Back to Languages

Swahili - Chapter 72 - Al-Jinn

Translation by Ali Muhsin Al Barwani — Permalink

Verse 1 — Surah Al-Jinn 72:1

Sema: Imefunuliwa kwangu ya kuwa kundi moja la majini lilisikiliza, na likasema: Hakika sisi tumeisikia Qur'ani ya ajabu

Verse 2 — Surah Al-Jinn 72:2

Inaongoza kwenye uwongofu, kwa hivyo tumeiamini, wala hatutamshirikisha yeyote na Mola wetu Mlezi

Verse 3 — Surah Al-Jinn 72:3

Na kwa hakika utukufu wa Mola wetu Mlezi umetukuka kabisa; hana mke wala mwana

Verse 4 — Surah Al-Jinn 72:4

Na kwa hakika wapumbavu miongoni mwetu walikuwa wakisema uwongo ulio pindukia mipaka juu ya Mwenyezi Mungu

Verse 5 — Surah Al-Jinn 72:5

Nasi tulidhani kuwa watu na majini hawamzulii uwongo Mwenyezi Mungu

Verse 6 — Surah Al-Jinn 72:6

Na hakika walikuwako wanaume katika watu walio kuwa wakitafuta kujikinga kwa wanaume wa kijini; kwa hivyo wakawazidisha madhambi

Verse 7 — Surah Al-Jinn 72:7

Na kwa hakika wao walidhani, kama mlivyo dhani nyinyi, ya kuwa Mwenyezi Mungu hatamleta Mtume

Verse 8 — Surah Al-Jinn 72:8

Nasi tulizigusa mbingu, na tukaziona zimejaa walinzi wenye nguvu na vimondo

Verse 9 — Surah Al-Jinn 72:9

Na hakika tulikuwa tukikaa humo katika baadhi ya makao ili kusikiliza; lakini sasa anaye taka kusikiliza atakuta kimondo kinamvizia

Verse 10 — Surah Al-Jinn 72:10

Nasi hatujui kama wanatakiwa shari wale wanao kaa kwenye ardhi au Mola wao Mlezi anawatakia uwongofu

Verse 11 — Surah Al-Jinn 72:11

Na hakika katika sisi wamo walio wema, na wengine wetu ni kinyume na hivyo. Tumekuwa njia mbali mbali

Verse 12 — Surah Al-Jinn 72:12

Nasi tulijua kuwa hatutomshinda Mwenyezi Mungu duniani, wala hatuwezi kumponyoka kwa kukimbia

Verse 13 — Surah Al-Jinn 72:13

Nasi tulipo usikia uwongofu tuliuamini. Basi mwenye kumuamini Mola wake Mlezi basi haogopi kupunjwa wala kudhulumiwa

Verse 14 — Surah Al-Jinn 72:14

Na hakika wamo katika sisi Waislamu, na wamo kati yetu wanao acha haki. Basi walio silimu, hao ndio walio tafuta uwongofu

Verse 15 — Surah Al-Jinn 72:15

Na ama wanao acha haki, hao watakuwa kuni za Jahannamu

Verse 16 — Surah Al-Jinn 72:16

Na lau kama wangeli simama sawasawa juu ya njia tungeli wanywesha maji kwa wingi

Verse 17 — Surah Al-Jinn 72:17

Ili tuwajaribu kwa hayo. Na anaye puuza kumkumbuka Mola wake Mlezi atamsukuma kwenye adhabu ngumu

Verse 18 — Surah Al-Jinn 72:18

Na hakika misikiti ni ya Mwenyezi Mungu, basi msimuabudu yeyote pamoja na Mwenyezi Mungu

Verse 19 — Surah Al-Jinn 72:19

Na hakika Mja wa Mwenyezi Mungu alipo simama kumwomba, wao walikuwa karibu kumzonga

Verse 20 — Surah Al-Jinn 72:20

Sema: Hakika mimi namwomba Mola wangu Mlezi, wala simshirikishi Yeye na yeyote

Verse 21 — Surah Al-Jinn 72:21

Sema: Mimi sina mamlaka ya kukudhuruni wala kukuongozeni

Verse 22 — Surah Al-Jinn 72:22

Sema: Hakika hapana yeyote awezae kunilinda na Mwenyezi Mungu, wala sitapata pa kukimbilia isipo kuwa kwake Yeye tu

Verse 23 — Surah Al-Jinn 72:23

Ila nifikishe Ujumbe utokao kwa Mwenyezi Mungu na risala zake. Na wenye kumuasi Mwenyezi Mungu na Mtume wake, basi hakika hao watapata Moto wa Jahannamu wadumu humo milele

Verse 24 — Surah Al-Jinn 72:24

Hata watakapo yaona wanayo ahidiwa, ndipo watakapo jua ni nani mwenye msaidizi dhaifu, na mchache wa idadi

Verse 25 — Surah Al-Jinn 72:25

Sema: Sijui kama yapo karibu hayo mnayo ahidiwa, au Mola wangu Mlezi atayawekea muda mrefu

Verse 26 — Surah Al-Jinn 72:26

Yeye ndiye Mwenye kujua ya siri, wala hamdhihirishii yeyote siri yake

Verse 27 — Surah Al-Jinn 72:27

Isipo kuwa Mtume wake aliye mridhia. Naye huyo humwekea walinzi mbele yake na nyuma yake

Verse 28 — Surah Al-Jinn 72:28

Ili Yeye ajue kwamba wao wamefikisha ujumbe wa Mola wao Mlezi, na Yeye anayajua vyema yote walio nayo, na amedhibiti idadi ya kila kitu