Yau - Chapter 8

Akum'buusya ya chipanje chakupalagula (pa ngondo ja Badri kuti chigawidwe uli)? Jilani: “Chipanje chakupalagula chiwele cha Allah ni Ntenga ﷺ (ni wachagawanye). Basi mun'jogopani Allah ni kolosya yaili chilikati chenu (pakumasya utinda). Ni mumpikanilani Allah ni Ntenga Jwakwe nam'baga jenumanja n’di wakulupilila (kusyene).”

Chisimu wakulupilila (kusyene) ni awala waakutiji naga Allah achikolanjidwaga mitima jao jikasan'gumbalaga woga, soni pati achisoomeledwaga ma Aya Gakwe gakwajonjechesyaga chikulupi, soni kwa M'mbuje gwao pe ni kwaakwegamilaga

Awala waakwimikaga Swala mwakolosya, soni mu ichindu yatwapele akasatolaga

Wanganyao niwali wakulupilila kusyesyene. Akwete kupata wanganyao uchimbichimbi wakulekanganalekangana kwa M'mbuje gwao, ni chikululuko kwisa soni lisiki lyakuchimbichika (lya ku Mbepo)

(Kagawanye ka chipanje chakupalagula kaachimile wane mu wakulupilila pangaumanya ukoto wakwe), mpela yawatite pakunkoposya Ambuje wenu pannango penu (kuja kungondo ja Badri) mwakuonaonape, mwanti chisimu likuga line mu waakulupilila yachimile (pangaumanya ukoto wangondojo)

Akukanilana namwe pa yakuona (gagali magongo gangondojo) panyuma pakuonechela papaswela, (kajichime kakwe ngondojo) mpela atenda kuchinjilidwa kuchiwa aku ali nkulola

Soni (kumbuchilani) katema kawampaga chilanga Allah cha umo mwa mikutula jiwili kuti uwe wenu (mmenyane nao soni chiwwukombole, wauli nkutula wa asilikali), sano jemanja ni kusachililaga yanti (nkutula) wangali machili (wauli wamalonda) uwe wenu (wachimmenyane nao), kutendaga Allah akusaka kuchisimika chakuona ni malowe Gakwe, ni kata njiga sya achimakafili

Kuti achisimiche chakuona ni kuiwesesya yaukoleko, namuno yachime akulewa

(Kumbuchilani) katema kamwam'bendaga M'buje gwenu chikamuchisyo, basi niwan'janjile yanti: “Chisimu Une tinankamuchisye ni sausande jimo ja achimalaika wakutuluka mwakuyana.”

Ni nganaitenda yalakweyi Allah ikaweje kuti iwe abali jakusengwasya, ni kuti soni jipate kutulala ni yalakweyo mitima jenu, sano chikulupusyo nganichiwa chityochele kwinepe ikaweje kwa Allah, chisimu Allah ni Jwamachili gakupunda, Jwalunda lwakusokoka

(Kumbuchilani) katema kawankupwile (Allah) ni lugono kuwa ntunjelele wakuuma Kukwakwe, ni kuntuluchisya wanganyammwe kuumila kwinani mesi (ga wula) kuti answejesye nago ni kuntyochesya masongono ga shetani, nikuti amulimbanganye m’mitima mwenu (kuti mukawa ni woga), ni kulimbanganya nago makau (kuti gakawowochela munsanga)

(Kumbuchilani) katema kawajuwile Ambuje wenu kwa Achimalaika yanti: “Chisimu Une ndinamwe, basi mwalimbanganyani awala waakulupilile. Chindaje woga m’mitima ja awala waakanile, basi kunulaani pachanya pa ngosi, ni nkateje mwa wanganyao yala yosope (yammagasa ni mmakau)

Yalakweyo paligongo lyanti wanganyao watindene najo Allah ni Ntenga Jwakwe. Sano jwatatindane najo Allah ni Ntenga Jwakwe, basi (ni yakwe), chisimu Allah nijwaukali pakupeleka ipotesi

Yalakweyi (ni ilagasyo), basi ipasyani (jenumanja achimakafili pa duniya pano), soni chisimu akwete kupata achimakafili ilagasyo ya Moto (ku Akhera)

E junumanja wankulupilile! Pati nsimangene nao mwakuwandikana awala wakanile (pa ngondo), basi ngasimwalochesya migongo (kutila)

Sano jwataiche mwakwalochesya lyele lisikulyo n'gongo wakwe (kutila) - pangawaga galauka kwa itagu ya ngondo, kapena kusaka kuliwanga mu nkutula wine (wa Asilamu peo) - nikuti pamasile paawajilwe kupata gasabu jakuumila kwa Allah, soni liwuto lyakwe ni ku Jahannama. Kaje kusakala malo gakuujila gakwe

Mwanti jenumanja nganimwaulaga wanganyao nambo Allah ni jwawauleje, soni mmwe (Muhammadi ﷺ) nganimwasoma wanganyao ndema jamwaamiisiile (nsanga), nambo Allah ni jwawasomile (pakwalonda nao mmeso), ni kuti walinje wakulupilila kuumila Kukwakwe mayeso gambone. Chisimu Allah ni Jwakupikanichisya, Jwakumanyilila nnope

Yeleyi (ni yakuona yakwe), soni chisimu Allah ni Nkugatondoya malindi ga achimakafili

Naga mwawendaga chilamusi (jenumanja achimakafili chakupunda pangondo), basi pamasile pachim'bichilile chilamusi (chakumpunda Asilamu), sano naga nkuleka (kwatanda Asilamu), basi chiiwe yambone kukwenu, nambo naga nkuujauja (kwatanda), chituujauje (kwakamuchisya), soni likuga lyenu ngalinkamuchisya chilichose natamuno litupe chantiuli, soni chisimu Allah ali pamo ni wakulupilila

E jenumanja wankulupilile! Mumpikanilani Allah ni Ntenga Jwakwe, ni ngasimuntundumalila kutendaga jenumanja nchipikanaga

Soni kasim'ba nti chisawu awala (achinakunaku) wakutiji: “Tupikene.” Kutendaga akakupikana (kwakunda)

Chisimu inyama yakusakala nnope pameso pa Allah ni asiiwa (wangapikana yakuona) kwisa soni abubu (wangajitichisya yakuona) wali wangali lunda

Soni Allah angaumanye umbone uliose mwa wanganyao chisimu angaapiikaniisye, soni natamuno angaapiikanisye akatundumele aku achisyululaga

E jenumanja wankulupilile! Mun'jitikani Allah ni Ntenga ﷺ pati achim'bilanjilaga ku yampaka impe umi (wambone), soni manyililani yanti Allah jukusiwilikanganyaga chilikati cha mundu ni ntima wakwe (kuti akatenda yaukusaka ntimao), soni (manyililani) yanti Kukwakwe chinchisonganganyisyidwa

Soni ijogopani ipotesi yangawa nkwapata wawowopeo wakulitenda lupuso mwa jenumanja, (nambo mpaka yapate ni wambone wakwe naga ngakanya yakusakala), soni manyililani yanti Allah ni Jwaukali pakupeleka ipotesi

Soni kumbuchilani katema kamwaliji wakuwalanjika, wangalikombolela pa chilambo, nchijogopaga kunswamba wandu, basi niwan'juyiye (pamalo pantunjelele), niwan'dimbangenye ni chikamuchisyo Chakwe, nikumpa ichindu yambone kuti m'be wakutogolela

E jenumanja wankulupilile! Ngasimuntendela lupuso Allah ni Ntenga ﷺ ni kusitendela lupuso amana syenu (ichindu yansunjisyidwe), aku nchimanyililaga (kuti nkulemwa)

Soni manyililani yanti chisimu ipanje yenu kwisa soni wanache wenu jiwele fitina (jakun'dinga chikulupi chenu), soni yanti Allah Kukwakwe nikwagali malipilo gamakulungwa nnope

E jenumanja wankulupilile! Naga mun'jogopeje Allah, tam'biichile chilekanganyo (chakulekanganyichisya chilikati cha yakuona ni yaunami), ni tansiimaachisye yakusakala yenu, ni kunkululuchila. Soni Allah ni Nsyene umbone wekulungwa nnope

Soni (kumbuchilani mmwe Muhammadi ﷺ) ndema jawaliji nkuntendela malindi awala wakanile gakuti antawe, kapena am'bulaje, kapena ankoposye (m’musi wenu wa Maaka), waliji nkutenda malindi, sano Allah ni jwaliji nkuwesesya malindigo, soni Allah ni Jwambone nnope mwa akuwesesya malindi

Soni pati gachisoomedwaaga kukwao ma Aya Getu akasatiji: “Pakwete patupikene (yeleyi kala), tungawe tukusaka tungawechete yanti chisawu yeleyi, nganiyiwatu yeleyi ikaweje adisiadisi syawandu wandanda.”

Soni (kumbuchilani) katema kawatite: “E Allah! Naiwaga ayi (yaayiche nayo Muhammadi ﷺ) ili yakuona ya kuumila Kukwenu, basi tutuluchisyani wula jamaganga kuumila kwinani, kapena m'biche nayo kukwetu ilagasyo yakupoteka nnope.”

Ni nganawa Allah jwanti ni kwalagasya wanganyao kutendaga mmwe (Muhammadi ﷺ) n'di nao, soni Allah nganawa Nkwalagasya wanganyao kutendaga ali nkuwenda chikululuko

Soni chichi akwete wanganyao chaangaalagaachisya Allah, kutendaga wanganyao ali nkusiwilila (wandu) kwinjila mu Nsikiti Wakuchimbichika (wa Maaka), soni nganawa akuuchengeta wakwe? Pangali wampaka awe akuuchengeta wakwe ni ikaweje wakun'jogopa (Allah), nambo wajinji mwa wanganyao ngaakumanyilila

Ni nganijiwa swala jao pa Nyumba (ja Kaaba) ikaweje kwimba lulusi ni kwata m'myala. Basi pasyani ilagasyo ligongo lya ungakulupilila wenu

Chisimu awala wakanile akutolaga ipanje yao pakusiwilila (wandu) kwitala lya Allah. Basi taweje ali nkuitolape, nambo pambesi pakwe chigagambe kuwa madandausi kwa jemanjao, kaneka ni chaapundidwe, soni awala waakufuulu chachisonganganyisyidwa wa ku Jahannama

(Akwapaga machili achimakafili gakulimbana ni Asilamu), kuti Allah walekanganye wakusakala ni wambone, ni kwawika wakusakala wane mwa jamanjao pachanya pa wane, ni kwaunjika wosope wene basi ni kwaponya ku Jahannama, wanganyao niwali wakwasika

Mwasalilani awala waakufuulu (yanti); naga akuleka (ukafili) chakululuchilidwe yayalongolele, nambo naga akuujila soni (ku ukafili), basi matala ga (kaape ilagasyo wandu) wandanda pamasile pa gapite (kuwa chitetelo chao)

Soni mwaputani ngondo kwikanila fitina (ja galagatila isanamu) jikapatikana, ni jiwe dini josopejene jagalagatila Allah pe. Nambo naga akuleka (yagalagatila isanamuyo), basi chisimu Allah ichindu yaakutenda juwele Jwakuilolechesya

Nambo naga akugalauka, basi manyililani yanti Allah ni Akun'gosa wenu, Kaligoselo kambone nnope ni Nkukamuchisya jwambone kusyene

Soni manyililani yanti iliyose yampatile mu ipanje yakupalagula pangondo, basi chisimu liunjili limo m'maunjili nsano lipelechedwe kwa Allah ni Ntenga ﷺ kwisa soni waulongo (wa Ntenga ﷺ), wawina, masikini ni jwapaulendo, nam'baga jenumanja munkulupilile Allah ni yatwatulwisye kwa kapolo Jwetu (Muhammadi ﷺ) lisiku lyakulekanganya (yakuona ni yaunami), lisiku lyagaasimangene makuga gawili (likuga lya Asilamu ni lya makafili pa ngondo ja Badri). Sano Allah pa chindu chilichose juwele Jwakombola

(Kumbuchilani) katema kamwaliji jenumanja (likuga lya Asilamu) ku upande wachiwata wakuwandichila (ku Madina), kutendaga wanganyao (likuga lya makafili) ali ku upande wachiwata wakutalichila, sano nkutula wamalonda niuli chamwiwanda mwenu (kungulugulu mbwani). Ingawe mwatawene chilanga (chakusimanganilana), chisimu nkalekangene pa chilangacho. (Nambo mwasimangene yangagonela), kuti Allah akwanilisye kupitisya chilamusi chachaliji chelamulelamule, kuti ajonasiche wachajonasiche (pakusagula ukafili) panyuma pa chilosyo chakuonechela, ni awe ni umi wachawe umi (pakusagula chikulupi) panyuma pa chilosyo chakuonechela. Soni chisimu Allah ni Jwakupikanichisya, Jwakumanyilila nnope

(Kumbuchilani) katema kawannosyisye Allah wanganyao kulugono kwenu (mmwe Muhammadi ﷺ) ali wannono, mwanti akannosye ali wajinji, chisimu nkatengwiche wanganyammwe ni nkakanganile pakutawana nganisyo (syakumenyana nao), nambo kuti Allah wan'goosile (jenumanja). Chisimu Jwalakwe ni Jwakumanyilila yaili m’mitima

Soni (kumbuchilani) katema kamwasimangene (pa luwala lwangondo ja Badri, Allah) jwannosisye wanganyao m’meso mwenu kuwa wannono (kuti nkole ntau wakumenyana nao), ni wannaandiiye m’meso mwao (kuti akalichiliganya nnope, yoseyo) kuti akwanilisye Allah kupitisya chilamusi chachaliji chelamulelamule (chakwakombolasya Asilamu kwa amagongo wao), soni kwa Allah pe ni kwakuujila ichindu (yosope)

E jenumanja wankulupilile! Pati nsimangene nalyo likuga (lya amagongo), basi jimilichikani, ni munkolanjeje Allah kwannope kuti m'be wakupunda

Soni mumpikanilani Allah ni Ntenga Jwakwe ﷺ, ni ngasinkangana ntakwika muntengwiche ni kutyoka machili genu. Soni pililani, chisimu Allah juli pamo ni akupilila

Soni kasim'ba nti chisawu awala wana kopokaga m’milango mwao mwakutwanga ni kulionya kwa wandu, ni kusiwililaga (wandu) kwitala lya Allah. Sano Allah ichindu yaakutenda wanganyao juwele Jwaisyungula (kwaimanya chenene)

Soni (kumbuchilani) katema kajwasalalichisye shetani (achimakafili) itendo yao, ni jwatite: “Pangali mu wanduwa wampaka ankombole jenumanja lelo, soni chisimu une ni mnaasi jwenu (pachikamuchisyo chilichose).” Nambo ndema jagaonegene makuga gawili, jwaujile ku indende yakwe (kutila) ni jwatite: “Chisimu une mambalene nomwe, unetu ngwiona yangankuiona jenumanja (gagali malaika), unetu ngun'jogopa Allah, soni Allah ni Jwaukali pakupeleka ipotesi.”

(Kumbuchilani) katema kawawechetaga achinakunaku ni awala wamuli m’mitima mwao ulwele (waukafili) kuti: “Wanganyawa (Asilamu) janyenjile dini jao.” Sano jwatajegamile kwa Allah, basi chisimu Allah ni Jwamachili gakupunda, Jwalunda lwakusokoka

Soni ingawe mwaiweni pandema jaakutyosyaga Achimalaika umi wa awala waakufuulu (pakuwa), achaaputaga ku ngope syao ni ku migongo jao, soni (achasalilaga yanti): “Pasyani ilagasyo ya (Moto wa) koocha. (Nkaiweni yakogoya kusyene).”

“Yalakweyi niligongo lya (yakusakala) yagaalongwesye makono genu, soni chisimu Allah nganijuwa jwakwaatenda lupuso ata panandi achikapolo (Wakwe).”

(Nyendele ja makafili galeloga jili) chisawu nyendele ja wandu wa Firiauna ni awala wapaujo pao, wakanile imanyilo ya Allah, basi Allah ni wakwembekenye ligongo lya sambi syao, chisimu Allah ni Jwakulimbangana nnope, Jwaukali kusyene pakupeleka ipotesi

Yalakweyi niligongo lyanti Allah nganawa jwanti ni kuchigalausya chindimba chawapele wandu mpaka ali agalawisye (wanduo) umbone wauli m’mitima mwao, soni chisimu Allah ni Jwakupikanichisya, Jwakumanyilila nnope

(Nyendele ja makafili galeloga jili) chisawu nyendele ja wandu wa Firiauna ni awala wapaujo pao, wakaaniile imanyilo ya M’mbuje gwao (Allah), basi ni twaajonasile ligongo lya sambi syao, ni twamisyisye wandu wa Firiauna, soni wosope waliji wakulitenda lupuso

Chisimu inyama yakusakala nnope pameso pa Allah ni awala waakufuulu, basi wanganyao ngaakukulupilila

Awala wamwatawene nao chilanga, kaneka ni akukasaga chilanga chaocho ndawi ni katema, soni wanganyao ngaakun'jogopa (Allah)

Mwanti naga n'di mwapatikenye pa ngondo, basi mwabalalikanganyani ni wanganyawa wamunyuma mwao (pakwapa ilagasyo wanganyawa mwakwakalalichisya kuti aujilile wane waakasachilile kwakuya wanganyawa pakwalagasya Asilamu) kuti wanganyao aliwunde

Soni naga nkogopa chinyengo (chakasa chilanga) kutyochela kwa wandu, basi mwaponyelani (chilanga chao) mwakulandana (kuti pawe pangali chilanga chilikati chenu). Chisimu Allah jwaangaanonyela wachinyengo

Soni awala waakufuulu akaganichisya ata panandi yanti ampelete (Allah mwanti ngawa nkwatenda yakwatenda). Chisimu wanganyao nganawa annepelekasisye (Allah kwapa ipotesi)

Soni mwakosechelani (amagongowo) m’machili (gakuputila ngondo) mwachinkombolele, kwisa soni mahachi gewichidwe tayali, kuti mwajogoyechesye nago amagongo wa Allah ni amagongo wenu (achimakafili wa pa Maaka), ni wane wakwe wangawaga wanganyao, jenumanja ngankwamanyilila nambo Allah akwamanyilila, soni chilichose chachintole petala lya Allah tichikwanilisidwe kukwenu (malipilo gakwe), soni ngam'ba wakutendedwa lupuso

Sano naga achipendechelaga kuntunjelele, basi pendechelani kukoko nomwe ni n'jegamile kwa Allah. Chisimu Jwalakwe ni Jwakupikanichisya, Jwakumanyilila nnope

Soni naga achisakaga kuntenda chinyengo wanganyao, basi chisimu Allah chankwanile (kuwa akun'gosa wenu). Jwalakwe ni Ajula juwan'dimbangenye ni chikamuchisyo Chakwe, ni wakulupilila

Ni jwalumbikenye chilikati cha mitima jao (pakuwika chinonyelo sikati jao). Nantimuno nkaatoole yosope yaili pa chilambo (pakusachilila kulumbikanya mitima jao mwa jikajenu), nga nganimpakombola kulumbikanya chilikati cha mitima jao, nambo Allah jwalumbikenye chilikati chao. Chisimu Jwalakwe ni Jwamachili gakupunda, Jwalunda lwakusokoka

E mmwe Ntume ﷺ! Allah akunkwanila (kuwa akun'gosa wenu) pamo ni wankuyiye mu wakulupilila

E mmwe Ntume ﷺ! Mwalimbikasyani wakulupilila ya kumenyana ngondo (ni makafili). Naga ali apali mwa jenumanja (wandu) makumi gawili wakupililila, mpaka waakombole (amagongo) machila gawili , soni naga ali apali mwa jenumanja (wandu wakwana) lichila , mpaka wakombole (amagongo) wakwana sausande jimo (1000) mwa awala waakanile, ligongo lyanti wanganyao ni wandu wangali umanyilisi

Sambano Allah an'jepepachisye wanganyammwe, ni ayimanyi yanti mwa jenumanja mwana kutochomala, basi naga ali apali mwa jenumanja (wandu wakwana) lichila wakupililila mpaka wakombole (amagongo) machila gawili , soni naga ali apali mwa jenumanja (wandu) sausande jimo (1000) mpaka wakombole (amagongo) wakwana masausande gawili (2000) mwa lisosa lya Allah, soni Allah juli pamo ni akupilila

Nganiyiwajilwa kwa Ntume ﷺ kola mateeka ni mpakana ali atupiye kaje kuulaga (amagongo wakwe) pa chilambo. Nkusachilila ichindu ya duniya (mbote syaliombolela mateeka) kutendaga Allah jukusachilila (kuti mpate malipilo ga) Akhera! Sano Allah ni Jwamachili gakupunda, Jwalunda lwakusokoka

Chingawaga chilamusi chachalongolele chakuumila kwa Allah (chakunkundisya chipanje chakupalagula pa ngondo), chisimu ikankwayiye ilagasyo yekulungwa pa (mbote syaliombolela mateeka) syan'jigele

Basi lyagani mu yampalagwile pangondo (yaili) ya halaal nambo soni yambone, ni mun'jogopeje Allah. Chisimu Allah ni Jwakululuka kusyene, Jwachanasa channope

E mmwe Ntume ﷺ! Mwasalilani achimateeka wali m’makono mwenu (kuti): “Naga Allah aumanye umbone uliose m’mitima mwenu (wakunda Usilamu), champe yambone nnope kumpunda yaijigalidwe kuumila kukwenu, soni ni tankululuchile, soni Allah ni Jwakululuka kusyene, Jwachanasa channope.”

Sano naga akusaka kuntendela ulaamba (chiuwe wangali masengo kukwenu), ngati pamasile pawantendele Allah ulaamba kalakala, basi ni jwapeleche machili (kukwenu) gakwakombolela wanganyao, soni Allah ni Jwakumanyilila nnope, Jwalunda lwakusokoka

Chisimu awala waakulupilile, ni kusama (kuja ku Madina), ni kumenyana ngondo ni chipanje chao ni achimisyene wakwe petala lya Allah (Amuhajirina), kwisa soni awala (Answari) wawapele (wanganyao) pakutama ni kwakamuchisya, wele wanganyao ni asyowe (wakuchenjelana) wane ni wane.Sano awala waakulupilile nambo ni ngasama (kuja ku Madina), nganinkola kwachenjela kulikose mpaka akaasaame, nambo naga ali am'bendile chikamuchisyo pa Dini, basi mwakamuchisyani, ni ikaweje (naga ali atandene) ni wandu wachipali chilanga (chantunjelele chamwatawene) chilikati chenu ni wanganyao, soni Allah ichindu yankutenda awele Jwakuilolechesya

Nombe awala waakufuulu awele asyowe (wakuchenjelana) wane ni wane. Naga jenumanja (Asilamu) ngankutenda yele (yakuchenjelanayo) chipawe pana fitina (jangondo) pa chilambo ni kuwatanganya kwekulungwa

Sano awala waakulupilile, ni kusama (kuja ku Madina), ni kumenyana ngondo petala lya Allah (Amuhajirina), kwisa soni awala (Answari) wawapele (wanganyao) pakutama ni kwakamuchisya, wele wanyao ni wali wakulupilila kusyesyene, akwete kupata chikululuko kwisa soni lisiki lyakuchimbichika (lya ku Mbepo)

Sano awala waakulupilile panyuma (pa Amuhajirina ni Answari) ni kusama (kuja ku Madina), ni kumenyana ngondo pamo ni jenumanja, basi wanganyao ni wali mwa jenumanja. Nambo waulongo wakupagwana ni wali wakuwajilwa (kwinjilana chipanje) wane ni wane (mwaiwelele) m’chitabu cha Allah. Chisimu Allah chindu chilichose awele Jwakuchimanya chenene