Back to Languages
Yau - Chapter 69 - Al-Haqqah
Translation by Muhammad Bin Abdul Hamid Silika — Permalink
Verse 1 — Surah Al-Haqqah 69:1
Chakusimichika (kwika kwakwe)
Verse 2 — Surah Al-Haqqah 69:2
Ana chakusimichika (kwika kwakwe) nichichi
Verse 3 — Surah Al-Haqqah 69:3
Ana ni chichi champaka chimmanyisye ya chakusimichika (kwika kwakwe)? (Jeletu ni Kiyama)
Verse 4 — Surah Al-Haqqah 69:4
Wanya Asamuda ni Adi wakaaniile ya chagunda ntima (Kiyama)
Verse 5 — Surah Al-Haqqah 69:5
Mwanti wanya Asamuda wajonanjidwe ni n'gumilo wakupelenganya nnope
Verse 6 — Surah Al-Haqqah 69:6
Sano wanya Adi ni wajonanjidwe ni mbungo jakusisima nnope soni jamachili gakupelenganya
Verse 7 — Surah Al-Haqqah 69:7
(Allah) wajitumisye kukwao yilo nsano naiwili ni muusi nsano nautatu mwakulundanya, mwanti nkaweni wandu mwalakwemo ali jajaja! Nti chisawu mapata ga itela yatende gangali chachipali nkati mwakwe
Verse 8 — Surah Al-Haqqah 69:8
Nambi kwali nkum'bona mwa wanganyao jwalijose jwasigele
Verse 9 — Surah Al-Haqqah 69:9
Nombe Afiriauna kwisa soni wandu wa paujo pakwe ni achinsyene misi jajapitikusyidwe (wandu wa Lutwi) wayiche ni ilemwa
Verse 10 — Surah Al-Haqqah 69:10
Sano (waliose mwa wanganyao) wannyosyisye Ntenga jwa M’mbuje gwao, basi (Allah) ni jwaakwembekenye ni ilagasyo yakupelenganya nnope
Verse 11 — Surah Al-Haqqah 69:11
Chisimu Uwwe ndema jagaagumbalile mesi (pachigumula cha Nuhu), twankwesisye wanganyammwe m’chombo chakwenda (mwakujajawala)
Verse 12 — Surah Al-Haqqah 69:12
Kuti tuchitende kuwa chikumbusyo kukwenu, ni kuti lijisunje (jele abaliji) liwiwi lyakupikanichisya
Verse 13 — Surah Al-Haqqah 69:13
Basi pandema jalichigombedwa lipenga n'gombo umpepe
Verse 14 — Surah Al-Haqqah 69:14
Nombe litaka ni matumbi ni kutyosyedwa m’mangwakwe kaneka ni kusyajidwa nsyago umo
Verse 15 — Surah Al-Haqqah 69:15
Basi lyele lisikulyo chichipatikana chakupatikana (Kiyama)
Verse 16 — Surah Al-Haqqah 69:16
Ni lichipapuka liwunde, mwanti lyalakwe palyele lisikulyo lichiwa nyangwinyangwi (ngalimba)
Verse 17 — Surah Al-Haqqah 69:17
Ni Achimalaika tachiwa ali mungulugulu mwakwemo, soni pachanya pao lyele lisikulyo (Achimalaika wakwana) nsano nawatatu, tachitwichila Arishi ja Ambuje wenu (Chindanda Chaulungu)
Verse 18 — Surah Al-Haqqah 69:18
Lyele lisikulyo tachiika namwe (ku magambo), pangali chilichose chankasasisaga jenumanja chachichisisika
Verse 19 — Surah Al-Haqqah 69:19
Sano mundu jwatachipedwa chitabu chakwe chakunkono wakwe wan'dyo, basi tachiti: “Eni! Soomani chitabu changu!”
Verse 20 — Surah Al-Haqqah 69:20
“Chisimu une (ku duniya) nasimichisyaga yanti tinjisimangana nacho chiwalanjilo changu.”
Verse 21 — Surah Al-Haqqah 69:21
Basi jwalakwe tachiwa mu ndamo jakusengwasya
Verse 22 — Surah Al-Haqqah 69:22
Mu Mbepo Japenani
Verse 23 — Surah Al-Haqqah 69:23
Isogosi yakwe yakuwandichila (yangasausya kawa)
Verse 24 — Surah Al-Haqqah 69:24
(Tachasalila kuti): “Lyagani soni mwagani mwakusengwa ligongo lya ayila imwalongwesye m’mowa gagaapite (kala ku duniya).”
Verse 25 — Surah Al-Haqqah 69:25
Nambo kwa mundu jwatachipedwa chitabu chakwe cha kunkono wakwe wanchiji, basi tachiti (pakudandaula): “Nkongwene! Nabola nga nganimbedwa chitabu changu!”
Verse 26 — Surah Al-Haqqah 69:26
“Ningaatende ngachimanya chiwalanjilo changu!”
Verse 27 — Surah Al-Haqqah 69:27
“Ha! Nabola chiwa chila chikawe chipelela (changu ni ngaujila soni ku umi)!”
Verse 28 — Surah Al-Haqqah 69:28
“Nganichingamuchisya chipanje changu.”
Verse 29 — Surah Al-Haqqah 69:29
“Gaanjonasichile machili gangu (gakulichenjelela).”
Verse 30 — Surah Al-Haqqah 69:30
(Kuchiwechetedwa kuti): “Munkamulani soni muntawe makongwa.”
Verse 31 — Surah Al-Haqqah 69:31
“Kaneka ni mumponye ku Moto Waukali.”
Verse 32 — Surah Al-Haqqah 69:32
“Kaneko muntawikanye m’malundelunde (ga unyolo), ulewu wakwe makono makumi nsano nagawili .”
Verse 33 — Surah Al-Haqqah 69:33
Chisimu jwalakwe jwaliji jukaakunkulupilila Allah Jwakuchimbichika nnope
Verse 34 — Surah Al-Haqqah 69:34
Soni nganawa jwakuchisya yagaliisya masikini
Verse 35 — Surah Al-Haqqah 69:35
Basi nganakola jwalakwejo lelo kwekuno nsyowe (jwakunkamuchisya)
Verse 36 — Surah Al-Haqqah 69:36
Namuno yakulya ikaweje uwowu (wakusulula m’mawanga ga wandu wa ku Moto)
Verse 37 — Surah Al-Haqqah 69:37
Pangali watachiulya ikaweje wakulemwa
Verse 38 — Surah Al-Haqqah 69:38
Basi nguilumbila yankuiwona
Verse 39 — Surah Al-Haqqah 69:39
Ni yangankuiwona
Verse 40 — Surah Al-Haqqah 69:40
Chisimu jalakwe (Qur'aniji) liwele lilowe lya Ntenga Jwakuchimbichika (Jibulilu)
Verse 41 — Surah Al-Haqqah 69:41
Ni nganijiwa jalakwejo lilowe lya nkwimba chilaanga, yannonope ni yankuikulupilila
Verse 42 — Surah Al-Haqqah 69:42
Soni ngawa lilowe lya abimbi, yannonope ni yankukumbuchila
Verse 43 — Surah Al-Haqqah 69:43
(Jiwele) jakutulusyidwa kuumila kwa M'mbuje jwa iwumbe yosope
Verse 44 — Surah Al-Haqqah 69:44
Soni ingawe kuti (Muhammadi ﷺ) jwalukenye Kukwetu unami winewakwe
Verse 45 — Surah Al-Haqqah 69:45
Chisimu tukankwembekenye mwamachili
Verse 46 — Surah Al-Haqqah 69:46
Kaneka nitukakatile kwene mwa jwalakwejo ntasi (wakwe waumi nikuwa)
Verse 47 — Surah Al-Haqqah 69:47
Mwanti nga nganapatikana jwalijose mwa jenumanja jwakun'gosa (ku ipotesi Yetu)
Verse 48 — Surah Al-Haqqah 69:48
Soni chisimu jalakwe (Qur’ani) jiwele chikumbusyo kwa wakun'jogopa (Allah)
Verse 49 — Surah Al-Haqqah 69:49
Sonitu Uwwe tukumanyilila kusyene yanti mwa wanganyammwe mwana wakanila
Verse 50 — Surah Al-Haqqah 69:50
Soni chisimu jalakwe (Qur’ani) jichiwa jakwadandaulikasya kusyene achimakafili (ku Kiyama ndema jatachiuwona ntendele wa wajikuya ni ipotesi ya wajikana)
Verse 51 — Surah Al-Haqqah 69:51
Soni chisimu jalakweji jiwele jakuona kusyesyene
Verse 52 — Surah Al-Haqqah 69:52
Basi liswejesyani lina lya Ambuje wenu Wakuchimbichika nnope