Urdu - Chapter 54 - Al-Qamar

Qayamat qareeb agaee aur chand phat gaya

Yeh agar koi mojzza dekhtay hain to mun pher letay hain aur kehdetay hain. kay yeh pehlay say chala aata hua jadoo hai

inhon ney jhutlaya aur apni khuwaishon ki pairwi ki aur her kaam theray huye waqt per muqarrar hai

yaqeenan inn kay pass woh khabren aa chuki hain jin mein dant dapat (ki naseehat) hai

Aur kamil aqal ki baat hai lekin in darawni baaton ney bhi kuch faeedah na diya

Pus (aey nabi) tum inn say aeyraaz kero jiss din aik pukarnay wala nagawaar cheez ki taraf pukaray ga

yeh jhuki aankhon qabron say iss tarah nikal kharay hongay kay goya woh phela hua taddi dal hai

Pukarnay walay ki taraf dortay hongay aur kafir kahengey yeh din to boht sakht hai

Inn say pehlay qom-e-nooh ney bhi humaray banday ko jhulaya tha aur deewana batla ker jhirak diya gaya tha

Pus uss ney apney rab say dua ki kay mein beybus hun tu meri madad ker

Pus hum ney aasman kay darwazon ko zor kay menh say khol diya

Aur zamin say chashmon ko jaari kerdiya pus uss kaam kay liye jo muqaddar kiya gaya tha (dono) paani jama hogaye

Aur hum ney issay takhton aur keelon wali (kashti) per sawar kerliya

Jo humari aankhon kay samnay chal rahi thi badla uss ki taraf say jiss ka kufur kiya gaya tha

Aur be-shak hum ney iss waqaey ko nishani bana ker baqi rakha pus koi hai naseehat hasil kerney wala

Batao mera azab aur meri daraney wali baaten kaisi rahen

Aur be-shak hum ney quran ko samajhney kay liye aasan kerdiya hai pus kiya koi naseehat hasil kerney wala hai

Qom-e-aad ney bhi jhutlaya pus kaisa hua mera azab aur meri daraney wali baten

Hum ney unn per tez-o-tund musalsal chalney wali hawa aik peham manhoos din mein bhej di

Jo logon ko utha utha ker dey patakhti thi goya kay woh jarr say katey huye khajoor kay taney hain

Pus kaisi rahi meri saza aur mera darana

Yaqeenan hum ney quran ko naseehat kay liye aasan kerdia hai pus kiya koi hai naseehat hasil kerney wala

Qom-e-samood ney daraney walon ko jhutlaya

Aur kehney lagay kiya humi mein say aik shaks ki hum farmanbardaari kerney lagen? tab to hum yaqeenan ghalati aur deewangi mein paray huye hongey

Kiya humaray sab kay darmiyan sirf issi per wahi utaari gaee nahi bulkay woh jhoota shekhi khor hai

Abb sab jaan lengey kal ko kay kon jhoota aur shekhi khor tha

Be-shak hum unki aazmaeesh kay liye untni bhejen gey pus (aey saleh) tu inka muntazir reh aur sabar ker

Han enhen khabar kerdey kay paani in mein taqseem shuda hai her aik apni baari per hazir hoga

Unhon ney apney sathi ko awaz di jiss ney (untni per) waar kiya aur (uss ki) kochen kaat den

Pus kiyon ker hua mera azab aur mera darana

Hum ney unn per aik cheekh bheji pus aisay hogaye jaisay baar bananay walay ki rondhi hui ghaas

Aur hum ney naseehat kay liye quran ko aasan kerdia hai pus kiya hai koi jo naseehat qabool keray

Qom-e-Loot ney bhi daraney walon ki takzeeb ki

Be-shak hum ney unn per pathar barsaney wali hawa bheji siwaye loot(alh-e-salam) kay ghar walon kay waqt nijat deydi

Apney ehsan say her her shukarguzaar ko hum issi tarah badla detay hain

Yaqeenan loot (alh-e-salam) ney unhen humari pakar say daraya tha lekinunhon ney daraney walon kay baray mein (shak-o-shuba aur) jhagra kiya

Aur inn loot (alh-e-salam) ko unkay mehmanon kay baray mein phuslaya pus hum ney unki aankhen andhi kerden (aur kehdia) mera azab aur mera darana chakho

Aur yaqeeni baat hai kay unhen subah saweray hi aik jagah pakarney walay muqarra azab ney ghaarat kerdia

Pus meray azab aur meray darawey ka maza chakho

Aur firaoniyon kay pass bhi daraney walay aaye

Unhon ney humari tamamnishaniyan jhutlayen pus hum ney unhen baray ghalib qavi pakarney walay ki tarah pakar liya

(Aey qureshiyo!) kiya tumharay kafir inn kafiron say kuch behtar hain? ya tumharay liye agli kitabon mein chutkara likha hua hai

Ya yeh kehtay hain kay hum ghalba panay wali janat hain

Unqareeb yeh jamat shikast di jayegi aur peeth deyker bhagey gi

Bulkay qayamat ki ghari unkay waday kay waqt hai aur qayamat bari sakht aur kerwi cheez hai

Be-shak gunehgaar gumrahi mein aur azab mein hain

Jiss din woh apney mun kay bal aag mein ghaseetay jayen gey.(aur unn say kaha jayega) dozakh ki aag lagney kay mazay chakho

Be-shak hum ney her cheez ko aik (muqarra) andazay per peda kia hai

Aur humara hukum sirf aik dafa (ka aik kalma) hi hota hai jaisey aankh ka jhapakna

Aur hum ney tum jaisey bohteron ko halak kerdia hai pus koi hai naseehat lenay wala

Jo kuch enhon ney (aemaal) kiye hain sab naam-e-aemaal mein likhay huye hain

(Issi tarah) her choti bari baat bhi likhi hui hai

Yaqeenan humara darr rakhney walay jannaton aur neharon mein hongay

Raasti aur izzat ki bethak mein qudrat walay badshah kay pass