Yau - Chapter 69 - Al-Haqqah

Chakusimichika (kwika kwakwe)

Ana chakusimichika (kwika kwakwe) nichichi

Ana ni chichi champaka chimmanyisye ya chakusimichika (kwika kwakwe)? (Jeletu ni Kiyama)

Wanya Asamuda ni Adi wakaaniile ya chagunda ntima (Kiyama)

Mwanti wanya Asamuda wajonanjidwe ni n'gumilo wakupelenganya nnope

Sano wanya Adi ni wajonanjidwe ni mbungo jakusisima nnope soni jamachili gakupelenganya

(Allah) wajitumisye kukwao yilo nsano naiwili ni muusi nsano nautatu mwakulundanya, mwanti nkaweni wandu mwalakwemo ali jajaja! Nti chisawu mapata ga itela yatende gangali chachipali nkati mwakwe

Nambi kwali nkum'bona mwa wanganyao jwalijose jwasigele

Nombe Afiriauna kwisa soni wandu wa paujo pakwe ni achinsyene misi jajapitikusyidwe (wandu wa Lutwi) wayiche ni ilemwa

Sano (waliose mwa wanganyao) wannyosyisye Ntenga jwa M’mbuje gwao, basi (Allah) ni jwaakwembekenye ni ilagasyo yakupelenganya nnope

Chisimu Uwwe ndema jagaagumbalile mesi (pachigumula cha Nuhu), twankwesisye wanganyammwe m’chombo chakwenda (mwakujajawala)

Kuti tuchitende kuwa chikumbusyo kukwenu, ni kuti lijisunje (jele abaliji) liwiwi lyakupikanichisya

Basi pandema jalichigombedwa lipenga n'gombo umpepe

Nombe litaka ni matumbi ni kutyosyedwa m’mangwakwe kaneka ni kusyajidwa nsyago umo

Basi lyele lisikulyo chichipatikana chakupatikana (Kiyama)

Ni lichipapuka liwunde, mwanti lyalakwe palyele lisikulyo lichiwa nyangwinyangwi (ngalimba)

Ni Achimalaika tachiwa ali mungulugulu mwakwemo, soni pachanya pao lyele lisikulyo (Achimalaika wakwana) nsano nawatatu, tachitwichila Arishi ja Ambuje wenu (Chindanda Chaulungu)

Lyele lisikulyo tachiika namwe (ku magambo), pangali chilichose chankasasisaga jenumanja chachichisisika

Sano mundu jwatachipedwa chitabu chakwe chakunkono wakwe wan'dyo, basi tachiti: “Eni! Soomani chitabu changu!”

“Chisimu une (ku duniya) nasimichisyaga yanti tinjisimangana nacho chiwalanjilo changu.”

Basi jwalakwe tachiwa mu ndamo jakusengwasya

Mu Mbepo Japenani

Isogosi yakwe yakuwandichila (yangasausya kawa)

(Tachasalila kuti): “Lyagani soni mwagani mwakusengwa ligongo lya ayila imwalongwesye m’mowa gagaapite (kala ku duniya).”

Nambo kwa mundu jwatachipedwa chitabu chakwe cha kunkono wakwe wanchiji, basi tachiti (pakudandaula): “Nkongwene! Nabola nga nganimbedwa chitabu changu!”

“Ningaatende ngachimanya chiwalanjilo changu!”

“Ha! Nabola chiwa chila chikawe chipelela (changu ni ngaujila soni ku umi)!”

“Gaanjonasichile machili gangu (gakulichenjelela).”

(Kuchiwechetedwa kuti): “Munkamulani soni muntawe makongwa.”

“Kaneka ni mumponye ku Moto Waukali.”

“Kaneko muntawikanye m’malundelunde (ga unyolo), ulewu wakwe makono makumi nsano nagawili .”

Chisimu jwalakwe jwaliji jukaakunkulupilila Allah Jwakuchimbichika nnope

Soni nganawa jwakuchisya yagaliisya masikini

Basi nganakola jwalakwejo lelo kwekuno nsyowe (jwakunkamuchisya)

Namuno yakulya ikaweje uwowu (wakusulula m’mawanga ga wandu wa ku Moto)

Pangali watachiulya ikaweje wakulemwa

Basi nguilumbila yankuiwona

Ni yangankuiwona

Chisimu jalakwe (Qur'aniji) liwele lilowe lya Ntenga Jwakuchimbichika (Jibulilu)

Ni nganijiwa jalakwejo lilowe lya nkwimba chilaanga, yannonope ni yankuikulupilila

Soni ngawa lilowe lya abimbi, yannonope ni yankukumbuchila

(Jiwele) jakutulusyidwa kuumila kwa M'mbuje jwa iwumbe yosope

Soni ingawe kuti (Muhammadi ﷺ) jwalukenye Kukwetu unami winewakwe

Chisimu tukankwembekenye mwamachili

Kaneka nitukakatile kwene mwa jwalakwejo ntasi (wakwe waumi nikuwa)

Mwanti nga nganapatikana jwalijose mwa jenumanja jwakun'gosa (ku ipotesi Yetu)

Soni chisimu jalakwe (Qur’ani) jiwele chikumbusyo kwa wakun'jogopa (Allah)

Sonitu Uwwe tukumanyilila kusyene yanti mwa wanganyammwe mwana wakanila

Soni chisimu jalakwe (Qur’ani) jichiwa jakwadandaulikasya kusyene achimakafili (ku Kiyama ndema jatachiuwona ntendele wa wajikuya ni ipotesi ya wajikana)

Soni chisimu jalakweji jiwele jakuona kusyesyene

Basi liswejesyani lina lya Ambuje wenu Wakuchimbichika nnope