Hausa - Chapter 64 - At-Taghabun

Abin da yake a cikin sammai da wanda yake a cikin ƙasa suna tasbihi ga Allah. Gare Shi mulki yake, kuma gare Shi godiya take. Kuma Shi, a kan kome, Mai ikon yi ne

Shi ne wanda Ya halitta ku. Sa'an nan daga gare ku akwai kafiri kuma daga gare ku akwai mumini. Kuma Allah Mai gani ne ga abin da kuke aikatawa

Ya halitta sammai da ƙasa da abin da yake hakkin Sa. Kuma Ya suranta ku, sa'an nan Ya kyautata surorinku. Kuma zuwa gare Shi makoma take

Yana sanin abin da ke a cikin sammai da ƙassai. Kuma Yana sanin abin da kuke boyewa da abin da kuke bayyanawa. Kuma Allah Masani ne ga abin da ke cikin ƙiraza

Shin, babban labari bai je muku ba na waɗanda suka kafirta daga gabani, sai suka ɗanɗani uƙubar al'amarinsu kuma suna da wata azaba mai raɗaɗi

Wancan saboda lalle su Manzanninsu sun kasance suna je musu da hujjoji bayyanannu, sai suka ce: "Ashe, wasu mutane za su shiryar da mu?" Sai suka kafirta kuma suka juya baya, kuma Allah Ya wadatu (daga gare su). Kuma Allah wadatacce ne, Godadde

Waɗanda suka kafirta sun riya cewa ba za a tayar da su ba. Ka ce: "Ni, ina rantsuwa da Ubangijina. Lalle za a tayar da ku haƙiƙatan, sa'an nan kuma lalle ana ba ku labari game da abin da kuka aikata. Kuma wannan ga Allah mai sauƙi ne

Saboda haka ku yi imani da Allah da ManzonSa da hasken nan da Muka saukar. Kuma Allah, ga abin da kuke aikatawa, Mai labartawa ne

A ranar da Yake tattara ku domin ranar taruwa. Wancan ne ranar kamunga. Kuma wanda ya yi imani da Allah, kuma ya aikata aikin ƙwarai, zai kankare masa munanan ayyukansa, kuma Yashigar da shi gidajen Aljanna, ƙoramu na gudana daga ƙarƙashinsu, suna madawwama a cikinsu har abada. Wannan ne babban rabo mai girma

Kuma waɗanda suka kafirta, kuma suka ƙaryata game da ayoyin Mu, waɗannan sune'yan wuta, suna madawwama a cikinta. Kuma tir da makoma, ita

Wata masifa ba za ta samu ba face da iznin Allah. Kuma wanda ya yi imani da Allah, Allah zai shiryar da zuciyarsa. Kuma Allah, ga dukan kome, Masani ne

Kuma ku yi ɗa'a ga Allah, kuma ku yi ɗa'a ga Manzo. Sa'an nan idan kun juya baya, to, abin sani kawai, akwai iyarwa bayyananna a kan Manzon Mu

Allah babu wani abin bauta wa face Shi. Kuma ga Allah, sai muminai su dogara

Ya ku waɗanda suka yi imani! Lalle ne daga matanku da ɗiyanku akwai wani maƙiyi* a gare ku, sai ku yi saunarsu. Kuma idan kuka yafe, kuma kuka kau da kai, kuma kuka gafarta, to, lalle Allah Mai gafara ne, Mai jin ƙai

Dukiyoyinku da ɗiyanku fitina* ɗai ne. Kuma Allah, a wurin Sa akwai wani sakamako mai girma

Sai ku bi Allah da taƙawa gwargwadon abin da kuka sami iko. Kuma ku saurara kuma ku yi ɗa'a, kuma ku ciyar, ya fi zama alheri gare ku. Kuma wandaya saɓa wa rowar ransa, to, waɗannan su ne masu babban rabo

Idan kun bai wa Allah rance, rance mai kyau, (Allah) zai ninka shi a gare ku kuma Ya gafarta muku. Kuma Allah Mai yawan godiya ne, Mai haƙuri

Shi ne Masanin fake da bayyane, Mabuwayi, Mai hikima