Urdu - Chapter 77 - Al-Mursalat

قسم ہے ان (ہواؤں) کی جو ایک کے بعد ایک بھیجی جاتی ہیں۔

پھر جو آندھی بن کر زور سے چلتی ہیں۔

اور جو (بادلوں کو) خوب اچھی طرح پھیلا دیتی ہیں۔

پھر قسم ہے ان (فرشتوں) کی جو حق اور باطل کو الگ الگ کردیتے ہیں۔

پھر نصیحت کی باتیں نازل کرتے ہیں۔

جو یا تو لوگوں کے لیے معافی مانگنے کا سبب بنتی ہیں یا ڈرانے کا۔

یقینا وہ واقعہ ضرور پیش آکر رہے گا جس کا تم سے وعدہ کیا جارہا ہے۔

چنانچہ (وہ واقعہ اس وقت ہوگا) جب ستارے بجھا دیے جائیں گے۔

اور جب آسمان کو چیر دیا جائے گا۔

اور جب پہاڑ ریزہ ریزہ کردئے جائیں گے۔

اور جب پیغمبروں کے جمع ہونے کا وقت آجائے گا۔

(کوئی پوچھے کہ) اس معاملے کو کس دن کے لیے ملتوی کیا گیا ہے ؟

(تو جواب یہ ہے کہ) فیصلے کے دن کے لیے۔

اور تمہیں کیا معلوم کہ فیصلے کا دن کیا چیز ہے ؟

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

کیا ہم نے پہلے لوگوں کو ہلاک نہیں کیا ؟

پھر انہی کے پیچھے بعد والوں کو بھی چلتا کردیں گے۔

ایسا ہی سلوک ہم مجرموں کے ساتھ کیا کرتے ہیں۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

کیا ہم نے تمہیں ایک حقیر پانی سے پیدا نہیں کیا ؟

پھر ہم نے اسے ایک مضبوط قرار کی جگہ میں رکھا۔

مقررہ وقت تک

پھر ہم نے توازن پیدا کیا، چنانچہ اچھا توازن پیدا کرنے والے ہم ہیں۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

کیا ہم نے زمین کو ایسا نہیں بنایا کہ وہ سمیٹ کر رکھنے والی ہے۔

زندوں کو بھی اور مردوں کو بھی ؟

اور ہم نے اس میں گڑھے ہوئے اونچے اونچے پہاڑ پیدا کیے، اور تمہیں میٹھے پانی سے سیراب کرنے کا انتظام کیا۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

(ان سے کہا جائے گا کہ) چلو اب اسی چیز کی طرف جسے تم جھٹلایا کرتے تھے۔

چلو اس سائبان کی طرف جو تین شاخوں والا ہے۔

جس میں نہ تو (ٹھنڈک والا) سایہ ہے، اور نہ وہ آگ کی لپیٹ سے بچا سکتا ہے۔

وہ آگ تو محل جیسے بڑے بڑے شعلے پھینکے گی۔

ایسا لگے گا جیسے وہ زرد رنگ کے اونٹ ہوں۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

یہ ایسا دن ہے جس میں یہ لوگ بول نہیں سکیں گے۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

یہ فیصلے کا دن ہے۔ ہم نے تمہیں اور پچھلے لوگوں کو اکٹھا کرلیا ہے۔

اب اگر تمہارے پاس کوئی داؤ ہے تو مجھ پر وہ داؤ چلا لو۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

جن لوگوں نے تقوی اختیار کیا، وہ بیشک سایوں اور چشموں کے درمیان ہوں گے۔

اور اپنے من پسند میووں کے درمیان

(ان سے کہا جائے گا کہ) مزے سے کھاؤ، اور پیو ان اعمال کی بدولت جو تم کیا کرتے تھے۔

ہم نیک لوگوں کو ایسا ہی صلہ دیتے ہیں۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

(اے کافرو) کچھ وقت کھالو، اور مزے اڑا لو۔ حقیقت میں تم لوگ مجرم ہو

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

اور جب ان لوگوں سے کہا جاتا ہے کہ اللہ کے آگے جھک جاؤ، تو یہ جھکتے نہیں ہیں۔

بڑی خرابی ہوگی اس دن ایسے لوگوں کی جو حق کو جھٹلاتے ہیں۔

اب اس کے بعد اور کون سی بات ہے جس پر یہ ایمان لائیں گے ؟