Urdu - Chapter 52 - At-Tur

Qasam hai toor ki

Aur likhi hui kitab ki

Jo jhilli kay khulay huye warq mein hai

Aur abad ghar ki

Aur unchi chat ki

Aur bharkaye huye samandar ki

Be-shak app kay rab ka azab hoker rehnay wala hai

Ussay koi rokney wala nahi

Jiss din aasman thar tharaney lagay ga

Aur pahaar chalney phirney lagen gey

uss din jhutlaney walon ki (poori) kharabi hai

Jo apni behuda goee mein uchal kood ker rahey hain

Jiss din woh dhakkay dey ker aatish jahannam ki taraf laye jayen gey

Yehi wohi aatish dozakh hai jissay tum jhoot batlatey thay

(Abb batao) kiya yeh jadoo hai? ya tum dekhtay hi nahi ho

Jao dozakh mein abb tumhara sabar kerna aur na kerna tumharay liye yaksan hai tumhein faqat tumharay kiye ka badla diya jayega

Yaqeenan perhezgar log jannaton mein aur nematon mein hain

Jo unhen unkay rab ney dey rakhi hain uss per khush khush hain aur unkay perwerdigar ney unhen jahannam kay azab say bhi bacha liya hai

Tum mazay say khatay peetay raho inn aemaal kay badlay jo tum kertay thay

Baraber bichay huye shandar takhtay per takkiye lagaye huye aur hum ney unkay nikkah bari bari aankhon wali(hooron) say kerdiye hain

Aur jo log eman laye aur unki olad ney bhi eman mein unki perwi ki hum unki olad ko unntak phoncha dengey aur unkay amal say hum kuch kum na keren gey.her shaks apney aemaal ka girwi hai

Hum unkay liye meway aur marghoob gosht ki rail pail kerden gey

Aur unkay gird unkay no-umer ghulam chal phir rahey hongey goya kay woh moti thay ji dhakay rakhay thay

Aur aapas mein aik doosray ki taraf mutawajja hoker sawal kerengey

kahen gey iss say pehlay hum apney ghar walon kay dar miyan boht dara kertay thay

Pus Allah taalaa ney hum per bara ehsan kiya aur humen tez-o-tund garum hawaon kay azab say bacha liya

Hum iss say pehlay hi uss ki ibadat kiya kertay thay be-shak woh mohsin aur meharban hai

To aap samjhatay rahen kiyoh kay app apney rab kay fazal say na to kaahin hain na deewana

Kiya kafir yun kehtay hain kay yeh shaeer hai hum iss per zamaney kay hawadis (yani mot) ka intezar ker rahey hain

Keh dijiye! tum muntazir raho mein bhi tumharay sath intezar kernay walon mein hun

Kiya inki aqlen enhen yehi sikhati hain? ya yeh log hi sirkash hain

Kiya yeh kehtay hain kay iss nabi ney khud qharh liya hai waqya yeh hai kay woh eman nahi latey

Acha agar yeh sachay hain to bhala iss jaisi aik (hi) baat yeh (bhi) to ley aayen

Kiya yeh baghair kissi(peda kernay walay) kay khud ba khud peda hogaye hain? ya yeh khud peda kernay walay hain

Kiya inhon ney hi aasman aur zamin ko peda kiya hai? bulkay yeh yaqeen na kernay walay log hain

ya kiya inkay pass teray rab kay khazaney hain?ya (in khazanon kay) yeh darogha hain

Ya kiya inkay pass koi seerhi hai jiss per charh ker suntay hain?(agar aisa hai) to inka sunnay wala koi roshan daleel pesh keray

Kiya Allah ki to sab larkiyan hain aur tumharay han larkay hain

Kiya tu inn say koi ujrat talab kerta hai kay yeh uskay tawaan say bojhal ho rahey hain

Kiya inkay pass ilm-e-gheeib hai jissay yeh likh letay hain

Kiya yeh log koi fareb kerna chahtay hain? to yaqeen kerlen kay fareeb khordah kafir hi hain

Kiya Allah kay siwa inka koi mabood hai? (hergiz nahi) Allah taalaa inkay shirk say pak hai

Agar yeh log aasman kay kissi tukray ko girta hua dekhlen tab bhi yeh keh den key yeh teh-ba-teh badal hai

Tu enhen chor dey yahan tak kay enhen uss din say sabiqa paray jiss mein yeh beyhosh kerdiye jayen gey

Jiss din enhen inka makar kuch kaam na dey ga aur na woh madad kiye jayen gey

Be-shak zalimon kay liye iss kay ilawa aur azab bhi hain lekin inn logon mein say aksar bey-ilm hain

Tu apney rab kay hukum kay intezar kein sabar say kaam ley be-shak tu humari aankhon kay samney hai subah ko jab tu uthay apney rab ki paki aur hamd biyan ker

Aur raat ko bhi usski tasbeeh parh aur sitaron kay doobtay waqt bhi