Hausa - Chapter 44 - Ad-Dukhan

H. M

Ina rantsuwa da Littafi Mabayyani

Lalle ne, Mu, Muka saukar da shi a cikin wani dare mai albarka. Lalle Mu' Mun kasance Masu yin gargaɗi

A cikinsa (shi daren) ake rarrabe kowane umurui bayyananne

Umurni na daga wurin Mu. Lalle Mu ne Muka kasance Masu aikawa

Saboda rahama daga Ubangijinka. Lalle Shi, Shi ne Mai ji, Masani

(Shi ne) Ubangijin sammai da ƙasa da abin da ke a tsakaninsu, idan kun kasance masu yaƙini (za ku gane haka)

Babu abin bautawa face Shi. Yana rayarwa Kuma Yana kashewa. (Shi ne) Ubangijinku, kuma Ubangijin ubanninku na farko

A'a su, suna wasa a cikin shakka

Saboda haka, ka dakata ranar da sama za ta zo da hayaƙi bayyananne

Yana rufe mutane. Wannan wata azaba ce mai raɗaɗi

Ya Ubangijinmu! Ka kuranye mana azaba. Lalle Mu, masu imani ne

Ina tunawa take a gare su, alhali kuwa, haƙiƙa, Manzo mai bayyanawa Ya je musu (da gargaɗin saukar azabar, ba su karɓa ba)

Sa'an nan suka juya baya daga gare shi, Kuma suka ce: "Wanda ake gayawa* ne, mahaukaci

Lalle Mu, Masu kuranyewar azaba ne, a ɗan lokaci kaɗan, lalle ku, masu komawa ne (ga laifin)

Ranar da Muke damƙa, damƙa mafi girma, lalle ne Mu masu azabar ramuwa ne

Kuma lalle ne haƙiƙa a gabaninsu, Mun fitini mutanen Fir'auna, kuma wani Manzo karimi ya je musu

(Mazon ya ce): "Ku kawo mini (imaninku) ya bayin Allah! Lalle ni, Manzo ne amintacce zuwa gare ku

Kuma kada ku nemi ɗaukaka a kan Allah. Lalle ni mai zo muku ne da dalili bayyananne

Kuma lalle ni na nemi tsari da Ubangijina, kuma Ubangijinku, domin kada ku jefe ni

Kuma idan ba ku yi imani saboda ni ba, to, ku nisance ni

Sai ya kirayi Ubangjinsa cewa waɗannan mutanene masu laifi

(Allah Ya ce): "To, ka yi tafiyar dare da bayiNa, da dare. Lalle ku, waɗanda ake bi ne (domin a kama ku)

Kuma ka bar teku rarrabe. Lalle su, runduna ce abar nutsarwa

Da yawa suka bar gonaki da maremari

Da shuke-shuke da matsayi mai kyau

Da wata ni'ima da suka kasance a cikinta suna masu hutu

Kamar haka! Kuma Muka gadar da ita ga waɗansu mutane na dabam

Sa'an nan sama da ƙasa ba su yi kuka *a kansu ba, Kuma ba su kasance waɗanda ake yi wa jinkiri ba

Kuma lalle ne, haƙiƙa Mun tsirar da Bani Isra'ila daga, azaba mai wulakantawa

Daga Fir'auna. Lalle shi, ya kasance maɗaukaki daga cikin masu ɓarna

Kuma lalle ne, haƙiƙa, Mun zaɓe su saboda wani ilmi (na Taurata) a kan mutane

Kuma Muka ba su, daga ayoyin mu'ujizoji, abin da yake a cikinsa, akwai ni'ima bayyananna

Lalle waɗannan mutane*, haƙika, suna cewa

Babu wani abu sai mutuwarmu ta farko, kuma ba mu zama waɗanda ake tayarwa ba

Sai ku zo da ubanninmu, idan kun kasance masu gaskiya

shin, su ne mafifita ko kuwa mutanen Tubba'u, kuma da waɗanda ke a gabaninsu? Mun halaka su, lalle su, sun kasance masu laifi

Kuma ba Mu halitta slmmai da ƙasa da abin da ke a tsakaninsu ba, alhali kuwa Muna masu wasa

Ba Mu halitta su ba face da manufa ta gaskiya, kuma amma mafi yawansu, ba su sani ba

Lalle ranar rarrabewa, ita ce lokacin wa'adinsu gaba ɗaya

Ranar da wani zumu ba ya amfanin wani zumu da kome kuma ba su zama ana taimakon su ba

face wanda Allah Ya yi wa rahama. Lalle Shi (Allah), shi ne Mabuwayi, Mai jin ƙai

Lalle itaciyar zaƙƙum (ɗanyen wuta)

Ita ce abincin mai laifi

Kamar narkakken kwalta yana tafasa a cikin cikunna

Kamar tafasar ruwan zafi

(A ce wa mala'ikun wuta), "Ku kama shi, sa'an nan ku fizge shi zuwa ga tsakiyar Jahim

Sa'an nan ku zuba, a kansa, daga azabar ruwan zafi

(A ce masa), "Ka ɗanɗana! Lalle kai, kai ne mabuwayi mai girma

Lalle wannan, shi ne abin da kuka kasance kuna shakka game da shi

Lalle masu taƙawa suna cikin matsayi amintacce

A cikin gidajen Aljanna da maremari

Suna tufanta daga tufafin alharini raƙiƙi, da mai kauri, suna masu zaman fuskantar juna

Kamar haka, kuma Mun aurar da su da mata masu kyawun idanu, masu girmansu

Suna kira, a cikinsu (gidejen) ga dukan 'ya'yan itacen marmari, suna amintattu (daga dukan abin tsoro)

Ba su ɗanɗanar mutuwa, a cikinsu, face mutuwar farko, kuma (Allah), Ya tsare musu azabar Jahim

Saboda falala daga Ubangijinka. Wancan shi ne babban rabo, mai girma

Domin haka kawai Muka sauƙaƙar da shi (Alƙur'ani) da harshenka, tsammaninsu, su riƙa tunawa

Sai ka yi jira. Lalle su, masu jira ne