Back to Languages

    Xhosa - Chapter 76

    Translation by Imaam Ismaaeel Ngqoyiyana

    Verse 1

    Ingaba akuzanga khe kubekho xesha na emntwini apho waye eyinto engafanelanga kukhankanywa na

    Verse 2

    Inene Samdala UMntu ngomxube weqabaza lembewu yomntu khon’ukuze Simvavanye; kananjalo Samenzela ukuva nokubona

    Verse 3

    Samkhokela eNdleleni, nokuba uyabulela na okanye akabuleli

    Verse 4

    Kananjalo Silungiselele abangakholwayo amakhonkco namakhamandela neDangatya

    Verse 5

    Inene wona amalungisa aya kusela indebe (yewayini) exutywe neKâfûr

    Verse 6

    Umthombo ekuza kusela izicaka zika-Allâh ezingamalungisa (kwaye); ziwenza umpompoze ungaphezi

    Verse 7

    Abo ke ngabo bazalisekisa izifungo zabo boyike neMini ekungcola kwayo kuya kuba banzi

    Verse 8

    Kananjalo bona bapha (abanye) ukutya nangona nabo bekuthanda (kodwa bakunike) abahlwempuzekileyo, noyinkedama, nongumthinjwa

    Verse 9

    (Besithi): “Sinondlela ukukholisa uAllâh, asinqweneli mvuzo nambulelo kuni

    Verse 10

    Inene thina soyika iMini enzima evela eNkosini yethu nephethe unxunguphalo, eya kwenza ubuso bubonakale busoyikeka.”

    Verse 11

    Ngoko ke uAllâh uya kubasindisa bona ebubini baloo Mini, Abaphe ukukhanya kobuhle nolonwabo

    Verse 12

    Kananjalo imbuyekezo yabo iya kuba yiPaladesi, nezambatho zesilika ngenxa yokuba kaloku bona baba nomonde

    Verse 13

    (Bona baya kuba) behleli zava ezihlalweni zabo (ezimfuma- mfuma), abayi kubona langa nangqele apho

    Verse 14

    Ngentla kufutshane nabo iya kuba yimithunzi yayo [iPaladesi (neziqhamo)] zayo ukuba bazinqothule, ziya kuthotyelwa ezantsi ukuba zivumele (ukunqothulwa)

    Verse 15

    Kananjalo kuya kuhanjiswa phakathi kwabo izitya neendebe eziya kuba zidalwe zacwenga

    Verse 16

    Iigilasi ezicwengileyo ezenziwe ngesilivere ezimlinganiselo wazo wenziwe ngabo

    Verse 17

    Kananjalo baya kunikwa indebe (yewayini) exutywe nejinja (ginger)

    Verse 18

    (Basele), kumthombo ophakathi (ePaladesi) obizwa ngokuba yiSalsabîl

    Verse 19

    Kuya kuba kuhamba-hamba amakhwenkwana enziwe ngonaphakade. Xa uwabona ungacinga ukuba aziiperile ezisarhaziweyo

    Verse 20

    Naxa ujonga apho (ePaladesi) uya kubona ubumnandi nobungangamsha (bokwenene)

    Verse 21

    Baya kwambathiswa izambatho eziluhlaza zesilika esulungekileyo, engqindilili. Kananjalo baya kuhonjiswa ngezacholo zesilivere Ize iNkosi yabo Ibanike isiselo esihlambululayo

    Verse 22

    (Kananjalo kuya kuthiwa): “Inene oku kuni ngumvuzo kananjalo, umzamo wenu uyabulelwa.”

    Verse 23

    Inene SiThi Abathumele i’Kur’ân kuwe (Muhammad), amathuba ngamathuba

    Verse 24

    Yiba nomonde ke ngesigqibo seNkosi yakho, ungathobeli (nawuphi na) umoni phakathi kwabo okanye ongenambulelo

    Verse 25

    Ke kaloku khumbula igama leNkosi yakho (emthandazweni) ekuseni nangokuhlwa

    Verse 26

    Nasebusuku qubuda kuYo uYizukise ngobusuku (obo)

    Verse 27

    Inene abo [bangakholwayo (baleqa)], bathande ubomi balo mhlaba beshiya ngemva kwabo iMini ebuhlungu

    Verse 28

    SiThi ababadalayo Sabomeleza izimo zabo, kanti Sithanda Singayijika imbonakalo yabo ngotshintsho (olwahluke) kwaphela

    Verse 29

    Inene le Vesi (ye‘Kur’ân) isisiyalo, ngoko ke lowo uthandayo makazithabathele iNdlela eya eNkosini yakhe

    Verse 30

    Ukanti nina aningekhe nikwazi, ngaphandle kokuba kuthande uAllâh. Inene uAllâh nguSolwazi nguSobulumko

    Verse 31

    Yena Uya kungenisa kwinceba yaKhe lowo Amthandileyo. Abenzi bobubi ke bona Ubalungiselele isohlwayo esibuhlungu