Hausa - Chapter 23 - Al-Muminun

Lalle ne, Muminai* sun sami babban rabo

Waɗanda suke a cikin sallarsu masu tawali'u ne

Kuma waɗanda suke, sudaga barin yasassar magana, masu kau da kai ne

Kuma waɗanda suke ga zakka masu aikatawa ne

Kuma waɗanda suke ga farjojinsu masu tsarewa ne

Face a kan matan aurensu, ko kuwa abin da hannayen damansu suka mallaka to lalle su ba waɗanda ake zargi, ba, ne

Saboda haka wanda ya nemi abin da ke bayan wancan, to, waɗancan su ne masu ƙetarewar haddi

Kuma waɗanda suke, suga amanoninsu da alkawarinsu masu tsarewa ne

Kuma da waɗanda suke, su a kan sallolinsu suna tsarewa

Waɗannan, su ne magada

Waɗanda suke gadon (Aljannar) Firdausi,* su a cikinta madawwama ne

Kuma lalle ne, haƙiƙa, Mun halitta mutum daga wani tsantsa daga laka

Sa'an nan kuma Muka sanya shi, ɗigon maniyyi a cikin matabbata natsattsiya

Sa'an nan kuma Muka halitta shi gudan jini, sa'an nan Muka halitta gudan jinin tsoka, sa'an nan Muka halitta tsokar ta zama ƙasusuwa, sa'an nan Muka tufatar da ƙasusuwan da wani nama sa'an nan kuma Muka ƙaga shi wata halitta dabam. Saboda haka albarkun Allah sun bayyana, Shi ne Mafi kyawun masu halittawa

Sa'an nan kuma ku, bayan wannan, lalle ne masu mutuwa ne

Sa'an nan kuma lalle ne ku a Ranar alkiyama, za a iayar da ku

Kuma lalle ne haƙiƙa Mun halitta, a samanku, hanyoyi bakwai, kuma ba Mu kasance, daga barin halittar, Masu shagala ba

Muka saukar da ruwa daga sama bisa gwargwado, sa'an nan Muka zaunar da shi a cikin ƙasa alhali, lalle ne Mu, a kan tafiyar da shi, Masu iyawa ne

Sai Muka ƙaga muku, game da shi (ruwan), gonaki daga dainai da inabobi, kuna da, a cikinsu, 'ya'yan itacen marmari masu yawa, kuma daga gare su kuke ci

Da wata itaciya,* tana fita daga dutsin Saina'a, tana tsira da man shafawa, da man miya domin masu ci

Kuma lalle ne kuna da abin lura a cikin dabbobin ni'imomi Muna shayar da ku daga abin da yake a cikinsu, kuma kuna da a cikinsu abubuwan amfani* masu yawa, kuma daga gare su kuke ci

Kuma a kansu da a kan jirgin ruwa ake ɗaukar ku

Kuma lalle ne haƙiƙa Mun aika Nuhu zuwa ga mutanensa, sai ya ce: "Ya mutanena! Ku bauta wa Allah. Ba ku da wani abin bautawa waninsa. Shin, to, ba za ku yi taƙawa ba

Sai mashawarta waɗanda suka kafirta daga mutanensa, suka ce: "Wannan ba kowa ba ne, face mutum misalinku, yana nufin ya ɗaukaka a kanku. Da Allah Ya so, lalle ne da Ya saukar da Mala'iku, Ba muji (kome) ba, game da wannan, a cikin ubanninmu na farko

Shi bai zamo kowa ba face wani namiji ne, a gare shi akwai hauka, sai ku yi jinkiri da shi har wani lokaci

Ya ce: "Ya Ubangijina! Ka taimakeni Saboda mutanena sun ƙaryata ni

Sai Muka yi wahayi zuwa gare shi. "Ka sana'anta jirgin bisa ga idon Mu, da wahayinMu. To, idan umuminMu ya je, kuma tanda ta ɓuɓɓuga da ruwa, to, ka shigar a cikinta daga kome, ma'aura biyu, da iyalanka, sai wanda Magana ta gabata a kansa, daga gare su, kuma kada ka roƙe Ni (saboda wani) a cikin waɗanda suka yi zalunci, lalle ne su waɗanda ake nutsarwa ne

Sa'an nan idan ka daidaitu kai da waɗanda ke tare da kai a kan jirgin, sai ka ce: "Godiya ta tabbata ga Allah wanda Ya tsirar damu daga mutane azzalumai

Kuma ka ce: 'Ya Ubangijina! Ka saukar da ni, saukarwa mai albarka. Kuma Kai ne Mafi alherin masu saukarwa

Lalle ne a cikin wancan akwai ayoyi, ko da yake Mun kasance, haƙiƙa' Masu jarrabawa

Sa'an nan kuma Muka ƙaga wani ƙarni na waɗansu dabam daga bayansu

Sai Muka aika a cikinsu Manzo daga gare su. "Ku bauta wa Allah. Ba ku da wani abin bautawa, sai Shi. Shin to, ba za ku yi taƙawa ba

Mashawarta daga mutanensa, waɗanda suka kafirta kuma suka ƙaryata game da haɗuwa da Lahira, kuma Muka ni'imtar da su a cikin rayuwar duniya, suka ce: "Wannan ba kowa ba face wani mutum ne kamarku, yana ci daga abin da kuke ci daga gare shi, kuma yana sha daga abin da kuke sha

Kuma lalle ne idan kun yi ɗa' a ga mutum misalinku, lalle ne, a lokacin nan, haƙiƙa, ku masu hasara ne

Shin, yana yi muku wa'adin (cewa) lalle ku, idan kun mutu kuma kuka kasance turɓaya da kasusuwa lalle ne ku waɗanda ake fitarwa ne

Faufau faufau ga abin da ake yi muku wa'adi da shi

Rayuwa ba ta zama ba face rayuwarmu ta duniya, muna mutuwa kuma muna rayuwa,* kuma ba mu zama waɗanda ake tayarwa ba

Bai zama kowa ba face namiji, ya ƙirƙira ƙarya ga Allah, kuma ba mu zama, saboda shi, masu imani ba

Ya ce: "Ya Ubangijina! Ka taimake ni saboda sun ƙaryata ni

Ya ce: "Daga abu kaɗan, lalle ne za su wayi gari suna masu nadama

Sai tsawa ta kama su da gaskiya, sai Muka sanya su tunkuɓa. Saboda haka nisa ya tabbataga mutane azzalumai

Sa'an kuma Muka ƙaga halittar wasu ƙarnoni dabam daga bayansu

Wata al'umma ba ta gabatar ajalinta, kuma ba za su jinkirta ba

Sa'an nan kuma Muka aika da ManzanninMu jere a koda yaushe Manzon wata al'umma ya je mata, sai su ƙaryata shi, saboda haka Muka biyar da sashensu ga sashe, kuma Muka sanya su labarun hira. To, nisa ya tabbata ga mutane (waɗanda) ba su yin imani

Sa'an nan kuma Muka aika Musa da ɗan'uwansa Haruna, game da ayoyin Mu da, dalili bayyananne

Zuwa ga Fir'auna da majalisarsa, sai suka kangara, alhali sun kasance mutane ne marinjaya

Sai suka ce: "Shin, za Mu yi imani saboda wasu mutane biyu misalinmu, alhali kuwa mutanensu a gare mu, masu bauta ne

Sai suka ƙaryata su saboda haka suka kasance halakakku

Kuma lalle ne, haƙiƙa, Mun bai wa Musa littafi tsammaninsu* za su shiryu

Kuma Mun sanya ¦an Maryama, shi da uwarsa wata aya* Kuma Muka tattara su zuwa ga wani tsauni ma'abucin natsuwa da maremari

Ya ku Manzanni! Ku ci daga abubuwa masu daɗi* kuma ku aikata aikin ƙwarai. Lalle Niga abin da kuke aikatawa, Masani ne

Kuma lalle ne, wannan al'ummarku ce, al'umma guda, kuma Ni, Ubangijinku ne, sai ku bi Ni da taƙawa

Sai (al'ummar) suka yanyanke al'amarinsu a tsakaninsu guntu-guntu,* kowace ƙungiya suna masu farin ciki da abin da yake a gare su

To, ka bar su a cikin ɓatarsu har a wani lokaci

Shin, suna zaton cewa abin da Muke taimakon su da shi daga dukiya da ɗiya

Muna yi musu gaggawa ne a cikin alherori

Lalle ne waɗanda suke masu sauna sabo da tsoron Ubangijinsu

Da waɗanda suke, game da ayoyin Ubangijinsu suna imani

Da waɗanda suke game da Ubangijinsu ba su yin shirki

Da waɗanda ke bayar da abin da suka bayar, alhali kuwa zukatansu suna tsorace domin suna komawa zuwa ga Ubangijinsu

Waɗancan suna gaggawar tsere a cikin ayyukan alheri, alhali kuwa suna masu tserewa zuwa gare su (ayyukan alheri)

Kuma ba Mu kallafa wa rai face abin iyawarsa, kuma a wurinMu akwai wani Littafi wanda yake magana da gakiya, kuma su ba a zaluntar su

A'a, zukatansu suna cikin jahilci daga wannan (magana), kuma suna da waɗansu ayyuka, baicin wancan, su a gare su, masu aikatawa ne

Har idan Mun kama mani'imtansu da azaba, sai ga su suna hargowa

Kada ku yi hargowa a yau, lalle ne ku, daga gare Mu ba a taimakon ku

Lalle ne, ayoyiNa sun kasance ana karatun su a kanku, sai kuka kasance, a kan dugaduganku, kuna komawa baya

Kuna masu girman kai gare shi (Annabi), da hira kuna alfasha

Shin fa, ba su yi ta'ammalin maganar (Alƙur'ani) ba, ko abin da bai je wa ubanninsu na farko ba ne ya je musu

Ko ba su san Manzonsu ba ne domin haka suke masu musu a gare shi

Ko suna cewa, "Akwai hauka gare shi?" A'a, ya zo musu da gaskiya, alhali kuwa mafi yawansu, ga gaskiya, masu ƙi ne

Kuma da gaskiya (Alƙur'ani) ya bi son zuciyoyinsu, haƙiƙa da sammai da ƙasa da wanda yake a cikinsu sun ɓaci. A'a, Mun tafo musu da ambaton* (darajar) su, sa'an nan su daga barin ambaton su masu bijirewa ne, bijirewa

Ko kana tambayar su wani haraji ne (a kan iyar da Manzanci a gare su)? To, harajin Ubangijinka ne mafi alheri kuma Shi ne Mafi alherin masu ciyarwa

Kuma lalle ne kai haƙiƙa kana kiran su zuwa ga hanya madaidaiciya

Kuma lalle waɗanda ba su yi imani da Lahira ba masu karkacewa daga hanya ne

Kuma da Mun ji tausayinsu, kuma Muka kuranye musu abin da yake tare da su na cuta, lalle ne da sun yi zurfi a cikin ɓatarsu, suna ɗimuwa

Kuma lalle ne haƙiƙa Muna kama su da azaba* sai dai ba su saukar da kai ba, ga Ubangijinsu, kama ba su yin tawali'u

Har idan Mun buɗe, akansu, wata ƙofa mai azaba mai tsanani sai ga su a cikinta suna masu mugi

Kuma Shi ne Wanda Ya ƙaga halittar ji da gani da zukata dominku. Kaɗan ƙwarai kuke godewa

Kuma Shi ne Ya halitta ku a cikin ƙasa, kuma zuwa gare Shi ake tayar da ku

Kuma Shi ne Wanda Yake rayarwa, kuma Yana matarwa, kuma a gare Shi ne saɓawar dare da yini take. Shin, to, ba za ku hankalta ba

A'a, sun faɗi misalin abin da na farko suka faɗa

Suka ce: "Shin idan mun mutu kuma muka kasance turɓaya da ƙasusuwa shin lale ne mu haƙiƙa waɗanda ake tayarwa ne

Lalle ne, haƙiƙa, an yi mana wa'adi, mu da ubanninmu ga wannan a gabani, wannan abu bai zama kome ba, face tatsuniyoyin na farko

Ka ce: "Wane ne da mulkin ƙasa da wanda ke a cikinta, idan kun kasance kuna sani

Za su ce: "Ta Allah ne." Ka ce, "Shin, to, ba za ku yi tunani ba

Ka ce: "Wane ne Ubangijin sammai bakwai kuma Ubangijin Al'arshi mai girma

Za su ce: "Na Allah ne." Ka ce, "Shin, to, ba za ku bi Shi da taƙawa ba

Ka ce: "Wane ne ga hannunsa mallakar kowane abu take alhali kuwa shi yana tsarewar wani, kuma ba a tsare kowa daga gare shi, idan kun kasance kuna sani

Za su ce: "Ga Allah yake." Ka ce: "To, yaya ake sihirce ku

A'a, Mun zo musu da gaskiya, kuma lalle ne su, haƙiƙa, maƙaryata ne

Allah bai riƙi wani abin haihuwa ba, kuma babu wani abin bautawa tare da Shi. Idan haka ne (akwai abin bautawa tare da Shi), lalle ne da kowane abin bautawar ya tafi da abin da ya halitta, kuma lalle ne, da waɗansu sun rinjaya a kan waɗansu, tsarki ya tabbata ga Allah, daga abin da suke siffantawa

Masanin ɓoye da bayyane. sa'an nan Ya ɗaukaka daga barin abin da suke yi na shirka

Ka ce: "Ya Ubangijina! Ko dai Ka nuna mini abin da ake yi musu wa'adi da shi

Ya Ubangijina, to, kada Ka sanya ni a cikin mutane azzalumai

Kuma lalle ne Mu haƙiƙa Masu iyawa ne a kan Mu nuna maka abin da Muke yi musu wa'adi da shi

Ka tunkuɗe cuta da wadda take ita ce mafi kyau. Mu ne Mafi sani game da abin da suke siffantawa

Ka ce: "Ya Ubangijina, ina neman tsari da Kai daga fizge-fizgen Shaiɗanu

Kuma ina neman tsari da Kai, ya Ubangijina! Domin kada su halarto ni

Har idan mutuwa ta je wa ɗayansu, sai ya ce: "Ya Ubangijina, Ku mayar da ni (duniya)

Tsammanina in aikata aiki na ƙwarai cikin abin da na bari." Kayya! Lalle ne ita kalma ce, shi ne mafaɗinta, alhali kuwa a baya gare su akwai wani shamaki har ranar da za a tayar da su

Sa'an nan idan an yi busa a cikin ƙaho, to, babu dangantakoki a tsakaninsu a ranar nan kuma ba za su tambayi junansu ba

To, wadanda sikelinsu ya yi nauyi, to, waɗannan su ne masu babban rabo

Kuma waɗanda sikelinsu ya yi sauƙi, to, waɗannan ne waɗanda suka yi hasarar rayukansu suna madawwama a cikin Jahannama

Fuskokinsu suna balbalar wuta, kuma su a cikinta masu yagaggun leɓɓa daga haƙora ne

Shin, ayoyiNa ba su kasance ana karanta su a kanku ba sai kuka kasance game da su kuna ƙaryatawa

Suka ce: "Ya Ubangijinmu, shaƙawace ta rinjaya a kanmu, kuma mun kasance mutane ɓatattu

Ya Ubangjinmu! Ka fitar da mu daga gare ta, sa'an nan idan mun koma, to, lalle ne, mu ne masu zalunci

Ya ce: "Ku tafi (da wulakanci) a cikinta. Kada ku yi Mini magana

Lalle ne waɗansu ƙungiyoyi daga bayiNa sun kasance suna cewa, "Ya Ubangijinmu! Mun yi imani, sai Ka gafarta mana, kuma Ka yi mana rahama, kuma Kai ne Mafi alherin masu tausayi

Sai kuka riƙe su leburori har suka mantar da ku ambato Na kuma kun kasance, daga gare su kuke yin dariya

Lalle ne Ni Ina saka musu a yau, saboda abin da suka yi wa haƙuri. Domin lalle ne su su ne masu samun babban rabo

Ya ce: "Nawa kuka zauna a cikin ƙasa na ƙidayar shekaru

Suka ce: "Mun zauna a yini ɗaya ko rabin yini, sai ka tambayi masu ƙidayawa

Ya ce: "Ba ku zauna ba face kaɗan, da dai kun kasance kuna sani

Shin, to, kun yi zaton cewa Mun halitta ku ne da wasa kuma lalle ku, zuwa gare Mu, ba za ku komo ba

Allah Mamallaki gaskiya, Ya ɗaukaka. Babu abin bautawa, face Shi. Shi ne Ubangijin Al'arshi, mai daraja

Kuma wanda ya kira, tare da Allah, waɗansu abubuwan bautawa na dabam, ba yana da wani dalili game da shi (kiran) ba, to hisabinsa yana wurin Ubangijinsa kawai. Lalle ne, kafirai ba su cin nasara

Kuma ka ce: "Ya Ubangijina! Ka yi gafara, Ka yi rahama, kuma Kai ne Mafi alherin masu rahama