Yau - Chapter 58 - Al-Mujadila

Chisimu pamasile paapikene Allah lilowe lya ajula (jwammasyeto) jwaakusisyana namwe (malowe) pa ya wankwakwe (wantuumbiliile), ni jukulawila (magambo) kwa Allah, mwanti Allah akuwa ali nkupikana kuwechetana kwenu, chisimu Allah ni Jwakupikanichisya Jwakulolechesya

Wandu waakuwa mu jenumanja ali nkwalandanya achimmasyeto wao ni migongo (ja achimama wao pa chiwako), ngawa nkuwa wanyao achimama wao (pa chiwako changawa nkutenda nao soni ulombela), nganawa achimama wao ni ikaweje awala wawaweleche, soni chisimu wanganyao akuwecheta malowe gakusakala soni gaunami, soni chisimu Allah ni Nkusiimaasya (ilemwa) Jwakululuka kusyene

Sano wandu waakuwa ali nkwalandanya achimmasyeto wao ni migongo (ja achimama wao pa chiwako changawa nkutenda nao soni ulombela), kaneko ni kuusyausya yawawecheteyo; basi agopole kapolo nkanaiche mwakwayana (ni achiwammakwaowo), jalakweji ni (misyungu ja Allah) jankuwundidwa najo, sano Allah abali syosope sya yankutenda awele Jwaasimanya chenene

Sano jwanganapata (kapolo) basi chatawe myesi jiwili jakuyana nkanaiche mwakwayana (ni wankwakwe), nambo jwanganawa apakombwele (kutawa) basi chiwape yakulya masikini makumi nsano nalimo . Yalakweyo (ilamulidwe) kuti munkulupilile Allah ni Ntenga Jwakwe ﷺ. Soni jalakweji ni mipingu ja Allah, ni akwete kupata achimakafili ilagasyo yakupoteka nnope

Chisimu awala waakunsiisya Allah ni Ntenga Jwakwe ﷺ, anyosyedwe mpela yawatite pakunyosyedwa wakala wao, soni pamasile patutulwisye ma Aya gakusalichisya, ni akwete kupata achimakafili ilagasyo yakwalusya

Lisiku lyatachasyusya Allah wanaose ni kwatagulila yawapanganyisye, Allah jwaisonganganyisye (ni kuisunga) nambo wanganyao wailiwalile, sano Allah pa chindu chilichose awele Mboni

Ana ngankuiona yanti Allah jukuimanya yaili kumawunde ni yaili petaka? Ngaukasatamidwaga ntemela wa wandu watatu ikaweje Jwalakwe jukasawa Jwancheche jwao, naatamuno wa wandu nsano ikaweje Jwalakwe jukasawa Jwansano najumo jwao, naatamuno wa wandu wakunandipila pele kapena wakutupila ikawejepe Jwalakwe jukasawa nao palipose pachawe (ni umanyilisi Wakwe wangasisika chilichose), kaneka ichindu yawapanginyisye tachatagulila lisiku lya Kiyama, chisimu Allah chindu chilichose awele Jwaachimanya chenene

Ana ngankwaona awala wanya wawakanyisyidwe kutama ntemela (wamalindi), kaneka ni akuwujauja kutenda yawakanyisyidweyo? Ni akusongonelanaga yasambi ni yaumagongo kwisa soni yakunnyosya Ntenga ﷺ. Soni pati am’bichililemo akasankomasyaga ni komasya (kwakuchindimbula) kwanganankomasyeje nako Allah, m’mitima mwao niakutiji: “Nambi uli Allah ngatupa ilagasyo pa yatukuwechetayi?” Jahannama jichakwana wanganyao, chachijijinjila. Kaje kusakala malo gakuujila gakwe

E jenumanja wankulupilile! Pati nchitamaga ntemela basi ngasinsongonelanaga yasambi ni yaumagongo kwisa soni yakunnyosya Ntenga ﷺ, nambo nsongonelaneje yaukoto ni woga (wakun'jogopa Allah), soni mun'jogopani Allah Ajula jwachinchisonganganyisyidwa Kukwakwe

Chisimu mitemela (jamalindi) jikuumilaga ku shetani kuti waadandaulikasye awala waakulupilile, nambo nganawa waapoteche nao chilichose ikaweje kwa lisosa lya Allah, sano wakulupilila ajegamileje kwa Allah pe basi

E jenumanja wankulupilile! Pati nsalilidwemo kuti pelekani lipesa panganya basi pelekani lipesalyo, Allah chansapangulile (ukoto Wakwe), soni pati iwechetedwe yanti: “Jimani (kuja kutenda masengo ga Dini),” basi jimani. Allah tiwanyakule pa uchimbichimbi awala waakulupilile mwa jenumanja kwisa soni awala waapedwile umanyilisi, sano Allah abali syosope sya yankutenda awele Jwaasimanya chenene

E jenumanja wankulupilile! Ndema jankusaka kuwecheta najo Ntenga ﷺ yantemela, basi longosyani (kutola) sadaka (jakwapa masikini) nkaniuwe ntemela wenuo, yalakweyo ni yaili yambone nnope kukwenu ni yakuswejelesya, nambo naga nganimpata (sadakajo ngalikandu), basi chisimu Allah ni Jwakululuka kusyene Jwachanasa channope

Ana n'jogwepe kulongosya (kutola) sadaka nkaniuwe ntemela wenu (wakuwechetana najo Ntenga ﷺ)? Sano naga nganim’biche mwakutenda, basi Allah an'jepepachisye, sano gambagani kwimika Swala mwakolosya ni kutolaga Zaka, soni mumpikanilani Allah ni Ntenga Jwakwe ﷺ, sano Allah ni Nkusimanya chenene abali syosope sya yankutenda

Ana ngankwaona awala (achinakunaku) watomene nao ulongo wandu wawatumbilile Allah? Wanganyao nganawa mwa jenumanja nambo soni nganawa mwa wanganyao, soni akulumbilaga yaunami aku achimanyililaga (kuti akulambusya)

Allah walinganyichisye wanganyao ilagasyo yaukali nnope, chisimu wanganyao iwele yakusakala nnope yaawele nkupanganya

Akutesile kulumbila kwao (kwaunami) kuwa chakusiwilila (itendo yao yangalumbana), basi ni wasiwilile (wandu) kwitala lya Allah; ni akwete kupata wanganyao ilagasyo yakwalusya

Ngasichija kwakamuchisya wanganyao chipanje chao atamose wanache wao chilichose mu (ipotesi) yakuumila kwa Allah, wanganyao niwandu wa ku Moto, wanyao kwalakweko takawe wandamo

Lisiku lyatachasyusya Allah wanaose, basi ni chachiwa nkulumbila Kukwakwe (Allah, mwaunami) yawatiji pakulumbila kukwenu, aku ali nkuganichisya yanti chapate chilichose (pakulumbila kwaoko), manyililani yanti wanganyao chisimu chene niwali waunami

Shetani jwaguwatiile wanganyao ni jwaliweesye kunkumbuchila Allah, wanganyao ni likuga lya shetani, manyililani yanti chisimu chene likuga lya shetani nilyalili lyakulepela

Chisimu awala waakunsiisya Allah ni Ntenga Jwakwe ﷺ wanganyao chachiwa mu wakunyosyeka nnope

Ngamwasimana wandu waakunkulupilila Allah ni Lisiku Lyambesi ali nkwanonyela wandu waakunsisya Allah ni Ntenga Jwakwe ﷺ, namuno akaliji achatati wao, kapena wanache wao, kapena achachimwene wao, kapena walukosyo lwao. Wanganyao (Allah) alembile m’mitima mwao chikulupi (mwakuchisimika kusyene), ni walimbangenye ni Nsimu (Jibulilu) wakuumila Kukwakwe, ni tachajinjisya ku Matimbe ga ku Mbepo gasikujilima cha pasi pakwe sulo, chakawe wandamo mwalakwemo. Allah tachanonyela (pakwapochela masengo gao gambone), nombe nao chachinonyelwa Najo (pamalipilo gataachaapa). Wanganyao ni likuga lya Allah, manyililani yanti chisimu chene likuga lya Allah ni lyalili lyakupunda