Hausa - Chapter 71 - Nuh

Lalle ne Mun aiki Nuhu zuwa ga mutanensa, cewa ka yi gargaɗi ga mutanenka gabanin wata azaba mai raɗaɗi ta zo musu

Ya ce: "Ya mutanena ni, a gare ku, mai gargaɗi ne, mai bayyanawa

Cewa ku bauta wa Allah, ku ji tsoron Sa, kuma ku bi ni

Allah zai gafarta muku daga zunubanku kuma Ya jinkirta muku zuwa ga ajalin da aka ambata. Lalle ne ajalin Allah idan ya zo, ba za a jinkirta Shi ba, da kun kasance masana (ga abin da nake faɗa da, kun bar kafirci)

(Nuhu) ya ce: "Ya Ubangijina! Lalle ne, na kirayi mutanena, a cikin dare da yini

To, amma kirana bai ƙare su ba sai da, gudu (daga gare ni)

Kuma lalle ne ni, ko da yaushe na kiraye su domin Ka gafarta musu, sai su sanya yatsunsu a cikin kunnuwansu, su lulluɓe da tufafinsu, su doge ga yin laifi. Sun yi girman kai iyakar girman kai

Sa'an nan lalle ne ni, na kira su, a bayyane

Sa'an nan lalle ne, na yi yekuwa saboda su, kuma na gana da su a cikin asiri

Shi na ce, 'Ku nemi gafara daga Ubangijinku, lalle ne shi Ya kasance Mai gafara ne

Ya sako (girgijen) sama a kanku da ruwa mai ɓuɓɓuga

Kuma ya yalwata muku game da dukiya da ɗiya, Ya sanya muku (albarka) ga gonaki, kuma Ya sanya muku koguna

Me ya same ku, ba ku fatar samun natsuwa daga Allah

Alhali kuwa, lalle ne, Ya halitta. ku, a cikin halaye

Ba ku ga yadda Allah Ya halitta wasu sammai bakwai ɗabaƙoƙi a kan juna ba

Ya sanya wata a cikinsu, yana mai haske, Ya sanya rana babbar fitila

Kuma Allah Ya tsirar da ku daga ƙasa (kamar ganye) tsirarwa

Sa'an nan Ya mayar da ku a cikinta, kuma Ya fitar da ku fitarwa

Kuma Allah Ya sanya muku ƙasa shimfidaɗɗiya

Domin ku shiga a cikinta, hanyoyi masu faɗi

Nuhu ya ce: "Ya Ubangijina! Lalle ne su sun saɓa mini sun bi wanda dukiyarsa da ɗiyansa ba su ƙare shi da kome ba sai da hasara

Kuma sun yi wani makirci, makirci babba

Kuma suka ce: Faufau kada ku bar gumakanku, kuma faufau, kada ku bar wadda, kuma kada ku bar suwa kuma kada ku bar Yagusa da Yans uƙa da Nasra

Kuma lalle ne sun ɓatar da (mutane) masu yawa, kuma kada Ka ƙara wa azzalumai (kome) sai ɓata

Saboda laifukansu na ganganci aka nutsar da su, sa'an nan aka sanya su a wuta. Saboda haka ba su sama wa kansu wani mataimaki wanin Allah ba

Kuma Nuhu ya ce: "Ya Ublngijina! Kada Ka bari, a kan ƙasa, daga cikin kafirai, wanda ke zama a cikin gida

Lalle ne, Kai idan Ka bar su, za su ɓatar da bayin Ka, kuma ba za su haifi kowa ba face fajiri mai yawan kafirci

Ya Ubanginjina! Ka yi mini gafara (ni) da mahaifana biyu, da wanda ya shiga gidana, yana mai imani, da muminai maza da muminai mata, kuma kada Ka ƙara wa azzalumai kome sai halaka