Yau - Chapter 42

Ha. Mim

‘Ain Sin Qaf

Mwele ni mwaakuuwulila (malowe) Allah Jwamachili gakupunda, Jwalunda lwakusokoka kukwenu (mmwe Muhammadi ﷺ) ni (yawatite pakuuwula) kwa awala (Achimitenga) wa paujo penu

Iwele Yakwe (yosope) yaili kumawunde ni yaili petaka, soni Jwalakwe ni Jwapenani kusyene, Jwankulungwa nnope

Mawunde gakusigalaga panandi kuti gapasuchepasuche pachanya pakwe (ligongo lyakun’jogopa Allah), ni Achimalaika akuluswejesyaga lumbili lwa M’mbuje gwao (Allah), ni kwawendelaga chikululuko wali petaka. Manyililani yanti chisimu Allah ni Jwali Jwakululuka kusyene, Jwachanasa channope

Sano awala waalitendele (inepe) yangawaga Jwalakwe (Allah) kuwa akwagosa, Allah ni Nkwaasuunga wanganyao (pa itendo yao yangalumbana kuti chiwalipile), soni mmwe nganim'ba nkwachengeta jwao

Iyyoyopeyo soni tun’juwulile mmwe (Muhammadi ﷺ) Qur’an jacharabu kuti muntetele Mama jwa misinda (Maaka) ni wali mungulugulu mwakwe, ni ntetele ya lisiku lyansongangano lyangali kayikasya ya lyalakwelyo. Likuga line lichiwa ku Mbepo sano likuga line lichiwa ku Moto Wakulapuka

Soni Allah angasache angatesile wanganyao kuwa nkutula umpepe, nambo akun’jinjisyaga jwansachile mu ukoto Wakwe, sano walupuso nganakola nkwagosa jwalijose namuno nkwakamuchisya

Ana kapena alitendele wanganyao (wanepe) wangawaga Jwalakwe (Allah) kuwa akwagosa? Nambotu Allah ni Nkugosa nsyesyene, soni Jwalakwe nijwaakwimusyaga wawe, soni Jwalakwe pa chindu chilichose awele Jwakombola

Sano mu chindu chilichose chankanganile, basi chiilanyo chakwe chili kwa Allah. (Jilani mmwe Muhammadi ﷺ): Jwalakwejotu ni Allah M’mbuje gwangu, Kukwakwe njegamiile, soni Kukwakwe nguwujila (pa kutenda toba)

(Jwalakwe ni) Nkugumba mawunde ni mataka. Am’biichiile achiwammakwenu kuumila mu ntundu wenu (wachiwaandu), nombe ilango (ayiwiichiile soni) achiwammakwao (kuumila mu ntundu wao wachinyama), akasan’gumbaga mwakuntupiya mwalakwemo (kupitila mu kusimangana kwa chachilume ni chachikongwe). Pangali chilichose chakulandana ni Jwalakwe (Allah), soni Jwalakwe ni Jwakupikanichisya, Jwakulolechesya

Gawele Gakwe makiyi ga kumawunde ni petaka, akasansapangulilaga lisiki jwansachile, ni kunandiya (lisikilyo kwa jwansachile), chisimu Jwalakwe chindu chilichose awele Jwaachimanya chenene

Annamwile jenumanja mu dini yawanchisyisye Nuhu, ni ayila yatun’juwulile (mmwe Muhammadi ﷺ), ni ayila yatwanchisyisye Ibrahima, Musa ni Isa, yanti: “Jimikaani dini (pakuya malamusi gakwe gosope), ni ngasinnekangana mwalakwemo.” Chikusile nnope kwa akuwanganya (Allah ni isanamu chikulupi cha Tauhidi) chankwawilanjila ku chalakwecho. Allah akunsagulilaga Kukwakwe jwaakunsaka, ni akun’jongolela Kukwakwe jwaakuwujila (Kukwakwe pakutenda toba)

Ni nganalekangana wanganyao (Ayuda ni Akilisito pa dini syao) ikaweje panyuma pakwaichilila umanyilisi (wa chikulupi cha Tauhidi), (walekangene) ligongo lya litima lyalyaliji chilikati chao, mwanti lingawaga lilowe lyalyalongolele lyakuumila kwa Ambuje wenu (lyangapa ilagasyo yekulungwa) kwikanila ndema jekolanjidwe (ja Kiyama), chisimu kungajilanyidwe chilikati chao. Soni chisimu awala wawapedwile kuchitawala Chitabu (Taurat ni Injil) panyuma pao ali m’chikaiko chekulungwa chakuchikaichila chalakwe (chikulupi cha Tauhidi ni Usilamu)

Sano ku yalakweyo (yakuya Usilamu) basi wilanjilani, ni n’jimilichiche (pakuya malamusi gosope ga Usilamu) mpela yantite pakulamulidwa, soni ngasinkuuya isako yao, ni n’jile: “Nachikulupilile chitabu chilichose chaatulwisye Allah, ni namulidwe kutenda chilungamiko chilikati chenu. Allah ni M’mbuje gwetu nambo soni M’mbuje gwenu. Uwwe tukwete masengo getu, nombe jenumanja nkwete masengo genu. Pangali ukangani chilikati chetuwe ni jenumanja. Allah tachitusonganganya sikati jetu, soni Kukwakwe ni kwakuujila.”

Sano awala waakukangana pa ya (dini ja) Allah panyuma paakundidwa (dinijo ni wandu), ukangani waowo uli wangali mate kwa M’mbuje gwao (Allah), soni pa wanganyao pana gasabu, ni akwete kupata wanganyao ilagasyo yaukali nnope (lisiku lya Kiyama)

Allah ni Ajula jwaatulwisye Chitabu (Qur’an) mwakuonaonape, ni (atulwisye soni) chilungamiko. Sano nichichi chachimmanyisye kuti Kiyama kuwa nkuwa jiwandichile

Akujijanguya (Kiyamajo mwachipongwe) awala wangakujikulupilila, nambo awala waakulupilile ni akujijogopaga, ni akumanyililaga kuti chisimu jalakwejo jakuonaonape. Manyililani yanti: Chisimu awala waakukangana pa ya Kiyama ali nkupotela kwakutalikangana nnope (ni yakuona)

Allah ni Mpole nnope kwa achikapolo Wakwe, akumpaga lisiki jwansachile, soni Jwalakwe ni Jwakulimbangana nnope, Jwamachili gakupunda

Jwawele ali nkusachilila (ni itendo yakwe) malipilo ga ku Akhera, chitukan’jonjechesye pa malipilo gakwe, ni jwawele ali nkusachilila (ni itendo yakwe) malipilo ga pa duniya, chitumpe palakwepo (yayannembele kuti impate), ni ngasakola jwalakwejo ku Akhera liunjili lililyose (lya yambone)

Kapena akwete wanganyao akwawanganya (ni Allah), wawalamulile mu dini yanganachisya Allah, soni lingawaga lilowe lya chilekanganyo (lyalyalongolele kala lyangapa ilagasyo yekulungwa ikaweje ku Kiyama), kungaajiilanyidwe chilikati chao, soni chisimu walupuso tachipata ilagasyo yakupoteka nnope

Tinchaona walupuso (lisiku lya Kiyama) ali niwoga (wakuijogopa ilagasyo) ligongo lya ayila (yangalumbana) yawapanganyisye, sano yalakwe (ilagasyoyo) ichapata kwene wanganyao. Sano awala waakulupilile ni kutendaga yambone, tachiwa m’Matimbe Gakusengwasya ga ku Mbepo, akwete kupata wanganyao yatakaisacheje kwa M’mbuje gwao (Allah), walakweo ni ukoto wekulungwa

Aji ni abali jambone jaakwasengwasya najo Allah achikapolo Wakwe awala waakulupilile ni kutendaga yambone. Jilani (mmwe Muhammadi ﷺ): “Une ngangun’juga pa wele (utengau) malipilo galigose, ikaweje (ngun’juga) chinonyelo (chakuunonyela une ni nganagasyaga pa masengo ganguga) ligongo lya ulongo (waupali chilikati changu ni jenumanja).” Sano jwatapanganye chambone chilichose, chitun’jonjechesye pa chalakwecho umbone (pa kun’dipila yejinji). Chisimu Allah ni Jwakululuka kusyene, Jwakutogolela nnope (pakulipila yejinji pa itendo yannono)

Kapena wanganyao akutiji: “(Muhammadi ﷺ) ansepele Allah unami?” Basi Allah angasache angasiwile mu ntima mwenu (pakun’diwasya yosope yanyyimanyi ya m’Qur’an ingawe mwansepele unami). Allah ni akufutaga yaukoleko ni kuilimbikasya yakuona ni malowe Gakwe. Chisimu Jwalakwe ni Jwakumanyilila yaili m’mitima

Soni Jwalakwe ni jwaakupochelaga toba kuumila kwa achikapolo Wakwe, ni jukusimasyaga ilemwa, soni jukumanyililaga yankutenda

Soni akwajangaga (maduwa) awala waakulupilile ni kutendaga yambone, ni akwajonjechesyaga mu ukoto Wakwe. Sano achimakafili akwete kupata ilagasyo yaukali nnope

Soni ingawe kuti Allah jwasapangulile lisiki achikapolo Wakwe, angasumbile mpika pachilambo, nambo kuti jukutulusyaga mu chipiimo chaachisachile. Chisimu Jwalakwe kwa achikapolo Wakwe juwele Jwaasimanya abali syosope, Jwakulolechesya

Soni Jwalakwe ni Ajula jwaakutulusyaga wula panyuma panti wanganyao ali akatile tama, ni jukwenesyaga ukoto Wakwe, soni Jwalakwe ni Nkugosa nsyesyene, Jwakulapilidwa kusyesyene

Soni mu ilosyo Yakwe (yakulosya ukombosi Wakwe), gumba kwa mawunde ni mataka, ni yaumi iliyose yakuulukutaga yaayijenesye munamuwilimo, soni Jwalakwe ya kuisonganganya yalakweyo patachisakapo juwele Jwakombola kusyene

Soni chipato chilichose chachimpatile, basi ligongo lya yagapanginyisye makono genu, ni jukuisimasyaga yaijinji

Soni jenumanja (achimakafili) nganim’ba munnepelekasyisye (Allah kumpa ipotesi) pa chilambo, soni nganinkola jenumanja kaligoselo ata nkulupusyo jwangawaga Allah

Soni mu ilosyo Yakwe (ya kulosya chindimba Chakwe kwa jenumanja), yombo yaikwenda m’mbwani yanti mpela matumbi (ukulu wakwe)

Naga juli jusachile mpaka ajituulasye mbungo, ni mpaka igambe kuwa (yomboyo) chiimile pachanya pakwe (pa mbwani). Chisimu mu yalakweyo muwele mwana imanyisyo kwa jwalijose jwali jwakupilila nnope, jwakutogolela kwejinji

Kapena kuijonanga (yomboyo nikwamisya achinsyeneo) ligongo lya (yangalumbana) yapanganyisye, ni jukuisimasyaga yaijinji

Ni akumanyilila awala waakukangana pa ma Aya Getu (yanti): Nganakola wanganyao kwakutilila

Sano chindu chilichose chim’bele nkupedwa, basi chigambile kuwa chisengwasyo (channono) cha umi wa duniya, nambo yaili kwa Allah ni yambone nnope soni yakwendelechela kwa awala waakulupilile, soni kwa M’mbuje gwao pe (Allah) akwegamilaga

Ni awala waakuliwambasyaga sambi syekulungwakulungwa (mpela kuwulaga mundu mwangali ligongo lyakwitichika ni Dini), kwisa soni yakunyalaya (mpela chikululu), soni naga ali agasabiche basi akasakululukaga

Ni awala wan’jitiche M’mbuje gwao (Allah pa chilichose chawalamwile), ni kwimikaga Swala mwakolosya, soni indu yao ikasawaga yakutawana mashauli sikati jao, ni ichindu yatwapele akasatolaga

Ni awala wanti naga uli wapatile uwwanga akasaliuchisyaga

Sano malipilo ga chakusakala ni chakusakala chanti mpela chichocho, nambo jwaachisimasyisye (chakusakalacho) ni kupikanganana (najo nkuchitendajo), basi malipilo gakwe gali kwa Allah. Chisimu Jwalakwe (Allah) ngaakwanonyelaga walupuso

Sano chisimu jwaaliuchisye panyuma pa uwwanga waatendeledwe, basi pa wanganyao pangali litala (lyakwagambila)

Nambo litala (lyachigambilo) lili pa awala waakwatenda lupuso wandu ni kutendaga uwwanga pa chilambo mwangawajilwa, wanganyao akwete kupata ilagasyo yakupoteka nnope

Nambo chisimu jwaapilile, ni kululuka, chisimu yalakweyo ni yaili kwene mu ichindu yakusosekwa kuwichila ntima

Sano jwaakunnechelela Allah kusokonechela, basi nganakola nkun’gosa panyuma pakwe. Ni tinchaona walupuso ndema jatachiiona ilagasyo achitiji: “Ana pana litala lyakuujila (ku duniya)?”

Ni tinchaona wanganyao ali nkupelechedwa ku walakwe (Motowo), ali atetewele ligongo lya kunyosyeka, ali nkulola ni liso lyakusisa (chamunjenje meso). Sano awala wawakulupilile tachiti: “Chisimu wakwasika ni awala waalijasikasyisye (Mbepo) achimisyene kwisa soni mawasa gao (lelo) lisiku lya Kiyama (ligongo lya itendo yao yangalumbana yawaliji nkutenda ku duniya), manyililani yanti; chisimu walupuso tawe mu ilagasyo yakwendelechela.”

Soni ngasakola wanganyao akwagosa waliose watachachenjela jwangawaga Allah. Sano jwannechelele Allah kusokonechela, basi nganakola litala lililyose (lyakongochela pa duniya ni kokochela ku Akhera)

Mun’jitikani M’mbuje gwenu (Allah), nkaniliyiche lisiku lyakuumila kwa Allah lyangali jwakuliusya. Ngasinkola wanganyammwe kwakutilila lyele lisikulyo, soni ngasinkola kaanila kulikose (pa yamwapanganyisye)

Sano naga akugalauka (kuleka chikulupi cha Tauhidi), basi nganituntumisya (mmwejo Muhammadi ﷺ) kuwa jwakwalolela wanganyao, nganiyiwa kukwenu ikaweje kulungusya utenga. Soni chisimu Uwwe tuli tumpele mundu kupasya ukoto kuumila Kukwetu, akasausengwelaga (mwangali kutogolela), nambo naga chapatile chakusakala chilichose ligongo lya yagalongwesye makono gao, basi chisimu mundu jukasawa jwakufulu

Uwele wakwe Allah uchimwene wa kumawunde ni petaka. Jukasagumba yajukusaka. Akumpaga jwansachile wanache wachikongwe, ni akumpaga jwansachile wanache wachilume

Kapena kwawanganya wanache wachilume ni wachikongwe (kwa mundu jumo), ni akuntendaga jwansachile kuwa jwangaweleka. Chisimu Jwalakwe ni Jwakumanyilila nnope, Jwakombola kusyene

Soni nganiyiwa kwa mundu yanti ni kum’bechetekasya jwalakwejo Allah, ikaweje ni malowe gakuuwulidwa (mu ntima mwakwe), kapena kusyeto kwa chakusiwilila (gambaga kupikana malowe ga Allah mwangali kum’bona), kapena kuntumisya Ntenga (Jibulilu) basi ni kun’juwulila yaakuisaka (Allah) kwa lisosa Lyakwe. Chisimu Jwalakwe ni Jwapenani kusyene, Jwalunda lwakusokoka

Iyyoyopeyo soni tun’juwulile mmwe (Muhammadi ﷺ) malowe (Qur’an) kwa ulamusi Wetu. Nganimmanyililaga kuti Chitabu ni chichi namuno chikulupi. Nambo tujitesile jalakwe (Qur’an) kuwa lilanguka lyatukun’jongolela nalyo jwatukunsaka mwa achikapolo Wetu. Soni chisimu mmwe (Muhammadi ﷺ) nkongolelaga kwene kwitala lyagoloka

Litala lya Allah Ajula jwaili Yakwe (Jikape yosope) yaili kumawunde ni yaili petaka. Manyililani yanti kwa Allah ikuujila ichindu yosope