Urdu - Chapter 88 - Al-Ghashiyah

کیا تمہیں اُس چھا جانے والی آفت کی خبر پہنچی ہے؟

کچھ چہرے اُس روز خوف زدہ ہونگے

سخت مشقت کر رہے ہونگے

تھکے جاتے ہونگے، شدید آگ میں جھلس رہے ہونگے

کھولتے ہوئے چشمے کا پانی انہیں پینے کو دیا جائے گا

خار دار سوکھی گھاس کے سوا کوئی کھانا اُن کے لیے نہ ہوگا

جو نہ موٹا کرے نہ بھوک مٹائے

کچھ چہرے اُس روز با رونق ہوں گے

اپنی کار گزاری پر خوش ہونگے

عالی مقام جنت میں ہوں گے

کوئی بیہودہ بات وہاں نہ سنیں گے

اُس میں چشمے رواں ہونگے

اُس کے اندر اونچی مسندیں ہوں گی

ساغر رکھے ہوئے ہوں گے

گاؤ تکیوں کی قطاریں لگی ہوں گی

اور نفیس فرش بچھے ہوئے ہوں گے

(یہ لوگ نہیں مانتے) تو کیا یہ اونٹوں کو نہیں دیکھتے کہ کیسے بنائے گئے؟

آسمان کو نہیں دیکھتے کہ کیسے اٹھایا گیا؟

پہاڑوں کو نہیں دیکھتے کہ کیسے جمائے گئے؟

اور زمین کو نہیں دیکھتے کہ کیسے بچھائی گئی؟

اچھا تو (اے نبیؐ) نصیحت کیے جاؤ، تم بس نصیحت ہی کرنے والے ہو

کچھ ان پر جبر کرنے والے نہیں ہو

البتہ جو شخص منہ موڑے گا اور انکار کرے گا

تو اللہ اس کو بھاری سزا دے گا

اِن لوگوں کو پلٹنا ہماری طرف ہی ہے

پھر اِن کا حساب لینا ہمارے ہی ذمہ ہے