Yau - Chapter 73

E, mmwe wan'diwijiiliile mu nguwo

Jimani chilo (kuswali) ikaweje kandawi kannono

Litika lyakwe (½), kapena mpungusye mwitikamo panandi

Kapena n'jonjechesye petikalyo, ni nsoomeje Qur’an mwaakosowalila

Chisimu Uwwe chituntuluchisye mmwejo lilowe lyausito

Chisimu kwimuchila chilo (kuswali) nikwakuli kwakwinjilisya nnope (mu ntima), soni yakuwecheta yakwe ikasawaga yagoloka kusyene

Chisimu mmwejo muusi nkwete ipaka yejinji

Ni likumbuchilani lina lya Ambuje wenu (Allah pakulikolanga), soni lipelekani Kukwakwe nalipelekape

M'mbuje jwa kungopoko ni kungapililo, pangali nnungu jwine (jwakuwajilwa kun’galagatila) ikaweje Jwalakwe, basi muntendani kuwa Nkun'jegama

Soni pililani pa yaakuwecheta (achimakafili), ni mwawambalani kuwambala kwambone

Soni munekaani Une ni wakanila achinsyene ukoto (wa duniya), gambani kwalechelela panandipe (timalane nao)

Chisimu Kukwetu kwana matondolo gakulimbangana ni Moto Waukali

Ni yakulya yakwama (palukosi) kwisa soni ilagasyo yakupoteka nnope

Lisiku lya lichitenganyika litaka kwisa soni matumbi, ni gachiwa matumbigo chisau liunjili lya nsanga wakupwelembwesuka

Chisimu Uwwe tutumisye kukwenu Ntenga (Muhammadi ﷺ) kuwa mboni pa jenumanja, mpela yatwatite pakutumisya kwa Afiriauna Ntenga (Musa)

Nambo Afiriauna wannyosyisye Ntengajo, basi ni twaakwembekenye ni ilagasyo yakandapala kusyene

Ana chin'digose chinauli (ku ipotesi) naga nkulikanila Lisiku lyalichitendekasya wanache kola wuuli

Liwunde lichipasuka mu lyele Lisikuli (ligongo lya kogoya kwakwe), chilanga Chakwe (Allah) chichiwa chakutendekwa (mwangalepeleka)

Chisimu galakwe (ma Ayaga) gawele chikumbusyo, basi jwaakusaka aliikolochesye chilepe litala lyakuujila kwa M'bujegwe

Chisimu Ambuje wenu akumanyilila yanti mmwejo (Muhammadi ﷺ) nkwima (kuswali) mwakunandipila pa ipande iwili mu ipande itatu yaachilo (⅔), kapena litika lyakwe (½), kapena chimo mu ipande itatu (⅓), pamo ni likuga lya awala wan'di nao, sano Allah ni Jwaakupimila chenene (ulewu wa) chilo ni muusi, jwaimanyi yanti nganim'ba nkukwanisye kupimila kusyesyene (nikuswali mwannamulile, niligongo lyakwe n'gamba kuswali chilo chosope), basi ankululuchile (pakuusyaausya lilamusili). Kwaligongo lyele; soomagani chachijepepele chakuumila m Qur’an. Jwaimanyi yanti wane mwa jenumanja tachiwa wakulwala, soni wane tachiwa ali nkwendajenda pa chilambo kupita nchisosasosa umbone wa Allah, soni wane tachiwa ali nkuputa ngondo petala lya Allah, basi soomagani chachijepepele chakuumila mwele (mu Qur’animo), ni n'jimicheje Swala mwakolosya ni kutolaga Zaka, soni munkongosyeje Allah ngongole jambone. Soni chambone chilichose chankulilongochesya mwachimisyene tinkachisimane kwa Allah chili chambone nnope ni chamalipilo gekulungwa kusyene. Ni mum'bendagani chikuluko Allah, chisimu Allah ni Jwakululuka kusyene, Jwachanasa channope