Hausa - Chapter 69 - Al-Haqqah

Kiran gaskiya

Mene ne kiran gaskiya

Kuma me ya sanar da kai abin da ake cewa kiran gaskiya

Samudawa da Adawa sun ƙaryatar da kiran gaskiya mai dukar zuciya

To, amma Samudawa to, an halakasu da tsawa mai tsanani

Kuma amma Adawa to, an halaka su da wata iska mai tsananin sauti wadda ta ƙetare haddi

(Allah) Ya hore ta a kansu a cikin dare bakwai da yini takwas, biye da juna, saboda haka, kana ganin mutane a cikinta kwance. Kamar su ƙiraruwan dabino ne, waɗanda suka faɗi

To, ko kana ganin abin da ya yi saura daga cikinsu

Kuma Fir'auna ya zo da waɗanda ke gabaninsa, da waɗannan da aka kife ƙasarsu, saboda laifi

Domin sun saɓa wa manzon Ubangijinsu, saboda haka ya kama su da wani irin kamu mai ƙaruwar (tsanani)

Lalle ne, Mu, a lokacin da ruwa ya ƙetare haddi, Munɗauke aaku a cikin jirgin ruwan nan

Domin Mu sanya shi, gare ku abin tunawa kuma wani kunne mai kiyayewa ya kiyaye (shi)

To, idan an yi busa a cikin ƙaho, busa ɗaya

Kuma aka ɗauki ƙasa da duwatsu, kuma aka niƙa su niƙawa ɗaya

A ran nan, mai aukuwa za ta auku

Kuma sama za ta tsage, domin ita a ran nan, mai rauni ce

Kuma mala'iku (su bayyana) a kan sasanninta, kuma wasu (mala'iku) takwas na ɗauke da Al'arshin Ubangijinka, a sama da su, a wannan ranar

A ranar nan za a bijira ku (domin hisabi), babu wani rai, mai ɓoyewa, daga cikinku, wanda zai iya ɓoyewa

To, amma wanda aka bai wa littafinsa a damansa, sai ya ce wa (makusantansa), "Ku karɓa, ku karanta littafina

Lalle ne ni, na tabbata cewa ni mai haɗuwa da hisabina ne

Saboda haka, shi yana cikin wata rayuwa yardadda

A cikin Aljanna maɗaukakiya

Nunannun 'ya'yan itacenta makusanta ne (ga mai son ɗiba)

(Ana ce musu) "Ku ci, kuma ku sha a cikin ni'ima, saboda abin da kuka gabatar a cikin kwanukan da suka shige

Kuma wanda aka bai wa littafinsa ga hagunsa, sai ya ce: "Kaitona, ba a kawo mini littafina ba

Kuma ban san abin da (ke sakamakon) hisabina ba

In da dai ita, ta kasance mai halaka ni gaba ɗaya ce

Dukiyata ba ta wadatar da ni ba

Ikona ya ɓace mini

(Sai a ce wa mala'iku) "Ku kama shi, sa'an nan ku sanya shi a cikin ƙuƙumi

Sa'an nan, a cikin Jahim, ku ƙona shi

Sa'an nan, acikin sarƙa, tsawonta zira'i saba'in, sai ku sanya shi

Lalle ne, shi ya kasance ba ya yin imani da Allah, Mai girma

Kuma ba ya kwaɗaitarwa ga (bayar da) abincin matalauci

Saboda haka, a yau, a nan, ba ya da masoyi

Kuma babu wani abinci, sai daga (itacen) gislin

Babu mai cin sa sai masu ganganci

To, ba sai Na yi rantsuwa da abin da kuke iya gani ba

Da abin da ba ku iya gani

Lalle ne, shi (Alƙur'ani) tabbas maganar wani manzo (Jibirilu) mai daraja ne

Kuma shi ba maganar wani mawaƙi ba ne. Kaɗan ƙwarai za ku gaskata

Kuma ba maganar boka ba ne. Kaɗan ƙwarai za ku iya tunawa

Abin saukarwa ne daga Ubangijin halitta duka

Kuma da (Muhammadu) ya faɗi wata magana, ya jingina ta gare Mu

Da Mun kama shi da dama

sa'an nan, lalle ne, da Mun katse masa laka

Kuma daga cikinku babu wasu masu iya kare (azabar Mu) daga gare shi

Kuma lalle ne shi (Alƙur'ani) tanatarwa ce ga masu taƙawa

Kuma lalle, ne Mu, wallahi Muna sane da cewa daga cikinku alwwai masu ƙaryatawa

Kuma lalle ne shi (Alƙarani) wallahi baƙin ciki ne ga kafirai

Kuma lalle, ne shi gaskiya ce ta yaƙini

Saboda haka, ka tsarkake sunan Ubangjinka, mai girma