Yau - Chapter 72

Jilani (mmwe Muhammadi ﷺ): “Ijuwulidwe kukwangu yanti likuga line lya majini lyapikanile (Qur’an), basi ni gatite (pakugasalila majini gajao): ‘Chisimu uwwe tupikene Qur’an jakusimosya

Jikongolela kuchongoko mwanti tujikulupilile, soni nganituwa tum’bwanganyisye M’mbuje gwetu ni chilichose

Soni chisimu Uchimbichimbi wa M’mbuje gwetu unyakwiche kusyene, nganijulitendela wankwakwe namuno mwanache

Soni chisimu jwam’bwawate mwetuwe jwaliji nkum'bechetela Allah yaukoleko wakunaula

Soni chisimu uwwe twaliji nkuganichisya yanti mundu ni lijini ngawa nkum'bechetela Allah yaunami

Soni chisimu achalume wachiwandu waliji nkulijuya mwa achalume wachijini, basi niwaliji nkwajonjechesya kusumba mpika pasambi

Soni chisimu wanganyao waiche mwaganisya mwamwaganichisyaga wanganyammwe kuti Allah ngawa nkutumisya (ntume) jwalijose (kuwandu ni majini)

Soni chisimu uwwe twasachilile kuja kwika kwinani, nambo twakusimene kuli kugumbele achilonda wamachili (wachilaika) ni yenje (yandondwa)

Soni chisimu uwwe (kala) twaliji nkutama mwalakwemo m’malo mwakupikanila (abali syakwinani), nambo jwatasache kuja kupikanila sanojino, takachisimane chenje (chandondwa) chili chin'juwilile

Soni chisimu uwwe ngatukumanyilila kuti, ana akusachiilidwa yangalumbana wali pa chilambo kapena M’mbuje gwao jukwasachilila chongoko

Soni chisimu mwetuwe mwana wane wambone, nambo wane mwetuwe nganawa iyyo. Tuwele (mikutula ja) matala gakulekangana-lekangana (ga dini)

Soni chisimu uwwe twaimanyi kusyene yanti ngawa nkunnepelaasya Allah (kutupa ilagasyo) pa chilambo pano, soni ngawa nkunnepelaasya pakutilila (kwinani)

Soni chisimu uwwe ndema jatuchipikene chongolo (Qur’an) tuchikulupilile, basi jwatankulupilile M’mbujeegwe nikuti ngajogopa kupungusyidwa (yambone yakwe) kapena kutwichidwa (nsigo wa sambi sya jwine)

Soni chisimu mwetuwe mwana Asilamu ni mwana wane mwetuwe wapombotale (kuleka litala lyagoloka lya Usilamu). Sano wajinjile mu Usilamu, basi wanganyao ni walungeme ku chongoko.”

Nambo awala wapombotele (kuleka Usilamu), nikuti chachiwa sasu sya ku Jahannama

Soni mwanti ingawe wajimilichiche (akupombotalao) petala (lya Usilamu), chisimu tungaamwesisye mesi gamajinji (nga nganalajila chilichose)

Kuti twalinje muwele (ukotowo yanti: Ana chapitilisye Usilamu kapena chakufulu)? Sano jwatakutundumalile kunkumbuchila M’mbujeegwe (Allah), tan'jinjisye ku ilagasyo yakusausya nnope

Soni chisimu misikiti nsyene jwakwe ni Allah, basi ngasimun'galagatila jwalijose pampepe ni Allah

Soni chisimu ndema ja jwajimi kapolo jwa Allah (Muhammadi ﷺ pa swala) achim'bombaga (Allah), wasigele panandi (achimajini) kuti ammate (ligongo lya winji nnope ni kunyambatikana pakusaka kupikanila Qur’an)

Jilani: “Chisimu ngun'galagatila M'mbuje gwangu pe, ni ngangum'bwanganya Najo julijose.”

Jilani: “Chisimu une nganingola kukwenu (machili gakumpela) isausyo kapena chongoko.”

Jilani: “Chisimu une ngawa nkuunjokola jwalijose (ku ipotesi ya) kuumila kwa Allah (naga ndili nannyosisye), soni ngawa nkupata kwakutilila kwangawaga Kukwakwe

Ikaweje kulungusya (yakuona) ya kuumila kwa Allah ni utenga Wakwe (gele ni machili gangwete une), sano jwatannyosye Allah ni Ntenga Jwakwe ﷺ; basi chisimu uwele wakwe jwalakwejo moto wa Jahannama, chakawe wandamo mwalakwemo yaka-yaka.”

Kwikanila ndema jataachiiwona yaakuwa ali nkupedwa chilanga (cha kwika kwakwe), pele nipatachimamyilila (yanti) ana wani waakwete nkwaakamuchisya jwangali machili ni waali chiwalanjilo channono

Jilani: “Ngangupata kumanyilila kuti ana ili pakuwandika (ipotesi) yankupedwa chilangayo kapena Ambuje wangu tayiwiichile ndawi jelewu!”

(Jwalakwe ni) Nkumanyilila yakusisika, basi ni jwangailosya yakusisika Yakweyo kwa jwalijose

Ikaweje Ntenga jwansagwile, basi chisimu akasam'biichilaga m'bujo mwakwe ni munyuma mwakwe (Achimalaika) wakunnonda-londa

Kuti amanyilile (Ntengajo) yanti pamasile pawaalungwisye (Achimitenga wane wosope) mautenga ga M’mbuje gwao, soni nikuti (Allah) ayisyuungwiile yali nayo (paaimanya chenene), soni ni akusenye chiwalanjilo cha chilichose