Urdu - Chapter 77 - Al-Mursalat

(ان ہواؤں کی) قسم جو پے در پے بھیجی جاتی ہیں

پھر ان کی (قسم) جو تند وتیز ہیں

اور ان کی قسم جو بادلوں کو پھیلانے والی ہیں

پھر ان کی جو بادلوں کو پارہ پارہ کرنے والی ہیں

پھر ان کی قسم جو (دلوں میں) ذکر کا القاء کرنے والی ہیں

حجت تمام کرنے کے لیے یا ڈرانے کے لیے

بے شک جس بات کا تم سے وعدہ کیا گیا ہے وہ ضرور ہوکر رہے گی

پس اس وقت جب ستارے بےنور کردیے جائیں گے

اور جب اسمان میں شگاف پڑ جائیں گے

اور جب پہاڑ (خاک بنا کر) اڑا دیے جائیں گے

اور جب رسولوں کو وقت مقررہ پر اکٹھا کیا جائے گا

(تمہیں علم ہے) کس دن کے لیے یہ ملتوی کیا گیا ہے ؟

فیصلہ کے دن کے لیے

(اے مخاطب!) تجھے کیا علم کہ فیصلے کا دن کیسا ہے

تباہی ہوگی اس روز جھٹلانے والوں کے لیے

کیا ہم نے ہلاک نہیں کردیا جو ان سے پہلے تھے

پھر ہم ان کے پیچھے پیچھے بھیج دیں گے بعد میں آنے والوں کو

گناہ گاروں کے ساتھ ہم ایسا ہی سلوک کیا کرتے ہیں

تباہی ہوگی اس روز جھٹلانے والوں کے لیے

کیا ہم نے تمہیں حقیر پانی سے پیدا نہیں فرمایا

پھر ہم نے رکھ دیا اسے ایک محفوظ جگہ (رحم مادر) میں

ایک معین مدت تک

پھر ہم نے ایک اندازہ ٹھہرایا ، پس ہم کتنے بہتر اندازہ ٹھہرانے والے ہیں

تباہی ہوگی اس روز جھٹلانے والوں کے لیے

کیا ہم نے نہیں بنایا زمین کو سمیٹنے والی

(تمہارے ) زندوں اور مردوں کو

اور ہم نے ہی بنادیے اس میں خوب جمے ہوئے اونچے اونچے پہاڑ اور ہم نے ہی تمہیں میٹھا پانی پلایا

تباہی ہوگی اس دن جھٹلانے والوں کے لیے

(انہیں حکم ملے گا) چلو اس (آگ) کی طرف جس کو تم جھٹلایا کرتے تھے

چلو اس سایہ کی طرف جو تین شاخوں والا ہے

نہ وہ سایہ دار ہے اور نہ وہ بچاتا ہے آگ کی لپٹ سے

وہ جہنم پھینک رہی ہوگی بڑے بڑے انگارے جیسے محل

گویا وہ زرد رنگ کے اونٹ ہیں

تباہی ہوگی اس دن جھٹلانے والوں کے لیے

یہ وہ دن ہوگا جس میں نہ وہ بول سکیں گے

اور نہ انہیں اجازت ملے گی کہ وہ کچھ عذر پیش کریں

تباہی ہوگی اس روز جھٹلانے والوں کے لیے

(اے کافرو!) یہ فیصلے کا دن ہے (جس میں ) ہم نے تمہیں اور اگلوں کو جمع کردیا ہے

پس اگر تمہارے پاس کوئی چال ہے تو میرے خلاف استعمال کرو

تباہی ہوگی اس روز جھٹلانے والوں کے لیے

بے شک پرہیزگار (اللہ کی رحمت کے) سایوں میں اور چشموں میں ہوں گے

اور (ان ) پھلوں میں ہوں گے جن کو وہ پسند کریں گے

(انہیں کہا جائے گا) مزے سے کھاؤ اور پیو ان اعمال کے صلہ میں جو تم کیا کرتے تھے

ہم یونہی صلہ دیا کرتے ہیں نیکو کاروں کو

تباہی ہوگی اس روز جھٹلانے والوں کے لیے

(اے منکرو!) اب کھالو اور عیش کرلو تھوڑا سا وقت، بےشک تم مجرم ہو

تباہی ہوگی اس روز جھٹلانے والوں کے لیے

اور (آج) جب ان سے کہا جاتا ہے اپنے رب کے سامنے جھکو تو نہیں جھکتے

تباہی ہوگی اس روز جھٹلانے والوں کے لیے

آخر کس بات پر وہ اس کتاب کے بعد ایمان لائیں گے ؟