Hausa - Chapter 63 - Al-Munafiqun

Idan munafukai* suka je maka suka ce: "Mune shaidar lalle kai haƙiƙa Manzon Allah ne," Kuma Allah Yana sane da lalle Kai, haƙiƙa Manzon Sa ne, kuma Allah Yana shaida lalle munafukan haƙiƙa, maƙaryata ne

Sun riƙi rantsuwowinsu garkuwa, sai suka taushe daga tafarkin Allah. Lalle su abin da suka kasance suna aikatawa ya munana

Wancan, domin lalle su, sun yi imani, sa'an nan kuma suka kafirta, sai aka yunƙe a kan zukatansu. Saboda su, ba su fahimta

Kuma idan ka gan su, sai jikunansu su ba ka sha'awa kuma idan sun faɗa,* za ka saurara ga maganarsu. Kamar dai su ƙyami ne wanda aka jingine. Suna zaton kowace tsawa a kansu take. Su ne maƙiyan, sai ka yi saunarsu. Allah Ya la'ane su. Yaya ake karkatar da su

Kuma idan aka ce musu "Ku zo Manzon Allah ya nema maku gafara," Sai su gyaɗa kawunansu, kuma ka gan su suna kangewa, alhali kuwa suna masu girman kai

Daidai ne a kansu, ka nema musu gafara ko ba ka nemamusu ba. faufau Allah ba zai gafarta musu ba. Lalle Allah, ba zai shiryar da mutane fasiƙai ba

Su ne waɗanda ke cewa "Kada ku ciyar a kan wanda ke wurin Manzon Allah har su watse," alhali kuwa taskokin sammai da ƙasa ga Allah suke kuma amma munafukai ba su fahimta

Suna cewa "Lalle ne idan mun koma* zuwa Madinar, haƙiƙa mafi rinjaya zai fitar da mafi ƙasƙanta daga gare ta, alhali kuwa rinjayar ga Allah take kuma da ManzonSa, kuma da muminai, kuma amma munafikai ba su sani ba

Ya ku waɗanda suka yi imani! Kada dukiyoyinku da ɗiyanku su shagaltar da ku daga ambaton Allah. Kuma wanda ya yi haka, to, waɗannan su ne masu hasara

Kuma ku ciyar daga abin da Muka azurta ku daga gabanin mutuwa ta je wa ɗayanku har ya ce: "Ya Ubangijina! Don me ba Ka yi mini jinkiri ba zuwa ga wani ajali makusanci domin in gaskata kuma in kasance daga salihai

Kuma Allah ba zai jinkirta wa wani rai ba idan ajalinsa ya je. Kuma Allah Masani ne ga abin da suke aikatawa