Back to Languages

    Xhosa - Chapter 53

    Translation by Imaam Ismaaeel Ngqoyiyana

    Verse 1

    (Ndifunga) ngenkwenkwezi xa isihla

    Verse 2

    Ugxa wenu (uMuhammad) akalahlekanga yaye akenzanga mpazamo

    Verse 3

    Engathethi okomnqweno wakhe

    Verse 4

    Asinto yimbi (le ‘Kur’ân) ngaphandle kokuba sisiTyhilelo esityhiliweyo

    Verse 5

    Ufundiswe ngonamandla amakhulu (uJibrîl)

    Verse 6

    Ongenasiphene, yena waphakama waba ngemo yakhe yokwenene

    Verse 7

    Lo gama waye kwindawo ephakamileyo yolundi

    Verse 8

    Weza, wehla phantsi

    Verse 9

    Waba kumgama ongangobude bezaphetha ezibini okanye nganeno (kunoko)

    Verse 10

    Watyhila (uJibrîl) kwisicaka saKhe (uAllâh) awakutyhilayo

    Verse 11

    Intliziyo (ingqondo) ayizanga ixoke ngoko yakubonayo

    Verse 12

    Niza kumphikisa na nina ngoko wakubonayo

    Verse 13

    Kananjalo wambona yena (uMuhammad) ngenene kwisihlandlo sesibini

    Verse 14

    NgakwiSidratul Muntaha

    Verse 15

    Kufutshane nayo (iSidratul Muntaha) kukho umyezo wokhuseleko (iPaladesi)

    Verse 16

    Yabona wathi usakugqunywa uMthi womLote yiloo nto yayiwugqumile

    Verse 17

    Amehlo (OMprofeti uMuhammad) akalaqaza (ajonge kwenye indawo) engazanga agabadele

    Verse 18

    Yena (wayibona ngenene eyona miqondiso mikhulu yeNkosi yakhe)

    Verse 19

    Ke (nina) nibajongile na ooAl- Lat- noAl ‘Uzzâ

    Verse 20

    NoManât, ongowesithathu kubo

    Verse 21

    Ingaba okwenu ngabesiduna na ize kuYe ibe ngabesikhomokazi

    Verse 22

    Oko ke (ukuba kunjalo) kukwaba okungenabulungisa

    Verse 23

    (Lawo) akanto yimbi ngaphandle kokuba ngamagama (njee) eniziqambele ngokwenu nina kunye nookhokho benu (magama lawo) uAllâh Angathumelanga gunya (ngawo) Abalandeli nto ngaphandle koqash-qash noko kunqwenelwa yimiphefumlo yabo, ukanti sele sifikile kubo isiKhokelo esivela eNkosini yabo

    Verse 24

    Ingaba umntu unako (konke) akunqwenelayo

    Verse 25

    Kodwa uBomi belizayo bobuka-Allah nobokuqala

    Verse 26

    Zingaphi iingelosi ezisezulwini ezintethelelo yazo ingayi kunceda nto ngaphandle kokuba uAllâh Ade Anike imvume kulowo Athande ukumnika namamkeleyo

    Verse 27

    Inene abo bangakholwayo kuBomi oBuzayo bathiya iingelosi amagama esikhomokazi

    Verse 28

    Yaye malunga noko abanalwazi, akukho nto balandela yona ngaphandle koqash qash, inene, uqash-qash akancedi nto ngokuchasene nenyaniso

    Verse 29

    Wena zikhwebule kulowo utshikilela umyalezo weThu ongafuni nto ngaphandle kobomi beli hlabathi

    Verse 30

    Lowo ngumyinge wolwazi lwabo, inene iNkosi yakho yiYona, Yaziyo okokuba ngubani na olahlekileyo eNdleleni yaYo, ikwayiYo kananjalo Eyaziyo ukuba ngubani na okuso isiKhokelo

    Verse 31

    Kananjalo kokuka-Allah okusemazulwini nasemhlabeni khon’ukuze Abuyekeze abo benza ukungcola (ngesohlwayo) ngoko bakwenzayo, Abuyekeze nabo benza okulungileyo (ngomvuzo) omhle

    Verse 32

    Abo baziphephayo izono ezikhulu nezenzo ezingcolileyo, benze ezincinane kuphela, inene iNkosi yenu Iphangalele kuxolelo (lwezono), Yona Inazi kakuhle xa Inivelisa4 emhlabeni naxa naniizintsana ezibelekweni zoomama benu. Ngoko ke musani ukubanga ukuba ninyulu, Yena nguYena Waziyo ukuba ngubani na oMoyikayo

    Verse 33

    Umbonile na lowo utshikileyo wafulathela, (i-Islam)

    Verse 34

    Waza wanikela kancinane waphinda wayeka

    Verse 35

    Ingaba unalo na ulwazi lokungabonwayo, ukuze abone

    Verse 36

    Akachazelwanga na ngokwakuseziBhalweni zikaMûsâ

    Verse 37

    NezikaIbrahim, owazalisekisayo

    Verse 38

    Akukho mthwali wamithwalo uya kuthwaliswa umthwalo womnye

    Verse 39

    Kananjalo akukho nto umntu (aya kuyifumana) ngaphandle kwaleyo wayizabalazelayo

    Verse 40

    Kwaye inene umzamo wakhe uza kubonwa

    Verse 41

    Aze abuyekezwe ngawo ngembuyekezo egcweleyo

    Verse 42

    Kananjalo eNkosini yakho kulapho isiphelo sikhoyo

    Verse 43

    Inene yiYo (iNkosi yakho) Eyenza umntu ahleke aphinde alile

    Verse 44

    IkwayiYo Eyenza ukufa Inike ubomi

    Verse 45

    IkwayiYo Edala abalingane oyindoda nowasetyhini

    Verse 46

    Ngeqabaza lembewu yomntu xa likhutshiwe

    Verse 47

    Kuze (kube yimfuneko) kuYe (ukuba Adale) enye indalo

    Verse 48

    NguYe kananjalo Otyebisayo5 Anelise

    Verse 49

    Kananjalo nguYe iNkosi kaSirius

    Verse 50

    Ukanti Yena Watshabalalisa abantu bokuqala bakwa’Ad

    Verse 51

    NabakwaThamûd nabo Akazanga Abasindise

    Verse 52

    Nabantu bakwaNûh ngaphambili. Inene yayingabo abaya ababi nabulungisa baba ngabacinezeli

    Verse 53

    Ke kaloku Wazitshabalalisa izixeko ezabhedululwayo Wazikhahlela phantsi

    Verse 54

    Wabagqumelela ngoko Wabagqumelela ngako

    Verse 55

    ZiziphinakeezintsikelelozeNkosiyenuniyakuzithandabuza

    Verse 56

    Lo (Mprofeti) nguMlumkisi njengabanye abaLumkisi bamandulo

    Verse 57

    IMini esondelayo isondele (yona)

    Verse 58

    Mayela nayo akukho bani ngaphandle koAllâh Onokuyishenxisa

    Verse 59

    Ingaba le ntetho iyanimangalisa kusini na

    Verse 60

    Ke kaloku nina niyahleka anilili

    Verse 61

    Nibe nisadlalisa ngokuzonwabisa

    Verse 62

    Qubudani ke nina (maMuslim) kuAllâh niMnqule. (Yena Yedwa)