ruh chadte hai, ek din mein jis ki meqdaar pachaas hazaar saal ki hai

pas tu acchi tarah sabr kar

beshak ye us (azaab) ko door samajh rahe hai

aur hum ose qareeb dekhte hai

jis din asmaan misl tel ki til chat ke ho jayega

aur pahaad misl rangeen oon ke ho jayenge

aur koyi dosth kisi dosth ko na pochega

(halaan ke) ek dosre ko dikha diye jayenge, gunahgaar us din ke azaab ke badhle fidye mein apne beto ko

apni biwi ko aur apne bhai ko

aur apne kumbe ko jo ose panaah deta tha

aur roye zameen ke sab logo ko dena chahega, ta ke ye ise najaath dila de

(magar) har giz ye na hoga, yaqinan wo shole waali (aag) hai

jo mu aur sar ki khaal khinch laane waali hai

wo har us shaqs ko pukaaregi jo piche hat ta aur mu modta hai

aur jama kar ke sambhaal rakhta hai

beshak insaan bade kacche dil waala banaya gaya hai

jab ose musibath pahonchti hai to had bada uthta hai

aur jab raahath milti hai to buql karne lagta hai

magar wo namaazi

jo apni namaaz par hameshgi karne waale hai

aur jin ke maalo mein muqarrara hissa hai

maangne waalo ka bhi aur sawaal se bachne waalo ka bhi

aur jo insaaf ke din par yaqeen rakhte hai

aur jo apne rab ke azaab se darte rehte hai

beshak un ke rab ka azaab be khauf hone ki cheez nahi

aur jo log apni sharam-gaaho ki (haraam se) hifaazath karte hai

haan un ki biwiyo aur laundiyo ke baare mein, jin ke wo maalik hai, unhe koyi malaamath nahi

ab jo koyi us ke alaawa (raah) dhundega to aise log hadh se guzar jaane waale honge

aur jo apni amaanato ka aur apne khaul wa qaraar ka paas rakhte hai

aur jo apni gawaahiyo par sidhe aur qaayam rehte hai

aur jo apni namaazo ki hifaazath karte hai

yahi log jannato mein izzath waale honge

pas kaafiro ko kya ho gaya hai ke wo teri taraf daudte aate hai

daaye aur baaye se gruh ke gruh

kya un mein se har ek ki tawaqqe ye hai ke wo nemato waali jannath mein daakhil kiya jayega

(aisa) har giz na hoga, hum ne unhe us cheez se payda kiya hai jise wo jaante hai

pas mujhe qasam hai mashriqo aur maghribo ke rab ki, (ke) hum yaqinan qaadir hai

us par ke us ke ewaz, un se acche log le aaye, aur hum aajiz nahi hai

pas tu unhe jhagadta khelta chohd de, yahaa tak ke ye apne us din se ja mile, jis ka un se waada kiya jaata hai

jis din ye qabro se daudte hoye niklenge, goya ke wo kisi jageh ki taraf tez tez ja rahe hai

un ki aankhe jhuki hoyi hogi, un par zillath cha rahi hogi, ye hai wo din jis ka un se waada kiya jaata tha