Back to Languages

Sinhala - Chapter 68 - Al-Qalam

Translation by Www.islamhouse.com — Permalink

Verse 1 — Surah Al-Qalam 68:1

නූන්, පෑන හා ඔවුන් ලියන දෑ මත දිවුරමින්

Verse 2 — Surah Al-Qalam 68:2

නුඹේ පරමාධිපතිගේ පිහිටෙන් නුඹ උන්මත්තකයකු නොවේ

Verse 3 — Surah Al-Qalam 68:3

තවද සැබැවින්ම නුඹට නිමක් නොමැති ප්‍රතිඵලයක් ඇත

Verse 4 — Surah Al-Qalam 68:4

තවද නියත වශයෙන්ම නුඹ අති උතුම් ගතිගුණ මත සිටින්නෙහිය

Verse 5 — Surah Al-Qalam 68:5

නුඹ මතු දකිනු ඇත. තවද ඔවුහුද මතු දකිනු ඇත

Verse 6 — Surah Al-Qalam 68:6

නුඹලා අතුරින් කවරෙකු පීඩාවෙන් පෙළෙන්නේදැයි (මතු දකිනු ඇත)

Verse 7 — Surah Al-Qalam 68:7

නියත වශයෙන්ම නුඹගේ පරමාධිපති වන ඔහු ඔහුගේ මාර්ගයෙන් මූළා වී ගිය අය පිළිබඳ මැනැවින් දන්නාය. තවද යහමග ලද්දවුන් පිළිබඳ ව ද මැනැවින් දන්නාය

Verse 8 — Surah Al-Qalam 68:8

එහෙයින් නුඹ බොරු කළවුනට අවනත නොවනු

Verse 9 — Surah Al-Qalam 68:9

නුඹ ලිහිල් කළෙහි නම් එවිට ඔවුහුද ලිහිල් කරන්නට කැමති වෙති

Verse 10 — Surah Al-Qalam 68:10

තවද අධික වශයෙන් දිවුරා සිටින නීච සෑම කෙනෙකුටම නුඹ අවනත නොවනු

Verse 11 — Surah Al-Qalam 68:11

ඔහු දොස් නගන්නෙකි. කේලාම් කියමින් සැරිසරන්නෙකි

Verse 12 — Surah Al-Qalam 68:12

යහපත වළක්වන්නෙකි. සීමාව ඉක්මවා කටයුතු කරන්නෙකි. පාපිෂ්ඨයෙකි

Verse 13 — Surah Al-Qalam 68:13

හිතුවක්කාරයෙකි. ඊටත් වඩා ඔහු අවජාතකයෙකි

Verse 14 — Surah Al-Qalam 68:14

ඔහු වස්තුව හා දරුවන් සතු ව සිටි කෙනෙකු වූ බැවින්

Verse 15 — Surah Al-Qalam 68:15

ඔහු වෙත අපගේ වදන් පරායනය කරනු ලැබූ විට “මෙය පැරැන්නන්ගේ ගොතපු කතා යැ”යි කියයි

Verse 16 — Surah Al-Qalam 68:16

හොඬවැල මත අපි ඔහුට සලකුණු තබන්නෙමු

Verse 17 — Surah Al-Qalam 68:17

උයන් වැසියන් අපි පරීක්ෂාවට ලක් කළාක් මෙන්ම නියත වශයෙන්ම අපි (මක්කාවාසීන් වන) මොවුන් ව ද පරීක්ෂාවට ලක් කළෙමු. තමන් උදෑසනම එය (අස්වැනු) නෙළන්නට දිවුරුම් කර ගත්තෝය

Verse 18 — Surah Al-Qalam 68:18

ඔවුන් අල්ලාහ් අභිමත කළේ නම් ( එනම් ඉන්ශා අල්ලාහ් ) යැයි ඔවුන් පැවැසුවේ නැත

Verse 19 — Surah Al-Qalam 68:19

ඔවුන් නිදමින් සිටිය දී නුඹගේ පරමාධිපතිගෙන් වූ වැටලීමක් එය වටලා ගත්තේය

Verse 20 — Surah Al-Qalam 68:20

එවිට එය (ගිනිබත් වී) ඝනාන්ධකාරයක් මෙන් විය

Verse 21 — Surah Al-Qalam 68:21

ඔවුහු උදෑසන එකිනෙකා අමතන්නන් වූහ

Verse 22 — Surah Al-Qalam 68:22

නුඹලා නෙළන්නන් වූයෙහු නම් නුඹලාගේ ගොවි බිමට උදෑසන යා යුතු යැයි (අමතන්නන් වූහ)

Verse 23 — Surah Al-Qalam 68:23

(ඔවුන්) රහසිගත ව කතා කරමින් ගමන් කළෝය

Verse 24 — Surah Al-Qalam 68:24

එවිට අද දින නුඹලා වෙත කිසිදු දිළිඳෙකු එයට ඇතුළු නොවිය යුතු යැයි (ඔවුන් අතර කතා කරගත්හ)

Verse 25 — Surah Al-Qalam 68:25

තවද නෙළීමට ශක්තිය ඇත්තන් ලෙසින් ඔවුහු උදෑසන පිටත් වූහ

Verse 26 — Surah Al-Qalam 68:26

එවිට ඔවුහු එය දුටු කල්හි නියත වශයෙන්ම අපි මුළා වූවෝ වෙමු යැයි පැවැසූහ

Verse 27 — Surah Al-Qalam 68:27

එසේ නොව අපි අහිමි කරනු ලැබූවෝ වෙමු

Verse 28 — Surah Al-Qalam 68:28

නුඹලා (අල්ලාහ්ට) සුවිශුද්ධ කළ යුතු නොවේ දැයි මම නුඹලාට නොකීවෙම් දැ?යි ඔවුන් අතුරින් මධ්‍යස්ථ අයෙකු කීවේය

Verse 29 — Surah Al-Qalam 68:29

“අපගේ පරමාධිපති සුවිශුද්ධය. නියත වශයෙන්ම අපි අපරාධකරුවන් වූයෙමු” යැයි ඔවුහු පැවසූහ

Verse 30 — Surah Al-Qalam 68:30

එවිට ඔවුන්ගෙන් ඇතැමෙකු ඇතැමෙකුට දොස් නගමින් ඉදිරියට ආහ

Verse 31 — Surah Al-Qalam 68:31

“අහෝ! අපගේ විනාශය. නියත වශයෙන්ම අපි සීමාව ඉක්මවා යන්නන් වූයෙමු” යැයි ඔවුහු පැවසූහ

Verse 32 — Surah Al-Qalam 68:32

“මීට වඩා යහපත් දෙයක් අපගේ පරමාධිපති අපට පෙරළා දෙන්නට පුළුවන. නියත වශයෙන් අපි අපගේ පරමාධිපති වෙත අපේක්ෂා කරන්නන් වෙමු.”

Verse 33 — Surah Al-Qalam 68:33

එම දඬුවම එලෙසමය. තවද මතු ලොවෙහි දඬුවම අති බිහිසුණුය. ඒ ගැන ඔවුහු දැන සිටියාහු නම්

Verse 34 — Surah Al-Qalam 68:34

නියත වශයෙන්ම බිය බැතිමතුන්ට සැප පහසුකම් සහිත ස්වර්ග උයන් ඔවුන්ගේ පරමාධිපති අබියස ඇත

Verse 35 — Surah Al-Qalam 68:35

එහෙයින් අවනත වූවන් වැරදිකරුවන් මෙන් අපි පත් කරන්නෙමුද

Verse 36 — Surah Al-Qalam 68:36

නුඹලාට කුමක්වීද? නුඹලා තීන්දු කරනුයේ කෙසේද

Verse 37 — Surah Al-Qalam 68:37

(ආදේශ කරන්නන් වන) නුඹලා හදාරන පුස්තකයක් නුඹලාට එහි වීද

Verse 38 — Surah Al-Qalam 68:38

නුඹලා තෝරා ගන්නා දෑ එහි නුඹලාට ඇතැයි සඳහන් වී තිබේ

Verse 39 — Surah Al-Qalam 68:39

එසේ නැතහොත් නුඹලා තීන්දු කරන දෑ නියත වශයෙන්ම නුඹලාට සතු යැයි පවසන මළවුන් කෙරෙන් නැගිටුවනු ලබන දින තෙක් පවතින ගිවිසුමක් අප වෙතින් නුඹලාට තිබේද? ( අප සතුව එවැනි දෙයක් නැත)

Verse 40 — Surah Al-Qalam 68:40

මෙයට ඇප වන්නේ ඔවුන්ගෙන් කවරෙකු දැයි නුඹ ඔවුන්ගෙන් විමසනු

Verse 41 — Surah Al-Qalam 68:41

එසේ නොමැතිනම් ඔවුනට හවුල්කරුවන් සිටිත් ද? ඔවුහු සත්‍යවාදීන් ලෙස සිටියෙහු නම් ඔවුන්ගේ එම හවුල්කරුවන් ඔවුන් ගෙනෙත්වා

Verse 42 — Surah Al-Qalam 68:42

එදින කෙණ්ඩයෙන් නිරාවරණය කරනු ලැබේ. තවද සුජූද් කිරීම සඳහා ඇරයුම් කරනු ලැබේ. එවිට ඔවුහු (ඒ සඳහා) හැකියාව නොදරති

Verse 43 — Surah Al-Qalam 68:43

ඔවුන්ගේ බැල්ම පහත හෙළී පවතී. නින්දාව ඔවුන් වෙළා ගනී. ඔවුන් නිරෝගිව සිටිය දී සුජූද් කිරීම සඳහා ඇරයුම් කරනු ලබන්නන් වූහ. (නමුත් ඔවුහු එය ප්‍රතික්ෂේප කළහ)

Verse 44 — Surah Al-Qalam 68:44

එහෙයින් නුඹ මා හා මෙම ප්‍රකාශය බොරු කළවුන් අතහැර දමනු. ඔවුන් නොදන්නා පරිදි පියවරෙන් පියවර අපි ඔවුන් හසු කර ගන්නෙමු

Verse 45 — Surah Al-Qalam 68:45

තවද මම ඔවුනට කාල අවකාශය දෙමි. නියත වශයෙන්ම මාගේ උපක්‍රමය තිරසාරය

Verse 46 — Surah Al-Qalam 68:46

එසේ නැතහොත් ඔවුන්ගෙන් නුඹ යම් කුලියක් ඉල්ලන්නෙහි ද? ඔවුන් ණය බරින් පෙළෙන්නන් වෙත්ද

Verse 47 — Surah Al-Qalam 68:47

එසේ නැතහොත් ඔවුන් වෙත ගුප්ත ඥානය තිබී ඔවුහු එය ලියන්නෝද

Verse 48 — Surah Al-Qalam 68:48

එහෙයින් නුඹගේ පරමාධිපතිගේ තීන්දුවට නුඹ ඉවසීමෙන් සිටිනු. තවද නුඹ මත්සයා හා සම්බන්ධ පුද්ගලයා මෙන් නොවනු. ඔහු ශෝකයට පත් කරනු ලැබූවෙකු ලෙසින් (තම පරමාධිපති) ඇමතූ අවස්ථාව සිහියට නගනු

Verse 49 — Surah Al-Qalam 68:49

ඔහුගේ පරමාධිපතිගේ පිහිට ඔහු වෙත ළඟා නොවූයේ නම් ඔහු අවමානයට ලක් කරනු ලැබූ තත්ත්වයේ නිසරු වෙරළට විසි කරනු ලබන්නට තිබුණි

Verse 50 — Surah Al-Qalam 68:50

නමුත් ඔහුගේ පරමාධිපති ඔහු ව තෝරා ගත්තේය. තවද ඔහු ව දැහැමියන් අතරට පත් කළේය

Verse 51 — Surah Al-Qalam 68:51

තවද ප්‍රතික්ෂේප කළවුන් අනුශාසනාවට සවන් දුන් කල්හි ඔවුන්ගේ බැල්මෙන් ඔවුහු නුඹ ව ලිස්සා වට්ටන්නට තැත් කරති. “නියත වශයෙන්ම ඔහු උම්මත්තකයකු යැ”යි ඔවුහු පවසති

Verse 52 — Surah Al-Qalam 68:52

එහෙත් එය ලෝවැසියන්ට උපදෙසක් මිස නැත