Yau - Chapter 27

Twa-Sin. Aga ni ma Aya ga Qur’an nambo soni (chiwele) Chitabu chakusalichisya

Chongolo nambo soni chisengwasyo kwa wakulupilila

Awala waakwimikaga Swala mwakolosya ni kutolaga Zaka, soni wanganyao ya Akhera akasawa wakulupilila kusyesyene

Chisimu awala wangakukulupilila ya Akhera twasalalichisye itendo yao mwanti wanyao agamba kuwa pupulipupuli (nkusokonechela mwao)

Wanganyao ni awala waakwete kupata ilagasyo yakunyalaya (pa duniya pano), nambo soni wanganyao ku Akhera tachiwa wakwasika kusyene

Soni chisimu mmwejo (Muhammadi ﷺ) nkusoomesyedwa Qur’an kuumila kwa (Allah) Jwalunda lwakusokoka, Jwakumanyilila nnope

(Kumbuchilani) katema kajwalisalile Musa liwasa lyakwe kuti: “Chisimu une nauweni moto. Chinam’bichilile najo abali kuumila ku walakweo, kapena chinam’bichilile nacho chisinga chamoto kuti jenumanja n’jote.”

Basi ndema jajwauwichilile jwawilanjidwe kuti: “Ajaliiwe jwali pamoto ni jwali mungulugulu mwakwe. Nambo soni aswejele Allah M’mbuje jwa iwumbe yosope.”

“E mmwe Musa! Chisimu Jwalakwejotu ni Une Allah, Jwamachili gakupunda, Jwalunda lwakusokoka.”

“Soni ponyani simbo jenu.” Basi ndema jajwajiweni jinankutenganyika nti chisawu lijoka, jwagalawiche kutila nambo soni nganijulola munyuma. (Allah jwatite): “E mmwe Musa! Nkajogopa. Chisimu Une Achimitenga wangajogopa Kukwangu.”

“Nambo jwalitendele lupuso kaneko ni galausya (pakupanganya) yambone panyuma pa yakusakala basi (ngunkululuchilaga), chisimu Une ni Jwakululuka kusyene, Jwachanasa channope.”

“Soni jinjisyani ligasa lyenu pa mitima pa kansu jenu chilikopoche lili lyeswela ngawaga mwaulwele. (Ilosyo iwiliyi ili) mu ilosyo nsano nancheche. (Jaulani nayo) kwa Firiauna ni wandu wakwe, chisimu wanganyao awele wandu wakunyosya.”

Basi ndema jayaichilile isimosimo Yetu yakuloleka wanganyao watite: “Awu ni usawi wakuonechela.”

Ni waikaaniile (isimosimoyo) mwalupuso nambo soni mwakulikwesya kutendaga mitima jao jaikulupilile kusyesyene. Basi nnole mujawelele mbesi ja akuwatanganya

Soni chisimu chene pamasile patwampele Daudi ni Sulaimana umanyilisi. Ni watite wanawawili: “Lumbili losope lwene alapikwe Allah Ajula jwaatulongwesye uwwe (pakutupa ukoto) kwapunda wajinji mwa achikapolo Wakwe wakulupilila.”

Sano Sulaimana jwatamile chitengu cha Daudi. Ni jwatite: “E jenumanja wandu! Uwwe tujiganyisyidwe chiwecheto cha ijuni, ni tupedwile chindu chilichose. Chisimu walakweu ni ukoto wakuonechela.”

Ni wasonganganyisyidwe kwa Sulaimana asilikali wakwe kuumila m’majini, wandu ni ijuni. Basi ni waliji ali nkwaalidwa m’mikutulamikutula (pakajende kakwe)

Kwikanila ndema jawaiche wanganyao pachiwata chambamba, lupamba lwatite (pakusisalila mbamba sijakwe): “E jenumanja achimbamba! Jinjilani m’majumba mwenu atakwika mwan’diwete Sulaimana ni asilikali wakwe kutendaga wanganyao akakumanyilila.”

Basi ni jwamwetulile (Sulaimana) mwakusechelela ligongo lya malowe gakwe (ga lupamba). Ni jwatite: “Ambuje wangu! Mumbani machili ganti ngomboleje kutogolela ukoto Wenu wamumbele une ni achinangolo wangu, nambo soni napakomboleje kutenda yambone yampaka iyyinonyele. Ni munyinjisye une mwa ukoto Wenu mu achikapolo Wenu wambone.”

Ni jwapite nchendela ijuni, basi ni jwatite: “Itite uli kukwangu mbona ngangujiona ngukuku, kapena jili mwa akusowa?”

“Chisimu chene chinajilagasye ni ilagasyo yakandapala, kapena chingambe kujisikita, ikaweje jiiche nalyo ligongo lyakupikanika (lyajisowele).”

Nambo (ngukuku) nganijitama ndema jelewu, basi (nijaiche kwa Sulaimana ni) jatite: “Naikopocheele yanganiyyikopochela mmwe, ni nam’bichilile kuumila ku Sabai ni abali jakuonaonape.”

“Chisimu une naasimene wakongwe ali nkwalamulila (wandu wa ku Sabai), ni apedwile chindu chilichose (chakuwajilwa kola nchimwene), nambo soni akwete chindanda (cha uchimwene) chekulungwa nnope.”

“Nasimene walakweo ni wandu wao alinkulisujudila lyuwa kunneka Allah, soni shetani jwasalalichisye itendo yao, ni jwasiwilile kwitala (lyagoloka), basi wanganyao ngakupata chongoko,”

“Mwanti ngaakunsujudila Allah Ajula jwaakukoposyaga yakusisika ya kumawunde ni petaka, soni ni akuimanyilila yankusisa ni yankulosya.”

“Allah pangali nnungu jwine (jwakuwajilwa kun’galagatila) ikaweje Jwelepejo. M’mbuje jwa Arishi (Chindanda Chaulungu) Jekulungwa nnope.”

(Sulaimana) jwatite: “Chitulole naga nkuwecheta yakuona kapena n’di mwa akulambusya.”

“Jaulani ni baluwa janguji ni nkajiponye kukwao, kaneko ni nkaatundumalile (nkatame pakutalichila) ni nkalole mwachigakawele majibu gao.”

(Nyakongwe) watite: “E jenumanja achinduna! Chisimu une jiponyedwe kukwangu baluwa jakuchimbichika.”

“Chisimu jalakwe jikuumila kwa Sulaimana, soni chisimu jalakwe (jikuti): “”

“Ngasin’dikwesya kukwangu, nambo mumbichilile n’di Asilamu.”

(Nyakongwe) watite: “E jenumanja achinduna! Mumbangani yakujila pangani janguji, une nganimba namwile chilichose mpaka nkambichilile (ni kumba nganisyo syenu).”

Wanganyao watite: “Uwwe ni achinsyene machili, nambo soni achinsyene kuputa ngondo mwaukali, nambo yosope ili kukwenu, basi nnole muchinnamulile.”

(Nyakongwe) watite: “Chisimu achiwenye naga ali aujinjile musi, akasaujonangaga ni kwatenda wakuchimbichika mwa wandu wakwe kuwa wakunyosyeka, mwele ni mwaakasatendela (ndema syose).”

“Basi chisimu une chindumisye kukwao ntuuka, basi ninole kuti ana tisiuje nayo yantiuli ndumetume.”

Basi ndema jasyaiche (ndumetume sila) kwa Sulaimana, jwalakwe jwatite: “Ana nkungamuchisya ni chipanje? Yambele une Allah ili yambone nnope kupunda yampele wanganyammwe, nambo kuti jenumanja nkuchina ni ntuuka wenu.”

(Kaneka Sulaimana wansalile nnongola jwa ndumetume kuti): “Ujilani kukwao, basi chisimu chene chitwaichilile ni asilikali wangawa nkombola wanganyao kulimbana nao, soni chisimu chene chitwakoposye wanganyao mwalakwemo ali wakunyosyeka, nambo soni ali atengwiche.”

(Sulaimana) jwatite: “E jenumanja achinduna! Nduni mwa jenumanja jwataichenacho kukwangu chindanda chakwe (cha uchimwene) nkanawe kumbichilila wanganyao ali Asilamu?”

Jwawechete jwamachili nnope mwa majini kuti: “Une chimbiche nacho kukwenu nkanin’jiime kutyoka pamalo penu (panganya jenu), soni chisimu une pa chalakwecho ndili jwamachili kusyene, soni jwakulupichika.”

Jwawechete ajula juwakwete umanyilisi wa m’chitabu kuti: “Une chinam’bichilile nacho nkaniliusyaausye kukwenu liso lyenu.” Basi ndema jajwachiweni (Sulaimana chindanda cha uchimwene chila) chili chitamilichiche kukwakwe jwatite: “Ayi ili mu ukoto wa Ambuje wangu kuti aninje yanti; ana tindogolele kapena tingane! Sano jwatatogolele nikuti akutogolela kwaalikamuchisya nsyene, nambo soni jwatakane basi (akukana kwaalikonya nsyene), chisimu Ambuje wangu ni Wakupata kwejinji (wangalajila chilichose), Wantuuka wannope.”

(Sulaimana) jwatite: “Muntindanyichisye (kaoneche ka) chindanda chakwe (cha uchimwene), tulole kuti ana tachimanyilile kapena chawe mwa awala wangamanyilila (ichindu).”

Basi ndema jawaiche (nyakongwe) yawechetedwe yanti: “Ana chindanda chenu (cha uchimwene) chikuwa mpela achichi?” Jwalakwe jwatite: “Chikuwa mpela nichichichi.” (Sulaimana jwatite): “Sano uwwe twapedwile umanyilisi nkanawe jwalakwe, soni twawele Asilamu.”

Sano aila yajwaigalagatilaga kunneka Allah yansiwililaga (nyakongwejo ku Usilamu), chisimu jwalakwe jwaliji jwakuumila ku wandu achimakafili

(Nyakongwe) wasalilidwe kuti: “Jinjilani mwipenu lyanyumba.” Basi ndema jawaliweni waliganichisyaga kuti litanda, ni wakwindile (nguwo mpaka) kulosya sonjo syakwe. (Sulaimana) jwatite: “Chisimu lyalakwelitu lipenu lyanyumba lyesyasyajile ni magalasi.” (Nyakongwe) watite: “Ambuje wangu! Chisimu une naalitendele lupuso nansyene (paagalagatila inepe yangawaga Mmwe), sano nalipeleche pamo ni Sulaimana kwa Allah, M’mbuje jwa iwumbe yosope (ndili Nsilamu).”

Soni chisimu chene Uwwe twatumisye kwa achina Samuda nnongo n’jao (jwali) Swaleh (juwasalile kuti): “Mun’galagatilani Allah.” Basi naalole! Wanganyao wasyuchile kuwa makuga gawili (lyakulupilila ni lyakanila) gagaliji nkukangana

Jwalakwe jwatite: “E wandu wangu! Ligongo chichi nkuijanguichisya yakusakala (kuti impate) nkaniiwe yambone? Uli ngam’benda Allah chikuluko kuti ntendeledwe chanasa?”

Wanganyao watite: “Uwwe tutapene ligongo lyenumwe ni wan’di namwe.” Jwalakwe jwatite: “Chitapani chenu chili kwa Allah (ligongo lya itendo yenu yangalumbana), nambo jenumanja ni wandu wankuliingwa (pakumpa yambone ni yakusakala).”

Sano mu nsinda (wa Samuda) mwaliji mwana wandu nsano nancheche wawaliji nkuwatanganya pa chilambo, soni nganakolosyaga

Wanganyao watite: “Nnumbililane kwa Allah kuti chisimu chitukampute ngondo chilo jwalakwe ni liwasa lyakwe, kaneko chisimu chitunsalile jwawinjila jwakwe kuti: Uwwe nganituwandika pa chonasiko cha liwasa lyakwe, nambo soni chisimu uwwe tukuwecheta yakuona.”

Ni wapanjile malindi, nombe Uwwe nitwapanjile mipango jakonanga malindi gao kutendaga wanganyao akakumanyilila

Basi nnole mujawelele mbesi ja malindi gao! Chisimu Uwwe twajonasile wanganyao ni wandu wao wosopewene

Basi asila ni nyumba syao (syasyasyuchile kuwa) mawuucha, ligongo lya lupuso lwao. Chisimu mu yalakwei mwana chilosyo kwa wandu waakumanyilila

Ni twajokwele awala wawakulupilile nikuwa ni woga (wakun’jogopa Allah)

Soni (munkumbuchilani) Lutwi pandema jawatite kwa wandu wakwe: “Ana nkuyiichilila yausakwa (matanyula) kutendaga jenumanja n’di nkuloleela?”

“Nambo yakuona jenumanja nkwaichilila achalume pakwanilisya isako yenu kwaleka achakongwe? Nambo jenumanja niwandu ajinga.”

Basi nganiuwa wanje wa wandu wakwe (kuti waliji wambone,) ikaweje kuwecheta yanti: “Mwawingani waliwasa lya Lutwi m’musi mwenu, chisimu wanganyao ni wandu waakuliiswejesya (chatamile syapi m’musi wausakwa!)”

Basi ni twankulupwisye jwalakwe pamo ni liwasa lyakwe, ikaweje wankwakwepe; twapimichisye (yakuwa) mwa akusigalila munyuma (ni wajonasiche)

Ni twatuluchisye wula (ja maganga), kaje kusakala wula ja akuteteledwa

Jilani (mmwe Muhammadi ﷺ): “Lumbili losope lwene alapikwe Allah, soni ntendele uwe pa achikapolo Wakwe awala wawasagwile. Ana Allah nijwali Jwambone kapena ayila yaakuiwanganya (ni Allah pakuigalagatila)?”

Kapena (jwambone ni) Ajula jwaagumbile mawunde ni mataka, ni kuntuluchisya kuumila kwinani mesi (gawula), ni tumesisye ni galakwego matimbe gana uwigo gagakwete kusalalila? Nganiuwa kukwenu (ukombosi) wanti nikumesya itela yakwe. Ana pana nnungu jwine pampepe ni Allah? (Ngwamba!) Nambo wanganyao niwandu waakuwika chakulandanyichisya (ni Jwalakwe pakuchigalagatila)

Kapena (jwambone ni) Ajula jwaalitesile litaka kuwa lyakutamilichika, ni kuwika nkatikati mwakwemo sulo, ni kuliwichila matumbi gakunyichisya, ni kuwika chakusiwilila chilikati cha mbwani siwili (ja mesi gachijete ni jamesi gakumweka)? Ana pana nnungu jwine pampepe ni Allah? (Ngwamba!) Nambo wajinji mwa wanganyao wangali chachimanyi

Kapena (jwambone ni) Ajula jwaakun’jangaga jwainkanganiche pati am’bombilemo, ni jukungunukulaga masausyo, ni akum’bika wanganyammwe kuwa wawinjila pachilambo (panyuma pa wandu wane)? Ana pana nnungu jwine pampepe ni Allah? (Ngwamba!) Yannonope niyankukumbuchilaga

Kapena (jwambone ni) Ajula jwaakun’jongolelaga mu chipi cha pankuuli ni pambwani, nambo soni Ajula jwaakutumisyaga mbungo kuwa chisengwasyo paujo pa ukoto Wakwe (wula nkanijigwe)? Ana pana nnungu jwine pampepe ni Allah? (Ngwamba!) Atukwiche Allah ku yaakum’bwanganya nayo

Kapena (jwambone ni) Ajula jwaakutandisyaga gumba iwumbe kaneko ni kuiwusyawusya (panyuma pa kuwa), nambo soni Ajula jwaakumpaga lisiki kuumila kwinani ni pasi? Ana pana nnungu jwine pampepe ni Allah? (Ngwamba!) Jilani: “Ikani nao umboni wenu nam’baga jenumanja nkuwecheta yakuona.”

Jilani: “Wali kumawunde ni petaka ngakumanyilila yakusisika ikaweje Allah, ni ngakumanyilila soni kuti chakachi chachiukulidwa m’malembe.”

Ana umanyilisi wao uyiche pakomangala pakuimanya ya Akhera (kwanti ni kuwusyaga yandema jakwichila)? (Ngwamba!) Nambo wanganyao ali mu kaichila yajalakwejo, nambo soni wanganyao ali mu ungalola usyesyene wa yajalakwejo

Ni wawechete awala wawakanile kuti: “Ana tuli tusyuchile litakatakape uwwe ni achatati wetu, nambo yakuona tuchikoposyedwa (m’malembe nikuwa niumi soni)?”

“Chisimu tuwele tuli nkupedwa chilanga cha yalakweyi uwwe mpaka ni achatati wetu kalakala (uwwe nkanitupagwe), nganiyiwatu yalakweyi ikaweje adisiadisi syawandu wandanda.”

Jilani (mmwe Muhammadi ﷺ): “Jendagani pa chilambo ni kupita nchilola mujawelele mbesi ja akulewa.”

Ni ngasimwadandaulila wanganyao, soni ngasim’ba pakangani ligongo lya malindi gaakutenda

Wanganyao ni akutiji: “Ana chele chilangachi chiyiche chakachi nam’baga jenumanja nkuwecheta yakuona?”

Jilani: “Kuwankuwa ili dusi munyuma mwenumo ine mwa ayila yankuwa nkuikulumisya”

Soni chisimu Ambuje wenu ni Asyene umbone wakwatendela wandu, nambo wajinji mwa wanganyao wangatogolela

Soni chisimu Ambuje wenu akumanyilila yaikusisa mitima jao ni yaakuilosya papaswela

Soni pangali chakusisika chilichose kwinani ni pasi, ikaweje chili m’Chitabu chakusalichisya (chilichose Al-Lauh Al-Mahfuz)

Chisimu aji Qur’an jikusimulila ku wanache wa Israila yaijinji mwa ayila yaakuwa wanganyao ali nkutindana

Soni chisimu jele (Qur’aniji) jiwele chongolo ni chanasa kwa wakulupilila

Chisimu Ambuje wenu tachijilanya chilikati chao ni ulamusi Wakwe (wakuona), soni Jwalakwe ni Jwamachili gakupunda, Jwakumanyilila nnope

Basi jegamilani kwa Allah, chisimu mmwejo (Muhammadi ﷺ) n’di pa yakuona yakuonechela

Chisimu mmwe nganim’ba mwapikanisye wawe, soni nganim’ba mwapikanisye asiiwa m’bilango (kupikana kwakwakamuchisya, niyalumo soni achimakafili) ndema jaakutiila achilosyaga migongo jao (kuti akapikana yankwasalila)

Soni nganim’ba mmwe wanti ni kwajongolela wangalola pakwatyosya mu kusokonechela kwao, nganim’ba mwapikanisye ikaweje awala waakukulupilila ma Aya Getu, ni kuwa wanganyao wakulipeleka (kwa Allah pakuwa Asilamu)

Sano ndema jalichisimichika lilowe (lya ilagasyo) pa wanganyao, (Kiyama jili jiwandichile), tuchakopochesya chinyama kuumila mwitaka, chachichiwa chili nkwawechetekasya, ligongo wandu waliji akakugakulupilila kusyesyene ma Aya Getu

Soni (kumbuchilani) lisiku lituchisonganganya kuumila mu umati uliose likuga mwa awala waakukanila ma Aya Getu, basi ni tachiwa ali nkwaalidwa m’mikutula-mikutula (nikusakulidwaga wa kuchiwalanjilo)

Kwikanila ndema jatachiikangana (pameso pa Allah Jwalakwe) tachiti: “Ana mwagakanilaga ma Aya Gangu kutendaga nganin’gasyungula kwagamanya chenene, kapena nambi chichi (chine) chamwaliji nkutenda?”

Ni lichisimichika lilowe (lyachonasiko) pa wanganyao ligongo lya lupuso lwao, mwanti ngasakombola kuwecheta (kwakuliwalanga)

Ana nganayiona wanganyao yanti Uwwe twatendele chilo kuti apumulejemo, muusi nikuwa wakuloleka? Chisimu mu yalakweyo muwele mwana ilosyo kwa wandu waakukulupilila

Soni (kumbuchilani) lisiku lyachiligombedwa lipenga nikogopa (kwakuwanako) yosope yaili kumawunde ni yaili petaka, ikaweje yataachiisaka Allah (kuti ikajogopa), soni yosope ichim’bichilila Jwalakwe ili yakulinandiya

Ni tinchigaonaga matumbi ni kugaganichisyaga kuti gali chilimbanganile (m’malo mwakwe), nambo kutendaga gali nkwenda mugakwendelaga mawunde gawula. (Gele) nimasengo ga Allah Ajula jwaachikolosisye chenene chindu chilichose. Chisimu Jwalakwe ni Nkusimanya chenene abali syosope sya yankutenda

Jwalijose jwatachiika ni (chitendo) chambone, basi tachipata (malipilo) gambone nnope kupunda chalakwecho, nambo soni wanganyao tachiwa pantunjelele ku chogoyo cha lyele lisikulyo

Sano jwalijose jwatachiika ni (chitendo) chakusakala, basi tachiponyedwa ngope syao chamakuku ku Moto, (ni kuchiwechetedwa kukwao kuti): “Ana nkulipidwa (inepe) pangawaga yamwaliji nkupanganya?”

(Jilani mmwe Muhammadi ﷺ): “Chisimu namulidwe yakuti nan’galagatileje (Allah) M’mbuje jwa awu Nsinda (wa Maaka), Ajula jwawautesile kuwa wakuchimbichika, soni chiwele Chakwe Jwalakwe chindu chilichose, soni ni namulidwe kuti mbe mwa Asilamu.”

“Soni ni kuti soomeje Qur’an.” Sano mundu jwaajongweche, basi nikuti akongoka kwalikamuchisya nsyene, nombe najo mundu jwasokonechele, basi (akusokonechela kwalikonya nsyene), jilani: “Chisimu une ndili mwa akutetela.”

Jilani (mmwe Muhammadi ﷺ): “Lumbili losope lwene alapikwe Allah. Sampano tannosye imanyilo Yakwe basi ni tiyyimanyilile. Soni Ambuje wenu nganawa wanti ni ngaimanya yankutenda wanganyammwe.”