Urdu - Chapter 69 - Al-Haqqah

وہ ہو کر رہنے والی

کیا ہے وہ ہو کر رہنے والی

اور اے مخاطب تم کیا سمجھو وہ ہو کر رہنے والی کیا ہے

پس ثمود تو انہیں ہلاک کر دیا گیا سخت چنگھاڑ سے

رہے عاد تو انہیں برباد کردیا گیا آندھی سے جو سخت سرد، بےحد تند تھی

اللہ نے مسلط کردیا اسے ان پر (مسلسل) سات رات اور آٹھ دن تک جو جڑوں سے اکھیڑنے والی تھی تو تو دیکھتا قوم ِ عاد کو ان دنوں کہ وہ گرے پڑے ہیں گویا وہ مڈھ ہیں کھوکھلی کھجور کے

کیا تمہیں نظر آتا ہے ان کا کوئی باقی ماندہ فرد

اور فرعون اور جو اس سے پہلے تھے اور الٹائی جانے والی بستیوں کے باشندوں نے غلطی کا ارتکاب کیا

پس انہوں نے نافرمانی کی اپنے رب کے رسولوں کی تو اللہ نے پکڑ لیا انہیں بڑی سختی سے

ہم نے جب سیلاب حد سے گزر گیا تو تمہیں کشتیوں میں سوار کردیا

تاکہ ہم بنادیں اس واقعہ کو تمہارے لیے یادگار اور محفوظ رکھیں اسے یاد رکھنے والے کان

پھر جب پھونک مار دی جائے گی صور میں ایک بار

اور زمین اور پہاڑوں کو اٹھا کر دفعۃً چور چور کردیا جائے گا

تو اس روز ہونے والا واقعہ ہوجائے گا

اور آسمان پھٹ پڑے گا تو وہ اس دن بالکل بو دا ہوگا

اور فرشتے اس کے کناروں پر مقرر کردیے جائیں گے اور آپ کے رب کے عرش کو اس روز اپنے اوپر آٹھ فرشتوں نے اٹھا رکھا ہوگا

وہ دن جب تم پیش کیے جاؤ گے تمہارا کوئی راز پوشیدہ نہ رہے گا

پس جس کو دے دیا گیا اس کا نامۂ عمل دائیں ہاتھ میں تو وہ (فرط مسرت سے) کہے گا لو پڑھو میرا نامۂ عمل

مجھے یقین تھا کہ میں اپنے حساب کو پہنچوں گا

پس یہ ( خوش نصیب) پسندیدہ زندگی بسر کرے گا

عالیشان جنت میں

جس کے خوشے جھکے ہوں گے

(اذن ملے گا) کھاؤ اور پیو مزے اڑا ؤ یہ ان اعمال کا اجر ہے جو تم نے آگے بھیج دیے گزشتہ دنوں میں

اور جس کو دیا جائے گا اس کا نامہ عمل بائیں ہاتھ میں وہ کہے گا اے کاش ! مجھے نہ دیا جاتا میرا نامۂ عمل

اور میں نہ جانتا میرا حساب کیا ہے

اے کاش! موت نے ہی (میرا) قصہ پاک کردیا ہوتا

آج میرا مال میرے کسی کام نہ آیا

میری بادشاہی بھی فنا ہوگئی

(فرشتوں کو حکم ہوگا) پکڑ لو اس کو اور اس کی گردن میں طوق ڈال دو

پھر اسے دوزخ میں جھونک دو

پھر ستر گز لمبے زنجیر میں اس کو جکڑ دو

بے شک یہ ( بدبخت ) ایمان ن ہں لایا تھا اللہ پر جو بزرگ (وبرتر) ے

اور نہ ترغیب دیتا تھا مسکین کو کھانا کھلانے کی

پس آج یہاں اس کا کوئی دوست نہیں

اور نہ کوئی طعام بجز پیپ کے

جسے کوئی نہیں کھاتا بجز خطاکاروں کے

پس میں قسم کھاتا ہوں ان چیزوں کی جنہیں تم دیکھتے ہو

اور جنہیں تم نہیں دیکھتے

بے شک یہ قول ہے ایک عزت والے رسول کا

اور یہ کسی شاعر کا کلام نہیں (لیکن) تم بہت کم ایمان لاتے ہو

اور نہ ہی یہ کسی کاہن کا قول ہے ۔ تم لوگ بہت کم توجہ کرتے ہو

بلکہ یہ نازل شدہ ہے رب العالمین کا

اگر وہ خود گھڑ کر بعض باتیں ہماری طرف منسوب کرتا

تو ہم اس کا دایاں ہاتھ پکڑ لیتے

پھر ہم کاٹ دیتے اس کی رگِ دل

پھر تم میں سے کوئی بھی (ہمیں) اس سے روکنے والا نہ ہوتا

اور بےشک یہ تو ایک نصیحت ہے پرہیزگاروں کے لیے

اور ہم خوب جانتے ہیں کہ تم میں سے بعض جھٹلانے والے ہیں

اور یہ بات باعث حسرت ہوگی کفار کے لیے

اور بےشک یہ یقینا حق ہے

پس (اے حبیب! ) آپ تسبیح کیا کریں اپنے رب کی جو عظمت والا ہے