Urdu - Chapter 80 - Abasa

چیں برجبیں ہوئے اور منہ پھیر لیا

(اس وجہ سے کہ) ان کے پاس ایک نابینا آیا

اور آپ کیا جانیں شاید وہ پاکیزہ تر ہوجاتا

یا وہ غور وفکر کرتا تو نفع پہنچاتی اسے یہ نصیحت

لیکن وہ جو پروا نہیں کرتا

آپ اس کی طرف تو توجہ کرتے ہیں

اور آپ پر کوئی ضرر نہیں اگر وہ نہ سدھرے

اور جو آپ کے پاس آیا ہے دوڑتا ہوا

اور وہ ڈر بھی رہا ہے

تو آپ اس سے بےرخی برتتے ہیں

ایسا نہ چاہیے یہ تو نصیحت ہے ،

سو جس کا جی چاہے اسے قبول کرلے

یہ ایسے صحیفوں میں (ثبت ) ہے جو معزز ہیں

جو بلند مرتبہ پاکیزہ ہیں

ایسے کاتبوں کے ہاتھوں سے لکھے ہیں

جو بڑے بزرگ اور نیکو کار ہیں

غارت ہو (منکر) انسان! وہ کتنا احسان فراموش ہے

کسی چز سے اللہ نے اسے پیدا کیا

ایک بوند سے ۔ اسے پیدا کیا پھر اس کی ہرچیز اندازہ سے بنائی

پھر زندگی کی راہ اس کے لیے آسان کردی

پھر اسے موت دی اور اسے قبر میں پہنچا دیا

یقیناً وہ بجا نہ لایا جو اللہ نے اسے حکم دیا تھا

پھر ذرا انسان غور سے دیکھے اپنی غذا کو

بے شک ہم نے زور سے پانی برسایا

پھر اچھی طرح پھاڑا زمین کو

پھر ہم نے اگایا اس میں غلہ

اور انگور اور ترکاریاں

اور زیتون اور کھجوریں

اور گھنے باغات

اور (طرح طرح کے ) پھل اور گھاس

سامان زیست تمہارے لیے اور تمہارے مویشیوں کے لیے

پھر جب کان بہرا کرنے والا شور اٹھے گا

اس دن آدمی بھاگے گا اپنے بھائی سے

اور اپنی ماں سے اور اپنے باپ سے

اور اپنی بیوی سے اور اپنے بچوں سے

ہر شخص کو ان میں سے اس دن ایسی فکر لاحق ہوگی جو اسے (سب سے) بےپروا کردے گی

کتنے ہی چہرے اس دن (نور ایمان سے) چمک رہے ہوں گے

ہنستے ہوئے خوش وخرم

اور کئی منہ اس دن غبار آلود ہوں گے

ان پر کالک لگی ہوگی

یہی وہ کافر (و) فاجر لوگ ہوں گے