Hausa - Chapter 77 - Al-Mursalat

Ina rantsuwa da iskokin da ake sakowa jere, suna bin juna

Sa'an nan, su zama iskoki masu ƙarfi suna kaɗawa da ƙarfi

Kuma, masu watsa rahama watsawa

sa'an nan, da ayoyi* masu rarrabe gaskiya da ƙarya rarrabewa

Sa'an nan da mala'iku masu jefa tunatarwa ga Manzanni

Domin yanke hamzari ko domin gargadi

Lalle ne, abin da ake yi muku wa'adi da shi tabbas mai aukuwa ne

To, idan taurari aka shafe haskensu

Kuma, idan sama aka tsage ta

Kuma, idan duwatsu aka nike su

Kuma, idan manzanni aka ƙayyade lokacin tara su

Domin babbar ranar da aka yi wa ajali

Domin ranar rarrabewa

Kuma, me ya sanar da kai ranar rarrabewa

Bone ya tabbata a ranar nan, ga masu ƙaryatawa

Ashe, ba Mu halakar da (masu ƙaryataw) na farko ba

Sa'an nan, kuma za Mu biyar musu da na ƙarshe

Haka nan, Muke aikatawa da masu yin laifi

Bone ya tabbata a ranar nan ga masu ƙaryatawa

Ashe, ba Mu halitta ku daga wani ruwa wulakantacce ba

Sa'an nan Muka sanya shi a cikin wani wurin natsuwa amintacce

Zuwa ga wani gwargwadon mudda sananna

Sa'an nan, Muka nuna iyawar Mu? Madalla da Mu, Masu nuna iyawa

Bone ya tabbata a ranar nan ga masu ƙaryatawa

Ashe, ba Mu sanya ƙasa matattara ba

Ga rayayyu da matattu

Kuma, Muka sanya, a cikinta, kafaffun duwatsu maɗaukaka, kuma Muka shayar da ku ruwa mai daɗi

Bone ya tabbata, a ranar nan, ga masu ƙaryatawa

Ku tafi zuwa ga abin da kuka kasance kuna ƙaryatawa game da shi

Ku tafi zuwa ga wata inuwa mai rassa uku

Ita ba inuwar ba, kuma ba ta wadatarwa daga harshen wuta

Lalle ne, ita, tana jifa da tartsatsi kamar soraye

Kamar dai su raƙumma ne baƙaƙe

Bone ya tabbata, a ranar nan, ga masu ƙaryatawa

Wannan, yini ne da ba za su iya yin magana ba

Ba za a yi musu izni ba, balle su kawo hanzari

Bone ya tabbata, a ranar nan, ga masu ƙaryatawa

Wannan ranar rarrabewa ce, Mun tattara ku tare da mutanen farko

To, idan akwai wata dabara gare ku, sai ku yi ma Ni ita

Bone ya tabbata, a ranar nan, ga masu ƙaryatawa

Lalle ne, masu taƙawa suna a cikin inuwowi da maremari

Da wasu 'ya'yan itace irin waɗanda suke marmari

(A ce musu) "Ku ci ku sha cikin ni'ima saboda abin da kuka kasance kuna aikatawa

Lalle ne, Mu haka Muke saka wa masu kyautatawa

Bone ya tabbata, a ranar nan, ga masu ƙaryatawa

(Ana ce musu) "Ku ci ku ji ɗan dadi kaɗan, lalle ne dai ku masu laifi ne

Bone ya tabbata, a ranar nan, ga masu ƙaryatawa

Kuma, idan an ce musu: "Ku yi ruku'i; ba za su yi ruku'in (salla) ba

Bone ya tabbata, a ranar nan, ga masu ƙaryatawa

To, da wane labari (Littafi), waninsa (Alƙur'ani) za su yi imani