Yau - Chapter 47

Awala waakufuulu, nikusiwililaga (wandu) kwitala lya Allah, Jwalakwe (Allah) juitesile kuwa yantega itendo yao

Nambo awala waakulupilile ni kutendaga yambone, ni kulupilila yaitulusyidwe kwa Muhammadi ﷺ yaili yakuona yakuumila kwa M’mbuje gwao (Allah), Jwalakwe (Allah) juisimasisye ilewi yao, ni kwakolochesya kawe kao

Yalakweyo ni ligongo lyanti awala waakufuulu akuyiye yaunami, sano awala waakulupilile ni akuyiye yakuona yakuumila kwa M’mbuje gwao (Allah), iyyoyopeyo ni yaakuti Allah pakupeleka kwa wandu ilandanyo yao

Sano naga nsimangene nao (pangondo) awala waakufuulu, basi mwakunulani ngosi (mwaulagani mwanakamo), mpaka pati ntupiye kwaulaga wanganyao, basi liiyaani matondolo (gakwatawila, mwakamulani kuwa mateeka genu), sano panyuma pakwe komboleka gamba kwaleka (mwangali kutola mbote), kapena (kwaleka) pa kuliombola (pakutola mbote), (ntendeje iyyo) mpaka ngondo jiyikane mwakutula misigo jakwe (jiyikane mwakumala). Chalakwecho (ni chilamusi cha Allah). Sano Allah angasache nikuti angamalene nao (Nsyene mwangali jenumanja kumenyana nao), nambo (akunnamula kuputa ngondo) kuti walinje mayeso wane mwa jenumanja pa wane (wakulupilila pa wakanila). Sano awala waaulajidwe petala lya Allah, basi Jwalakwe ngasagajonanga masengo gao

Tiwajongole, ni kwakolochesya kawe kao

Ni tachajinjisya ku Mbepo jawamanyisye

E jenumanja wankulupilile! Naga nkunkamuchisya Allah (pakamuchisya petala Lyakwe), Jwalakwe tankamuchisye, ni tagalimbanganye makawu genu

Sano awala waakufuulu, chonasiko nichao, soni (Allah) ayitesile kuwa yantega itendo yao

Yalakweyo ni ligongo lyanti wanganyao ayiwenjile yaatulwisye Allah, basi (Allah) ni agajonasile masengo gao

Ana ngaakwendajenda pa chilambo nikupitaga nchilola mujawelele mbesi ja awala wapaujo pao? Allah wajonasile; sano akwete kupata achimakafili (walelowa ilagasyo) yanti mpela yalakweyo

Yalakweyo ni ligongo lyanti Allah ni Nkwachengeta awala waakulupilile, sano achimakafili nganakola nkwachengeta jwao

Chisimu Allah tachajinjisya awala waakulupilile ni kutendaga yambone ku Matimbe ga ku Mbepo gasikujilima chapasi pakwe sulo. Nambo awala waakufuulu akusengwa (pa umi wa duniya) ni kulyaga mwaikulila ilango, sano Moto ni mauto gao

Ana jilingwajilingwa mwa misi (jatwajijonasile) jajaliji jamachili nnope kuwupunda musi wenu awu (wa Maaka) waunkopwesye? Twaajonasile wanganyao, ni nganakola jwakwakamuchisya jwalijose

Ana mundu jwali pa umboni wakuonechela wakuumila kwa M’mbujegwe (Allah) mpaka alandane ni mundu jwaisalalisyidwe itendo yakwe yangalumbana, aku ali nkukuya wanganyao isako yao

Kasimbidwe ka Mbepo jaapedwile chilanga wawoga (wakun’jogopa Allah, kali nyyi); kwalakweko kwana sulo syamesi gangaunda, ni sulo syankaka wangachesuka kanonye kakwe, ni sulo syaukana wakulyolyopela kwa akumwa, ni sulo syauchi weswejesye (wangali mbotole), soni akwete kupata wanganyao kwalakweko ntundu uliose wa isogosi, kwisa soni chikululuko chakuumila kwa M’mbuje gwao (Allah). (Ana wanganyao) mpaka alandane ni ajula jwatakawe jwandamo m’Moto, ni kumwesyedwa mesi gamasemule nnope gachigakakatanye matumbo gao

Soni wane mwa wanganyao (achinakunaku) pana waakupikanilaga kukwenu (mmwe Muhammadi ﷺ nchipelekaga ilimu), mpaka pati atyosile kukwenu akutiji (mwachipongwe) kwa awala waapedwile umanyilisi: “Ana (Muhammadi ﷺ) juwechete chichi sampano jino?” Wanganyao ni awala wawadindile Allah chidindo m’mitima mwao, ni akuyiye isako yao

Sano awala waachijitiche chongoko, (Allah) wajonjecheesye chongoko, ni kwapa woga wao (wakun’jogopa Jwalakwe)

Ana akwembecheya (inepe) yangawaga Kiyama kuti jaichilile mwachisupuchisya? Basi pamasile paiyiche imanyilo yakwe. Ana kuchakamuchisya chinauli kumbuchila kwao ndema jajichaichilila (Kiyamajo)

Basi manyililani yanti pangali nnungu jwine (jwakuwajilwa kun’galagatila) ikaweje Allah, ni m’bendeje chikululuko pa sambi syenu ni (sambi) sya wakulupilila wachilume ni wakulupilila wachikongwe. Soni Allah akumanyilila kwendajenda kwenu, ni malo genu gakutulalila

Sano awala waakulupilile ni akutiji: “Ligongo chichi ngatulusyidwa Sura (kukwetu jakutukundisya kwauchisya achimakafili pa uwwanga waakututenda)?” Nambo nkutulusyidwa Sura jakutamilichika (chilamusi chakwe), nikusalidwamo ngani jangondo, timwaone awala wamuli m’mitima mwao ulwele (wa chikaiko ni unakunaku) achinnolaga ni kalole kamundu jwaakukomoka nacho chiwa. Nambo yaliji yambone kukwao (achinakunakuo kumpikanila Allah ni kunkunda)

(Yambone kukwao ni) kukunda ni (kuwecheta) malowe gambone. Sano naga ngondo jili jisimichiche (achinakunaku ikasayachima), nambo akansimichisye Allah (niya syao) ikaliji yambone kukwao

Mwinetu jenumanja patin’galauche (kuleka chikulupi ni kuleka kumenyana ngondo ni makafili), tim’be nkuwatanganya pachilambo nikataga ulongo wenu (mwamwatendelaga kala ndema jaujinga)

Wanganyao ni awala wawalwesile Allah, niwatesile kuwa wangapikana, ni kugatenda kuwa gangalola meso gao

Ana ngaakujichetelela Qur’an, kapena m’mitima mwao mwana achinampatiika wakwe (mwanti ni jiwugalidwe kwangajipikana Qur’anijo)

Chisimu awala waagalauchile ku migongo jao (ku ukafili) panyuma pakumanyukuka kukwao chongoko, shetani jwasalalichisye (itendo yao yangalumbana), soni (Allah) nijwapele ndawi jelewu

Yalakweyo ni ligongo lyanti wanganyao (achinakunaku) watite pakwasalila awala (achimakafili) wawaichimile ayila yawatulwisye Allah: “Chitunkunde ine mu ichindu (yenu, mpela yakum’benga Muhammadi ﷺ, ni kwagwisya ulesi wakusaka kuja kumenyana namwe ngondo).” Sano Allah ni akumanyilila asili syao

Ana ichiwa uli ndema jatachatyosyaga Achimalaika maumi gao pakuwa, achaputaga ngope syao ni migongo jao

Yalakweyo ni ligongo lyanti wanganyao waakuyiye yayampikasyisye Allah ntima, nikuchiwenga chinonyelo Chakwe, basi (Allah) ni agajonasile masengo gao

Ana akuganichisya awala wamuli m’mitima mwao ulwele (wa unakunaku) kuti Allah ngawa nkukukopochesya papaswela kusakalilwa kwao

Soni tungasache tungannosisye wanganyao, basi nkaamanyilile ni imanyilo yao, nambo tinkomboleche kwamanya kwene mu kawechete (kao) kakunonyelesya, soni Allah akumanyilila itendo yenu

Soni chitun’dinje kwene mayeso jenumanja mpaka twamanyukule akuputa ngondo (ligongo lya dini) mwa jenumanja, ni wakupilila, ni tusilochesye papaswela abali syenu

Chisimu awala waakufuulu ni kusiwililaga (wandu) kwitala lya Allah, ni kunsisyaga Ntenga ﷺ panyuma pakumanyukuka kukwao chongoko; nganawa apeleche chisausyo chilichose kwa Allah, ni tachigajonanga (Allah) masengo gao

E jenumanja wankulupilile! Mumpikanilani Allah ni mumpikanile soni Ntenga ﷺ, ni nkajonanga masengo genu

Chisimu awala waakufuulu, ni kusiwililaga (wandu) kwitala lya Allah, kaneko nikuwa ali makafili, basi Allah ngasiwakululuchila wanganyao

Basi ngasimpela, nikuwenda ntunjelele (kwa amagongo wenu), kutendaga jenumanja ni wakupunda, (nambo n’jendelechele kwakunula) soni Allah ali namwe, soni ngasampunguchisya (malipilo ga) itendo yenu

Chisimu umi wa duniya uwele masanje ni chanache, nambo naga nkulupilile, ni kuwa ni woga (wakun’jogopa Allah pakuligosa ku ilemwa), (Allah) tampe malipilo genu, soni ngaakun’juga chipanje chenu (chosope kuti nchipeleche petala lya Allah)

Ali atite an’juje chalakwecho, ni kunkanganika, mpaka ntende ubayili, ni mpaka akukopocheyse papaswela kusakalilwa kwenu

Ha! Jenumanja ni awala wankuwilanjidwa kuti ntole petala lya Allah, basi wane mwa jenumanja pana waakutenda ubayili. Sano jwaakutenda ubayili nikuti akutenda ubayili waalikonya nsyene, sano Allah ni Jwakupata kwejinji, nambo jenumanja ni wakulaga. Nambo naga nkugalauka (kuleka Usilamu, Allah) tantindanye niwandu wane wangawaga jenumanja, soni ngasawa wanti mpela jenumanja (tachiwa wambone)