Urdu - Chapter 75 - Al-Qiyamah

میں قسم کھاتا ہوں قیامت کے دن کی۔

اور قسم کھاتا ہوں ملامت کرنے والے نفس کی۔ (کہ ہم انسان کو ضرور دوبارہ زندہ کریں گے)

کیا انسان یہ سمجھ رہا ہے کہ ہم اس کی ہڈیوں کو اکٹھا نہیں کرسکیں گے ؟

کیوں نہیں ؟ جبکہ ہمیں اس پر بھی قدرت ہے کہ اس کی انگلیوں کے پور پور کو ٹھیک ٹھیک بنادیں۔

اصل بات یہ ہے کہ انسان چاہتا یہ ہے کہ اپنی آگے کی زندگی میں بھی ڈھٹائی سے گناہ کرتا ہے۔

پوچھتا ہے کہ : کب آئے گا وہ قیامت کا دن ؟

پھر جب آنکھیں چندھیا جائیں گی۔

اور چاند بےنور ہوجائے گا۔

اور چاند اور سورج اکٹھے کردئے جائیں گے۔

اس وقت انسان کہے گا کہ : کہاں ہے کوئی جگہ جہاں بھاگ کر جاؤں ؟

نہیں نہیں ! پناہ کی کوئی جگہ نہیں ہوگی۔

اس دن تو ہر ایک کو تمہارے پروردگار ہی کے سامنے جاکر ٹھہرنا پڑے گا۔

اس دن ہر انسان کو جتلا دیا جائے گا کہ اس نے کیا کچھ آگے بھیجا ہے، اور کیا کچھ پیچھے چھوڑا ہے۔

بلکہ انسان خود اپنے آپ سے اچھی طرح واقف ہوگا۔

چاہے وہ کتنے بہانے بنائے۔

(اے پیغمبر) تم اس قرآن کو جلدی جلدی یاد کرنے کے لیے اپنی زبان کو ہلایا نہ کرو۔

یقین رکھو کہ اس کو یاد کرانا اور پڑھوانا ہماری ذمہ داری ہے۔

پھر جب ہم اسے (جبرائیل کے واسطے سے) پڑھ رہے ہوں تو تم اس کے پڑھنے کی پیروی کرو

پھر اس کی وضاحت بھی ہماری ذمہ داری ہے۔

خبردار (اے کافرو) اصل بات یہ ہے کہ تم فوری طور پر حاصل ہونے والی چیز (یعنی دنیا) سے محبت کرتے ہو۔

اور آخرت کو نظر انداز کئیے ہوئے ہو۔

اس دن بہت سے چہرے شاداب ہوں گے۔

اپنے پروردگار کی طرف دیکھ رہے ہوں گے۔

اور بہت سے چہرے اس دن بگڑے ہوئے ہوں گے۔

سمجھ رہے ہوں گے کہ ان کے ساتھ وہ معاملہ ہوگا جو کمر توڑ دینے والا ہے۔

خبردار ! جب جان ہنسلیوں تک پہنچ جائے گی۔

اور (تیمار داروں کی طرف سے) کہا جائے گا کہ : ہے کوئی جھاڑ پھونک کرنے والا ؟

اور انسان سمجھ جائے گا کہ جدائی کا وقت آگیا۔

اور پنڈلی سے پنڈلی لپٹ جائے گی۔

تو اس دن تمہارے پروردگار ہی کی طرف روانگی ہوگی۔

اس کے باوجود انسان نے نہ مانا، اور نہ نماز پڑھی۔

بلکہ حق کو جھٹلایا اور منہ موڑ لیا۔

پھر اکڑ دکھاتا ہوا اپنے گھر والوں کے پاس چلا گیا۔

بربادی ہے تیری، ہاں بربادی ہے تیری !۔

پھر سن لے کہ بربادی ہے تیری، ہاں بربادی ہے تیری !۔

کیا انسان یہ سمجھتا ہے کہ اسے یونہی چھوڑ دیا جائے گا ؟

کیا وہ اس منی کا ایک قطرہ نہیں تھا جو (ماں کے رحم میں) ٹپکایا جاتا ہے ؟

پھر وہ ایک لوتھڑا بنا، پھر اللہ نے اسے بنایا، اور اسے ٹھیک ٹھاک کیا،

نیز اسی سے مرد اور عورت کی دو صفتیں بنائیں۔