Hausa - Chapter 68 - Al-Qalam

N. Na rantse da alƙalami da abin da (marubuta) suke rubutawa

Kai, saboda ni'imar Ubangijinka, ba mahaukaci kake ba

Kuma, lalle, haƙiƙa kana da ladar da ba ta yankewa

Kuma, lalle haƙiƙa kana a kan halayen kirki, manya

Don haka, za ka gani, su kuma za su gani

Ga wanenku hauka take

Lalle Ubangijinka Shi ne Mafi sani ga wanda ya ɓace daga tafarkin Sa. Kuma Shi ne Mafi sani ga masu shiryuwa

Saboda haka kada ka bi masu ƙaryatawa

Suna fatar ka sassauta, su kuma su sassauta

Kada ka bi dukkan mai yawan rantsuwa, walakantacce

Mai zunɗe, mai yawo da gulma

Mai hana alheri mai zalunci, mai zunubi

Mai girman kai, bayan haka kuma la'imi (ba ya son alheri)

Saboda ya kasance mai dukiya da ɗiya

Idan ana karanta masa ayoyin Mu, sai ya ce: "Tatsuniyoyin mutanen farko ne

Za Mu yi masa alama a kan hanci

Lalle Mun jarrabe su kamar yadda Muka jarrabi masu gonar lambu, a lokacin da suka yi rantsuwa, wai lalle za su girbe amfaninta, suna masu asubanci

Kuma (suka yi niyya), ba su ko togewa

Wani mai kewayawa daga Ubangijinka ya kewaya a kanta, (ya ƙone ta,) alhali suna barci

Sai ta wayi gari (baƙa ƙirin) kamar dare

Sai suka kirayi juna, suna masu yin asubanci

Cewa ku yi sammako ga amfanin gonarku, idan kun kasance masu girbewa

Sai suka tafi suna shawara a ɓoye (suna cewa)

Lalle kada wani miskini ya shigar muku ita a yau

Kuma suka yi sammako akan (niyyar) rowa, matuƙar iyawarsu

Lokacin da suka gan ta, sai suka ce: "Lalle, mun saki hanya (mun ɓace)

Ba haka ba, mu dai, an hana mu ne

Mafificinsu (hankali) ya ce: "Ban gaya muku ba, ya kamata ku tsarkake Allah

Suka ce: "Tsarki ya tabbata ga Ubangijinmu! Lalle, mu mun kasance azzalumai

Sai suka fuskanci juna, suna zargin kansu

Suka ce: "Kaitonmu! Lalle, mu ne muka kasance masu ƙetare iyaka

Mai yiwuwa ne Ubangijinmu Ya musanya mana da wani abu da ya fi ta. Lalle, mu (ba mu yanke ƙauna ba) zuwa ga Ubangijinmu, masu kwaɗayi ne

Haka dai azabar* take, kuma lalle ne azabar Lahira ta fi girma, in da sun kasance za su iya ganewa

Lalle ne masu taƙawa na da a wurin Ubangijinsu, gidajen Aljanna na ni'ima

Shin ko za Mu sanya waɗanda ke bi da ɗa'a kamar masu laifi

Me ya same ku, yaya kuke yin hukunci (da haka)

Ko kuna da wani littafi, wanda a cikinsa, kuke karantawa

Cewa kuna da, a cikinsa lalle (duk) abin da rayukanku suka zaɓa

Ko kuna (riƙe) da wasu rantsuwoyin alkawari a kan Mu, har ya zuwa Ranar ¡iyama, cewa lalle ne kuna da abin da kuke hukunta wa kanku

Ka tambaye su, wane, a cikinsu, ke lamuncewa ga samun wannan (hukuncin)

Ko suna da abokan tarewa (ga wannan ra'ayi)? To, sai su kawo abokan tarayyarsu, idan sun kasance masu gaskiya

Ranar da za a kuranye ƙwabri, kuma a kira su zuwa ga yin sujada, sai ba za su iyawa ba

Su fito da idanu ƙasƙantattu, wulakanci yana rufe su. Lalle ne a da sun kasance ana kiran su zuwa, yin sujudar, alhali kuwa suna lafiya lau, (suka ƙi yi)

Saboda haka ka bar Ni da mai ƙaryata wanna labari (Alƙur'ani). Za Mu yi musu istidraji daga inda ba su sani ba

Ina jinkirta musu, lalle kaidi Na mai ƙarfi ne

Ko kana tambayar su wata la'ada ne, saboda haka su, daga wannan tarar, suke jin an nauyaya musu

Ko kuma suna da ilmin gaibu ne, wato suna yin rubutun (abin da suke faɗa daga gare shi) ne

Saboda haka, ka yi haƙuri da hukuncin Ubangijinka, kada ka zama kamar Ma'abucin kifi, alokacin da ya yi kira, alhali yana cike da hushi

Ba domin ni'ima daga wajen Ubangijinsa ta riske shi ba, lalle ne da an jefa shi a cikin wofintacciyar ƙasa, alhali yana abin zargi

Sai Ubangijinsa Ya zaɓe shi, sa'an nan Ya sanya shi a cikin mutanen kirki

Kuma lalle, ne waɗanda suka kafirta suna yin kamar su kayar da kai sabo da kallonsu (kallon mamaki), a lokacin da suke jin karatun Alƙur'ani, kuma suna cewa, "Lalle ne shi mahaukaci ne

Shi (Alƙur'ani) bai kasance ba, face abin tunatarwa ne ga duka duniya