Hausa - Chapter 40 - Ghafir

H. M

Saukar da Littafi daga Allah ne, Mabuwayi, Masani

Mai gafarta zunubi kuma Mai karɓar tuba Mai tsananin azaba, Mai wadatarwa babu abin bautawa face Shi, zuwa gare Shi makoma take

Babu mai jayayya a cikin ayoyin Allah, face waɗanda suka kafirta. Saboda haka kada juyawarsu a cikin garuruwa ta ruɗe ka

Mutanen Nuhu sun ƙaryata a gabaninsu, da ƙungiyoyin da suke a bayansu, kuma kowace al'umma ta yi nufi game da Manzonsu, domin su kama shi. Kuma suka yi jayayya da ƙarya domin su gusar da gaskiya da ita. Sai Na kama su. To, yaya azaba Ta take

Kuma kamar haka kalmar Ubangijinka ta wajaba a kan waɗanda suka kafirta, domin su 'yan wuta ne

Waɗanda ke ɗaukar Al'arshi da waɗanda ke kewayenta, suna tasbihi game da gode wa Ubangijinsu, kuma suna yin imani da Shi, kuma suna yin istigfari domin waɗanda suka yi imani, (suna cewa), "Ya Ubangijinmu! Ka yalwaci dukan kome da rahama da ilmi to Ka yi gafara ga waɗanda suka tuba kuma suka bi hanyarKa, kuma Ka tsare musu azabar Jahim

Ya Ubangijinmu! Kuma Ka shigar da su a gidajen Aljannar zama, wannan da Ka yi musu wa'adi, su da wanda ya kyautatu daga ubanninsu da matan aurensu da zurriyarsu. Lalle Kai, Kai ne Mabuwayi, Mai hikima

Kuma Ka tsare su daga munanan ayyuka, kuma wanda Ka tsare shi daga munanan ayyuka a ranarnan, to, lalle, Ka yi masa rahama kuma wancan shi ne babban rabo mai girma

Lalle waɗanda suka kafirta, ana kiran su, "Haƙiƙa, ƙin Allah (a gare ku) shi ne mafi girma daga ƙinku ga kanku a lokacin da ake kiran ku zuwa ga imani, sai kuna ta kafircewa

Suka ce: "Ya Ubangijinmu! Ka matar da mu sau biyu, kuma Ka rayar da mu sau biyu, saboda haka mun yarda da laifuffukan mu. To, shin, akwai wata hanya zuwa ga fita

Wancan sababinsa, lalle (shi ne) idan an kirayi Allah Shi kaɗai, sai ku kafirta, kuma idan aka yi shirki game da Shi, sai ku yi imani. To, hukuncin fa, na Allah Maɗaukaki, Mai girma ne

Shi ne Wanda ke nuna muku ayoyin Sa, kuma Ya saukar da arziki daga sama saboda ku, kuma babu mai yin tunani face mai mayar da al'amari ga Allah

Saboda haka ku kirayi Allah, kuna masu tsarkake addini a gare Shi, kuma ko da kafirai sun ƙi

Mai ɗaukaka darajoji (domin muminai), Mai Al'arshi, Yana jefa ruhi *daga al'amarinSa a kan wanda Ya so daga bayinSa, domin ya yi gargaɗi kan ranar gamuwa

Ranar da suke bayyanannu, babu wani abu daga gare su wanda yake iya boyuwa ga Allah. "Mulki ga wa ya ke a yau?" Yana ga Allah, Makaɗaici, Mai tilastawa

Yau ana saka wa kowane rai a game da abin da ya aikata, babu zalunci a yau. Lalle Allah Mai gaggawar hisabi ne

Kuma ka yi musu gargaɗi kan ranar (Sa'a) makusanciya, a lokacin da zukata suke masu cika da bakin ciki, ga maƙosansu. Babu wani masoyi ga azzalumai, kuma babu wani mai ceto da za a yi wa da'a (ga cetonsu)

(Allah) Ya san yaudarar idanu da abin da ƙiraza ke ɓoyewa

Kuma Allah Shi ke yin hukunci da gaskiya, waɗannan da kuke kira, wanin Sa, ba su yin hukunci da kome. Lalle Allah, Shi ne Mai ji, Mai gani

Ashe, ba su yi tafiya ba, a cikin ƙasa, domin su duba ga yadda aƙibar waɗanda suka kasance a gabaninsu ta zama? Sun kasance su ne mafi tsananin ƙarfi daga gare su, da kufaifan aiki a cikin ƙasa, sai Allah Ya kama su da laifuffukansu. Kuma ba su da wani mai tsarewa daga Allah

Wancan sababinsa, domin su Manzanninsu sun kasance suna zuwa gare su da hujjoji bayyanannu, sai suka kafirta, sai Allah Ya kama su. Lalle Shi Mai ƙarfi ne, Mai tsananin azaba

Kuma lalle ne, haƙiƙa, Mun aika Musa a game da ayoyinMu da wani dalili bayyananne

Zuwa ga Fir'auna da Hamana da Karuna, sai suka ce: "Mai sihiri ne, maƙaryaci

Sa'an nan, a lokacin da ya je musu da gaskiya daga wurinMu, suka ce: "Ku kashe ɗiyan waɗanda suka yi imani tare da shi, kuma ku rayar da matansu." Kuma mugun shirin kafirai, bai zama ba face a cikin bata

Kuma Fir'auna ya ce: "Ku bar ni in kashe Musa, kuma shi, ya kirayi Ubangijinsa. Lalle ne ni, ina tsoron ya musanya addininku, ko kuwa ya bayyana ɓarna a cikin kasa

Kuma Musa ya ce: "Lalle ni, na nemi tsari da Ubangijina kuma Ubangijinku, daga dukan makangari, wanda ba ya imani da ranar Hisabi

Kuma wani namiji mumini daga dangin Fir'auna, yana boye imaninsa, ya ce: "Ashe, za ku kashe mutum domin ya ce Ubangijina Allah ne, alhali kuwa haƙiƙa ya zo muku da hujjoji bayyanannu daga Ubangijinku? Idan ya kasance maƙaryaci ne, to, ƙaryarsa na kansa, kuma idan ya kasance mai gaskiya ne, sashen abin da yake yi muku wa'adi zai same ku. Lalle ne Allah ba Ya shiryar da wanda yake mai barna, mai yawan ƙarya

Ya ku mutanena! Kuna da mulki a yau, kuma ku ne marinjaya a cikin kasa to wane ne zai taimake mu daga azabar Allah idan ta zo mana?" Fir'auna ya ce: "Ba ni nunamuku kome face abin da na gani, kuma ba ni shiryar da ku, sai ga hanyar shiryuwa

Kuma wannan da ya yi imani ya ce: "Ya mutanena! Lallene, ni, ina yi muku tsoron kwatankwacin ranar ƙungiyoyi

Kwatankwacin al'adar mutanen Nuhu da Adawa da Samudawa da waɗanda ke a bayansu. Kuma Allah ba Ya nufin zalunci ga bayin Sa

Kuma ya mutanena! Lalleni, ina yi muku tsoron ranar kiran juna

A ranar da za ku juya, kuna masu bayar da baya (gudane) ba ku da wani mai tsaro daga Allah. Kuma wanda Allah Ya ɓatar, to, ba shi da wani mai shiryarwa

Kuma lalle ne, haƙiƙa, Yusufu ya zo muku daga gabani, da hujjoji bayyanannu, ba ku gushe ba kuna a cikin shakka daga abin da ya zo muku da shi, har a lokacin da ya halaka kuka ce, 'Allah ba zai aiko wani Manzo ba, a bayansa.' Kamar haka Allah ke ɓatar da wanda yake mai ɓarna, mai shakka

Waɗanda kejayayya a cikin ayoyin Allah, ba da wani dalili da ya zo musu ba. Jidalin ya girma ga zamansa abin ki a wurin Allah da wurin waɗanda suka yi imani. Kamar haka Allah ke bicewar haske a kan zuciyar dukan makangari, mai tilastawa

Kuma Fir'auna ye ce, "Ya Hamana! Ka gina mini bene, dammanina za ni isa ga ƙofofi

¡ofofin sammai domin in yi ninƙaya zuwa ga abin bautawar Musa. Kuma lalle ni haƙiƙa ina zaton sa maƙaryaci." Kuma haka dai aka ƙawace wa Fir'auna munanan aikinsa kuma aka danne shi daga barin tafarki. Kuma mugun nufin Fir'auna bai zama ba face yana a cikin hasara

Kuma wannan da ya yi imani ya ce: "Ya mutanena! Ku bi ni, in shiryar da ku tafarkin shiryuwa

Kuma ya mutanena! Wannan rayuwa ta duniya dan jin daɗi ne kawai, kuma lalle Lahira ita ce gidan tabbata

Wanda ya aikata mummunan aiki to, ba za a saka masa ba face da misalinsa, kuma wanda ya aikata aiki na ƙwarai daga namiji ko mace alhali kuwa shi mumini ne, to, waɗannan suna shiga Aljanna, ana ciyar da su a cikinta, ba da lissafi ba

Kuma ya mutanena! Me ya same ni, ina kiran ku zuwa ga tsira, kuma kuna kira na zuwa ga wuta

Kuna kira na zuwa ga in kafirta da Allah, kuma in yi shirki, game da Shi, da abin da babu wani ilmi game da shi gare ni, kuma ni ina kiran ku zuwa ga Mabuwayi, Mai gafara

Haƙƙan ne abin da kawai kuke kira na zuwa gare shi, ba ya da wani kira a cikin duniya, kuma ba shi da shi a Lahira kuma lalle makomarmu zuwa ga Allah take, kuma lalle mabarnata su ne 'yan wuta

To za ku ambaci abin da nake gaya muku, kuma ina fawwala al'amarina zuwa ga Allah. Lalle Allah Mai gani ne ga bayin Sa

Sai Allah Ya tsare shi daga munanan abubuwa da suka yi na makirci, kuma mummunar azaba ta wajaba ga mutanen Fir'auna

Wuta, ana gitta su a kanta, safe da maraice, kuma a ranar da Sa'a take tsayuwa, ana cewa, "Ku shigar da mutanen Fir'auna a mafi tsananin azaba

Kuma a lokacin da suke husuma a cikin wuta, sai raunana (mabiya) su ce wa waɗanda suka kangara (shugabanni), "Lalle mu, mun kasance mabiya gare ku, to, shin ku masu wadatar da mu ne daga barin wani rabo daga wuta

Waɗanda suka kangara suka ce: "Lalle mu duka muna a cikinta. Lalle ne, Allah Ya yi hukunci a tsakanin bayin Sa

Kuma waɗanda suke a cikin wuta suka ce wa matsaran Jahannama, "Ku roki Ubangijinku Ya sauƙaƙa mana, a yini ɗaya, daga azaba

Suka ce: "Ashe, Manzanninku ba su je muku da hujjoji bayyanannu ba?" Suka ce: "Na'am, sun je!" Suka ce: "To, ku roƙa." Kuma roƙon kafirai bai zamo ba face a cikin ɓata

Lalle Mu, hakika, Muna taimakon ManzanninMu da waɗanda suka yi imani, a cikin rayuwar duniya da ranar da shaidu ke tsayawa

Ranar da uzurin azzalumai ba ya amfaninsu, kuma suna da la'ana, kuma suna da munin gida

Kuma lalle haƙiƙa, Mun bai wa Musa shiriya, kuma Mun gadar da Bani Isra'ila Littafi

Shiryarwa da tunawa ga ma'abuta hankali

Saboda haka, ka yi haƙuri, lalle wa'adin Allah gaskiya ne. Kuma ka nemi gafara ga zunubinka, kuma ka yi tasbihi game da gode wa Ubangijinka, maraice da kuma wayewar safiya

Lalle waɗanda ke jayayya a cikin ayoyin Allah, ba game da wani dalili wanda ya je musu ba, babu kome a cikin kirazansu, face girman kai, ba su zama masu isa ga gurinsu ba, saboda haka ka nemi tsari daga Allah. Lalle Shi, Shi ne Mai ji, Mai gani

Lalle halittar sammai da ƙasa, ita ce mafi girma daga halittar mutane, kuma amma mafi yawan mutane ba su sani ba

Kuma makaho da mai gani ba su daidaita kuma waɗanda suka yi imani suka, aikata ayyukan ƙwarai da mai munanawa ba su daidaita. Kaɗan ƙwarai, kuke yin tunani

Lalle Sa'a, haƙiƙa mai zuwa ce, babu shakka a gare ta, kuma amma mafi yawan mutane ba su yin imani

Kuma Ubangijinku ya ce: "Ku kira Ni in karɓa muku. Lalle waɗannan da ke kangara daga barin bauta Mini, za su shiga Jahannama suna ƙasƙantattu

Allah ne Wanda Ya sanya muku dare domin ku natsu a cikinsa, da rana mai ganarwa. Lalle Allah, haƙiƙa, Ma'abucin falala ne a kan mutane, kuma amma mafi yawan mutane ba su godewa

Wancan shine Allah Ubangijinku, Mahaliccin dukan kome, babu abin bautawa face Shi. To, yaya ake karkatar da ku

Kamar haka ake karkatar da waɗanda suka kasance suna jayayya game da ayoyin Allah

Allah ne Ya sanya muku kasa tabbatacciya, da sama ginanniya, kuma Ya suranta ku, sa'an nan Ya kyautata surorinku,, kuma Ya azurta ku daga abubuwa masu daɗi. Wancan Shine Allah Ubangijinku. To, albarkar Allah Ubangijin halittu ta bayyana

Shi ne Mai rai, babu abin bautawa face Shi. Saboda haka ku kira Shi, kuna masu tsarkake addini a gare Shi. Godiya ta tabbata ga Allah Ubangijin halittu

Ka ce: "Lalle ni, an hana ni in bauta wa waɗanda kuke kira waɗansun Allah a lokacin da hujjoji bayyanannu suka zo mini daga Ubangijina, kuma an umurce ni in sallama ga Ubangijin halittu

Shi ne Wanda Ya halitta ku daga turɓaya, sa'an nan daga maniyyi, sa'an nan daga saren jini, sa'an nan Ya fitar da ku kuna jariri, sa'an nan domin ku isa ga cikar ƙarfinku sa'an nan domin ku kasance tsofaffi, kuma daga cikinku, akwai wanda ake karɓar ransa a gabanin haka, kuma domin ku isa ga ajali ambatacce, kuma dammaninku ko za ku hankalta

Shi ne Wanda ke rayarwa kuma Yana kashewa. To, idan Ya hukunta wani al'amari, to, Yana cewa kawai gare shi, ka kasance sai yana kasancewa (kamar yadda ake bukatar sa)

Ashe, ba ka gani ba ga waɗanda ke jayayya a cikin ayoyin Allah, yadda ake karkatar da su

Waɗanda suka ƙaryata, game da Littafin, kuma da abin da Muka aika Manzanninmu da shi. To, za su sani

A lokacin da ƙuƙumma suke a cikin wuyoyinsu, da sarƙoƙi ana jan su

A cikin ruwan zafi, sa'an nan a cikin wuta ana babbaka su

Sa'an nan a ce musu, "Ina abin da kuka kasance kuna shirki da shi

Wanin Allah?" Suka ce: "Sun ɓace mana. A'a, ba mu kasance muna kiran kome ba a gabani."Kamar wancan ne Allah Yake ɓatar da kafirai

Wancan domin abin da kuka kasance ne kuna farin ciki da shi, a cikin ƙasa, ba da hakki ba, kuma da abin da kuka kasance kuna yi na nishaɗi

Ku shiga kofofin Jahannama kuna madawwama a cikinta. To, mazaunin masu girman kai ya munana

Saboda haka ka yi haƙuri. Lalle wa'adin Allah gaskiya ne. To, ko dai lalle Mu nuna maka sashen abin da Muka yi musu wa'adi da shi ko kuwa lalle Mu karɓi ranka, to, zuwa gare Mu ake mayar da su

Kuma lalle haƙiƙa, Mun aika wasu Manzanni daga gabaninka, daga cikinsu akwai wanda Muka ƙissanta maka labarinsa kuma daga cikinsu akwai wanda ba Mu ƙissanta labarinsa ba a gare ka. Ba ya yiwuwa ga wani Manzo ya je da wata ayar mu'ujiza face da iznin Allah. Sa'an nan idan umurnin Allah ya je, sai a yi hukunci da gaskiya, masu ɓatawa sun yi hasara a can

Allah ne Wanda Ya sanya muku dabbobi domin ku hau daga gare su, kuma daga gare su kuke ci

Kuma kuna da abubuwan amfani a cikinsu, kuma domin ku isar da wata buƙata, a cikin ƙirazanku a kansu kuma a kansu da a kan jirage ake, ɗaukar ku

Kuma Ya nuna muku ayoyin Sa. To, wane ayoyin Allah kuke musu

Ashe fa, ba su yi tafiya a cikin ƙasa ba, domin su duba yadda aƙibar waɗanda ke a gabaninsu ta kasance? Sun kasance mafi yawa daga gare su. Kuma sun fi tsananin ƙarfi, da (yawan) gurabun sana'o'i a cikin ƙasa. To, abin da suka kasance suna aikatawa bai wadatar da su ba

A lokacin da Manzanninsu suka je musu da hujjoji bayyanannu, suka yi farin ciki da abin da ke wurinsu na ilmi* kuma abin da suka kasance suna yi na izgili da shi ya wajaba a kansu

Sa'an nan a lokacin da suka ga azabarMu, suka ce: "Mun yi imani da Allah, Shi kaɗai, kuma mun kafirta da abin da muka kasance muna shirki da shi

To imaninsu bai kasance yana amfaninsu ba a lokacin da suka ga azabarMu. Hanyar Allah wadda ta gabata a cikin bayin Sa. Kuma kafirai sun yi hasara a can